DURUNKILIK NURONIY ONAXONLAR BILAN “BIR BOLAGA YeTTI MAHALLA HAM OTA, HAM ONA” ShIORI OSTIDA DILDAN SUHBAT TADBIRI OʻTKAZILDI

Mustaqillik bayrami yaqinlashgani sari xalqimiz oʻzgacha kayfiyat va joʻshqinlik bilan eng aziz, eng ulugʻ kunga taraddud koʻrishadi. Koʻchalar obodonlashtirilib, xonadonlar ajib fayzga toʻladi. Hatto nuroniy onaxonlar, otaxonlar nevaralarini yonlariga olib, qoʻni-qoʻshni, mahalladoshlarinikiga “qutlugʻ boʻlsin”ga chiqishadi. Yaqinlashayotgan bayram shukuhi har bir koʻngildan har bitta xonadonga kirib boradi.

Mangʻit shahrining Durunki mahallasi 300 yillik tarixga ega, turli millat vakillari ahil-inoq yashayotgan soʻlim goʻsha. Birining ogʻiriga biri yelka tutib, quvonch-u gʻamini birgalikda baham koʻrishga odatlangan durunkiliklar uchun mahalladoshlarining tinchligi, farovon va osoyishtaligi hamma narsadan muhim. Shu bois, hayit va bayramlarda, toʻy-maʼrakalarda qoʻshni-qoʻshnining koʻnglini koʻtarish, maʼrakalarida bel bogʻlab xizmat qilish, birining bolasiga biri mehr koʻrsatish, qisqasi, mahalladoshlar obroʻsi uchun intilib yashash durunkiliklar uchun azaliy qadriyat.

Joriy yilning 16-avgust sanasida mahallaning kayvoni hoji onaxonlari mahalla xotin-qizlar faoli Feruza Allamberganova va Oʻzbekiston nomidagi koʻcha boshchisi Omongul opa Qayupovalarning chorlovi bilan mahalladagi ibratli xonadon sohibasi Raʼnoxon opa Toʻrayeva xonadonida jam boʻldilar. Shu kuni amunews.uz veb-sayti tahririyatining “Sogʻlom muhit – sogʻlom hayot” loyihasi doirasidagi “Bir bolaga yetti mahalla ham ota, ham ona” shiori ostida nuroniy onaxonlar suhbatidan biz ham bahramand boʻldik.

Darvoqe, mahalla onaxonlari oila qadriyatlari, milliy-maʼnaviy urf-odat va anʼanalarni mahkam tutishadi. Mahallada oʻzaro kelishmovchiliklar, oilaviy nizo va behuda janajallar mahalla katxudolari orqali bartaraf etilgani bois, soʻnggi yillarda bu kabi salbiy holatlar yoʻq hisobi. Koʻcha boshchi onaxonlar, hududiy profilaktika inspektori, mahalla xotin-qizlar faolining hamkorlikdagi saʼy-harakatlari tufayli ajrashish yoqasiga kelib qolgan ikkita oila yarashtirildi.

Yosh bolalarning tungi paytlarda koʻchada yolgʻiz yurishlariga durunkilik onaxonlar aslo yoʻl qoʻyishmaydi.

“Bir bolaga yetti mahalla ham ota, ham ona shiori ostida oʻtkazilgan bir piyola choy ustidagi samimiy davra suhbatida koʻcha boshchi onaxon – Omongul Qayupova, Raʼnoxon Eshimbetova, Roziya Shukurullayeva, Fotimaxon opa Tojiboyeva, Gulora momo Xudoyberganova, Tozagul Doʻschanova, Safargul Ametova, Raʼnoxon Toʻrayeva, Zulxumor Hayitboyeva, Toʻlgʻonoy Xudoyberganova, Gulora Habibullayevalar oilada farzand tarbiyasi, qaynona va kelin munosabatlari, ayniqsa, yosh qizlarni turmushga tayyorlash, ularning kiyinish madaniyati, uy tutishi, sarishtali, kasb-korli boʻlishlari uchun sharoitlar yaratish borasidagi fikrlarini bildirdilar.

Ayniqsa, nuroniy onaxonlar oilada erkak kishining oʻrni, uning farzandlari oldidagi nechogʻlik hurmat-eʼtiborli boʻlishi ayol kishiga bogʻliqligini hayotiy misollar orqali ifoda etdilar.

Davra suhbati davomida onaxonlarning aqlli va dono nevaralari buvijonlari uchun koʻk choy damlab berishdi, odob saqlab, onaxonlar gurunglaridan bir chetga oʻtib, shaxmat-shashka oʻynashdi, biri-birlariga topishmoqlar aytishib, oʻzlari taʼtil paytida oʻqigan kitoblari yuzasidan fikrlashib oldilar. Omongul opa Qayupovaning kitobxon nevarasi Rahmonbek Koʻklanboyev onaxonlarga sheʼrlar aytib berdi.

Tadbir davomida jurnalist Robiya Yoʻldosheva durunkilik nuroniy onaxonlarga oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlar, giyohvandlik, erta nikohning oldini olish, yaqin qarindoshlar oʻrtasidagi nikohlarga yoʻl qoʻymaslik, oʻsib kelayotgan yosh avlodni yot gʻoya va illatlardan himoya qilish, har bir oilada kitobxonlik muhitini yaratishdek xayrli ishlarga bosh-qosh boʻlayotganlari uchun samimiy minnatdorchilik bildirdi.

“Bir bolaga yetti mahalla ham ota, ham ona” shiori ostida durunkilik onaxonlar va ularning nevaralari ishtirokida amunews.uz veb-sayti tahririyati ijodiy jamoasi va Durunki mahalla fuqarolar yigʻini xotin-qizlar faoli Feruza Allamberganova bilan hamkorlikda oʻtkazilgan davra suhbati oilalarda sogʻlom muhitni qaror toptirish orqali sogʻlom va goʻzal hayotga erishishda muhim ahamiyat kasb etishi tabiiy.

Robiya YOʻLDOShEVA.