НАВОИЙ НОМЛИ МАҲАЛЛАДА ЯНГИ “FAYZULLA AVTOSHOP” САВДО ДЎКОНИ ФОЙДАЛАНИШГА ТОПШИРИЛДИ
Энг улуғ, энг азиз байрам – мамлакатимиз мустақиллигининг 32 йиллиги арафасида Амударё туманининг Навоий номли маҳалласида янги қурилган савдо шохобчаси фойдаланишга топширилди.
Шу муносабат билан ўтказилган тантанали тадбирда фуқаролар йиғини масъуллари, “Юсуф эшон бобо” жомъе масжиди имом-хатиби ва маҳалла аҳли иштирок этишди. Шунингдек, тадбиркорлар, кенг жамоатчилик вакиллари ҳам қатнашишди.
Маросимда сўзга чиққанлар юртимизда фуқаролар ҳаёти йил сайин фаровонлашиб бораётганини таъкидлашиб, ҳар бир ислоҳот, аввало, инсон манфаатларига хизмат қилиши кераклигини, шундагина одамларимизнинг турмуши гўзаллашиши, ҳаётига мазмун кириши, кўнглида хотиржамлик ҳукм суришини ва давлатдан, сиёсатдан рози бўлиб яшашини айтиб ўтишди. Шунингдек, ушбу савдо мажмуасининг жонажон Ватанимиз мустақиллигининг 32 йиллиги арафасида туманимиз аҳли учун муносиб байрам совғаси бўлганини эътироф этишди.
Табрик сўзларидан сўнг, шу элнинг пиру-бадавлат нуронийлари алвон ленталарни кесишди ва савдо дўконидаги шароитларни, пештахталардаги маҳсулотларни кўздан кечиришди. Замонавий савдо мажмуасида харидорлар учун барча шарт-шароитлар яратилган. Дўкон савдо қилишга қулай ва харидорлар дидига мос тарзда жиҳозланган.
Туманимиз марказида жойлашган Навоий номли маҳалла кўркига кўрк, файз қўшиб турган ушбу муҳташам “Fayzulla avtoshop” савдо дўкони “Мақсуд ўғли Раҳматжон” номли хусусий корхона раҳбари, тадбиркор Мақсуд Абдуллаевнинг ўз маблағи ҳисобидан қурилди. Автомобилларнинг эҳтиёт қисмлари савдоси йўлга қўйилган савдо дўкони иш бошлаши билан 4 нафар ёшлар ишли бўлишди. Уларнинг барчаси шу ҳудуд ёшлари. Келгусида яна 4 нафар ёшни иш билан таъминлаш режа қилинган.
Тадбиркор Мақсуд Абдуллаев “Мақсуд ўғли Раҳматжон” хусусий корхонасини 2006 йилда ташкил этган. Авваллари кичик дўконларда эҳтиёжга кўра автомобиллар учун зарур бўлган эҳтиёт қисмларни келтириб, юртдошларимизнинг оғирини енгил, узоғини яқин қилиб юрган тадбиркор ўз фаолиятини кенгайтириш мақсадида катта ва замонавий кўринишдаги ушбу бино қурилишини ўтган йили бошлаган эди. Мазкур муҳташам иморатнинг ер ости қисми омборхона вазифасини бажаради. Бинонинг учта қаватида эса турли хилдаги автомобиллар эҳтиёт қисмлари расталарга жойлаштирилган бўлиб, савдо-сотиқ ишлари амалга оширилади.
Тадбирга ташриф буюрганлар Chevrolet автомобилларига ўрнатиладиган GM Genuine эҳтиёт қисмлари сотуви йўлга қўйилган ушбу дўкондаги маҳсулотларнинг нисбатан арзонлигини кўриб, шу ердан харид қилиш ва доимий мижоз бўлиш истагини билдиришди. Бу каби сифати кафолатланган ва ҳамёнбоп нархлардаги маҳсулотлар харидорларни ўзига жалб қилиб, жуда қизиқтирди. Савдо ходимлари ҳар бир эҳтиёт қисм General Motors Engineering томонидан ишлаб чиқилгани, юқори сифатли ҳамда ҳамёнбоплигини айтиб, маҳсулотлар ҳақидаги керакли маълумотларни беришди.
Янги савдо мажмуаси тадбиркор ва харидорлар учун кенг имкониятлар яратибгина қолмасдан, туман иқтисоди юксалишига ҳам хизмат қилади. Бу каби бунёдкорлик, яратувчанлик, ташаббускорликларнинг барчаси одамларнинг ҳаётидан мамнун, жамиятдан рози бўлиб яшашига қаратилгани билан янада қувонарлидир.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
