ТОШ ЁП ОВУЛИДА “СОҒЛОМ МУҲИТ – СОҒЛОМ ҲАЁТ” ГРАНТ ЛОЙИҲАСИ ДОИРАСИДА ДАВРА СУҲБАТИ ЎТКАЗИЛДИ

Тош ёп овулида “www.amunews.uz” веб-сайтининг “Соғлом муҳит – соғлом ҳаёт” грант лойиҳаси режасига мувофиқ Тиббиёт бирлашмаси мутахассис шифокорлари иштирокида давра суҳбати ташкил этилди.

23 август куни фуқаролар йиғини биносида лойиҳа доирасида аҳолига гиёҳвандлик, ичкиликбозлик, кашандалик каби ёмон одатларнинг, яқин қариндошлар ўртасидаги никоҳ ва эрта турмуш қуришнинг салбий оқибатлари тўғрисида тушунчалар бериш мақсадида ўтказилган мазкур тадбирда Амударё телевидениеси ва “Тараққиёт кўзгуси” газетаси таҳририяти ходимлари, туман Тиббиёт бирлашмаси кўп тармоқли марказий поликлиникаси нарколог-шифокори Баҳодир Чоршамов, Саломатлик бўлими шифокори Тамара Саидовалар ҳамда йиғин масъуллари, овул фаоллари иштирок этишди. Тадбирда сўзга чиққан нарколог-шифокор Баҳодир Чоршамов саломатлик кушандаси бўлган гиёҳвандлик ва ичкиликбозлик бор жойда носоғлом муҳит вужудга келиши, унинг таъсирида жиноят ва ҳуқуқбузарликлар содир этилиши мумкинлиги тўғрисида сўзлади.

Тадбирда гиёҳвандлик бугунги кунда бутун дунё жамоатчилигини ташвишга солаётган долзарб муаммолардан бири эканлиги таъкидланди. Шунингдек, гиёҳвандликка оид жиноятчиликнинг ҳуқуқий асослари ҳақида батафсил маълумотлар берилди.

Дарҳақиқат, гиёҳвандлик, ичкиликбозликдек салбий иллатлар нафақат оилаларга, балки жамиятга ҳам катта зарар етказади. Ташвиш ва муаммолар келтириб чиқариш билан бирга, бу зарарли одатга берилган ҳар қандай инсон охир-оқибат мутлақо кераксиз шахсга айланади. Бундай ҳолатларнинг олдини олиш, аҳолининг тиббий маданиятини ошириш ва оилаларда соғлом турмуш тўғрисидаги тушунчаларни шакллантириш мақсадида www.amunews.uz веб-сайтининг “Соғлом муҳит – соғлом ҳаёт” грант лойиҳаси доирасида кенг тарзда учрашув, давра суҳбатлари, мулоқотлар ўтказилмоқда. Шифокорлар ва бошқа мутахассислар жалб қилинган ҳолда ўтказилаётган ушбу тадбирларда аҳолига гиёҳвандлик ва ичкиликбозликнинг жирканч иллат эканлиги, унинг оилага салбий таъсири, носоғлом оилалар ва носоғлом фарзандлар туғилиши манбаи эканлиги батафсил тушунтирилмоқда.

Шифокор Баҳодир Чоршамов оила соғлом бўлсагина унинг барқарорлиги ва ободлиги таъминланиши, аксинча оилада гиёҳвандлик ва ичкиликбозлик ҳукмрон бўлса оиланинг таназзулга юз тутишини аҳолига содда ва тушунарли тарзда, ҳаётий мисолларни келтирган ҳолда тушунтирди. Ундан ташқари, туман Тиббиёт бирлашмаси томонидан ичкиликбозликка берилганларни даволаш, тўғри ҳаёт тарзига қайтариш борасида олиб борилаётган чора-тадбирлар хусусида маълумотлар берди.

Таъкидланганидек, туман Тиббиёт бирлашмасининг кўп тармоқли поликлиникасига қарашли наркология бўлими 1985 йилда ташкил этилган. Бугунги кунда сурункали алкоголизмга чалинганлар 168 нафарни, гиёҳвандликка чалинганлар эса 4 нафарни ташкил қилади. Жорий йилда Марказий шифохонада алкоголизм касаллигига чалинган беморларга ташхис қўйишга мўлжалланган 10 та ўринли реабилитация маркази ташкил этилган бўлиб, шу пайтга қадар ушбу марказга 510 нафар фуқаро қабул қилинган. Шундан 19 нафари Республика Наркология диспансерига 6 ой муддатга даволанишга жўнатилган.

Тадбирда сўзга чиққан Тиббиёт бирлашмасининг саломатлик бўлими шифокори Тамара Саидова ҳам оиланинг мустаҳкамлиги кўпгина омиллар қатори – она, ота ва боланинг саломатлигига боғлиқлигини таъкидлади. Оилада кимдир гиёҳванд ва алкоголь маҳсулотларни истемол қилмаса, яқин қариндошлар ва балоғатга етмаганлар ўртасидаги никоҳ бўлмаса, жисмоний ва ақлий жиҳатдан соғлом фарзанд дунёга келишини тушунтирди. Шу билан бирга никоҳланувчи шахслар ўртасидаги тиббий кўрикнинг келажак авлод учун зарурлиги, касаллик аниқланган ҳолатларда даволаниш курсларини ўтаб, кейин никоҳ тузилиши кераклигини ҳам айтиб ўтди. Шунингдек, хотин-қизлар ва никоҳдан ўтувчи ёшлар орасида соғлом оила қуриш, соғлом ҳаёт кечириш, соғлом турмуш тарзи борасида етарли маълумотлар берди.

“Соғлом муҳит – соғлом ҳаёт” грант лойиҳаси доирасида ўтказилган тадбирда иштирокчиларнинг соғлом турмуш тарзи ҳақидаги тушунчалари кенгайтирилди. Шунингдек, суҳбат мавзуларига доир эслатмалар ва буклетлар ҳам тарқатилди.

О.Худойберганова.