ДУРУНКИЛИК НУРОНИЙ ОНАХОНЛАР БИЛАН “БИР БОЛАГА ЕТТИ МАҲАЛЛА ҲАМ ОТА, ҲАМ ОНА” ШИОРИ ОСТИДА ДИЛДАН СУҲБАТ ТАДБИРИ ЎТКАЗИЛДИ

Мустақиллик байрами яқинлашгани сари халқимиз ўзгача кайфият ва жўшқинлик билан энг азиз, энг улуғ кунга тараддуд кўришади. Кўчалар ободонлаштирилиб, хонадонлар ажиб файзга тўлади. Ҳатто нуроний онахонлар, отахонлар невараларини ёнларига олиб, қўни-қўшни, маҳалладошлариникига “қутлуғ бўлсин”га чиқишади. Яқинлашаётган байрам шукуҳи ҳар бир кўнгилдан ҳар битта хонадонга кириб боради.

Манғит шаҳрининг Дурунки маҳалласи 300 йиллик тарихга эга, турли миллат вакиллари аҳил-иноқ яшаётган сўлим гўша. Бирининг оғирига бири елка тутиб, қувонч-у ғамини биргаликда баҳам кўришга одатланган дурункиликлар учун маҳалладошларининг тинчлиги, фаровон ва осойишталиги ҳамма нарсадан муҳим. Шу боис, ҳайит ва байрамларда, тўй-маъракаларда қўшни-қўшнининг кўнглини кўтариш, маъракаларида бел боғлаб хизмат қилиш, бирининг боласига бири меҳр кўрсатиш, қисқаси, маҳалладошлар обрўси учун интилиб яшаш дурункиликлар учун азалий қадрият.

Жорий йилнинг 16 август санасида маҳалланинг кайвони ҳожи онахонлари маҳалла хотин-қизлар фаоли Феруза Алламберганова ва Ўзбекистон номидаги кўча бошчиси Омонгул опа Қаюповаларнинг чорлови билан маҳалладаги ибратли хонадон соҳибаси Раънохон опа Тўраева хонадонида жам бўлдилар. Шу куни amunews.uz веб-сайти таҳририятининг “Соғлом муҳит – соғлом ҳаёт” лойиҳаси доирасидаги “Бир болага етти маҳалла ҳам ота, ҳам она” шиори остида нуроний онахонлар суҳбатидан биз ҳам баҳраманд бўлдик.

Дарвоқе, маҳалла онахонлари оила қадриятлари, миллий-маънавий урф-одат ва анъаналарни маҳкам тутишади. Маҳаллада ўзаро келишмовчиликлар, оилавий низо ва беҳуда жанажаллар маҳалла катхудолари орқали бартараф этилгани боис, сўнгги йилларда бу каби салбий ҳолатлар йўқ ҳисоби. Кўча бошчи онахонлар, ҳудудий профилактика инспектори, маҳалла хотин-қизлар фаолининг ҳамкорликдаги саъй-ҳаракатлари туфайли ажрашиш ёқасига келиб қолган иккита оила яраштирилди.

Ёш болаларнинг тунги пайтларда кўчада ёлғиз юришларига дурункилик онахонлар асло йўл қўйишмайди.

“Бир болага етти маҳалла ҳам ота, ҳам она шиори остида ўтказилган бир пиёла чой устидаги самимий давра суҳбатида кўча бошчи онахон – Омонгул Қаюпова, Раънохон Эшимбетова, Розия Шукуруллаева, Фотимахон опа Тожибоева, Гулора момо Худойберганова, Тозагул Дўсчанова, Сафаргул Аметова, Раънохон Тўраева, Зулхумор Ҳайитбоева, Тўлғоной Худойберганова, Гулора Ҳабибуллаевалар оилада фарзанд тарбияси, қайнона ва келин муносабатлари, айниқса, ёш қизларни турмушга тайёрлаш, уларнинг кийиниш маданияти, уй тутиши, сариштали, касб-корли бўлишлари учун шароитлар яратиш борасидаги фикрларини билдирдилар.

Айниқса, нуроний онахонлар оилада эркак кишининг ўрни, унинг фарзандлари олдидаги нечоғлик ҳурмат-эътиборли бўлиши аёл кишига боғлиқлигини ҳаётий мисоллар орқали ифода этдилар.

Давра суҳбати давомида онахонларнинг ақлли ва доно неваралари бувижонлари учун кўк чой дамлаб беришди, одоб сақлаб, онахонлар гурунгларидан бир четга ўтиб, шахмат-шашка ўйнашди, бири-бирларига топишмоқлар айтишиб, ўзлари таътил пайтида ўқиган китоблари юзасидан фикрлашиб олдилар. Омонгул опа Қаюпованинг китобхон невараси Раҳмонбек Кўкланбоев онахонларга шеърлар айтиб берди.

Тадбир давомида журналист Робия Йўлдошева дурункилик нуроний онахонларга оилаларда ижтимоий-маънавий муҳит барқарорлигига салбий таъсир кўрсатувчи ҳолатлар, гиёҳвандлик, эрта никоҳнинг олдини олиш, яқин қариндошлар ўртасидаги никоҳларга йўл қўймаслик, ўсиб келаётган ёш авлодни ёт ғоя ва иллатлардан ҳимоя қилиш, ҳар бир оилада китобхонлик муҳитини яратишдек хайрли ишларга бош-қош бўлаётганлари учун самимий миннатдорчилик билдирди.

“Бир болага етти маҳалла ҳам ота, ҳам она” шиори остида дурункилик онахонлар ва уларнинг неваралари иштирокида amunews.uz веб-сайти таҳририяти ижодий жамоаси ва Дурунки маҳалла фуқаролар йиғини хотин-қизлар фаоли Феруза Алламберганова билан ҳамкорликда ўтказилган давра суҳбати оилаларда соғлом муҳитни қарор топтириш орқали соғлом ва гўзал ҳаётга эришишда муҳим аҳамият касб этиши табиий.

Робия ЙЎЛДОШЕВА.