TOSh YoP OVULIDA “SOGʻLOM MUHIT – SOGʻLOM HAYoT” GRANT LOYIHASI DOIRASIDA DAVRA SUHBATI OʻTKAZILDI

Tosh yop ovulida “www.amunews.uz” veb-saytining “Sogʻlom muhit – sogʻlom hayot” grant loyihasi rejasiga muvofiq Tibbiyot birlashmasi mutaxassis shifokorlari ishtirokida davra suhbati tashkil etildi.

23-avgust kuni fuqarolar yigʻini binosida loyiha doirasida aholiga giyohvandlik, ichkilikbozlik, kashandalik kabi yomon odatlarning, yaqin qarindoshlar oʻrtasidagi nikoh va erta turmush qurishning salbiy oqibatlari toʻgʻrisida tushunchalar berish maqsadida oʻtkazilgan mazkur tadbirda Amudaryo televideniyesi va “Taraqqiyot koʻzgusi” gazetasi tahririyati xodimlari, tuman Tibbiyot birlashmasi koʻp tarmoqli markaziy poliklinikasi narkolog-shifokori Bahodir Chorshamov, Salomatlik boʻlimi shifokori Tamara Saidovalar hamda yigʻin masʼullari, ovul faollari ishtirok etishdi. Tadbirda soʻzga chiqqan narkolog-shifokor Bahodir Chorshamov salomatlik kushandasi boʻlgan giyohvandlik va ichkilikbozlik bor joyda nosogʻlom muhit vujudga kelishi, uning taʼsirida jinoyat va huquqbuzarliklar sodir etilishi mumkinligi toʻgʻrisida soʻzladi.

Tadbirda giyohvandlik bugungi kunda butun dunyo jamoatchiligini tashvishga solayotgan dolzarb muammolardan biri ekanligi taʼkidlandi. Shuningdek, giyohvandlikka oid jinoyatchilikning huquqiy asoslari haqida batafsil maʼlumotlar berildi.

Darhaqiqat, giyohvandlik, ichkilikbozlikdek salbiy illatlar nafaqat oilalarga, balki jamiyatga ham katta zarar yetkazadi. Tashvish va muammolar keltirib chiqarish bilan birga, bu zararli odatga berilgan har qanday inson oxir-oqibat mutlaqo keraksiz shaxsga aylanadi. Bunday holatlarning oldini olish, aholining tibbiy madaniyatini oshirish va oilalarda sogʻlom turmush toʻgʻrisidagi tushunchalarni shakllantirish maqsadida www.amunews.uz veb-saytining “Sogʻlom muhit – sogʻlom hayot” grant loyihasi doirasida keng tarzda uchrashuv, davra suhbatlari, muloqotlar oʻtkazilmoqda. Shifokorlar va boshqa mutaxassislar jalb qilingan holda oʻtkazilayotgan ushbu tadbirlarda aholiga giyohvandlik va ichkilikbozlikning jirkanch illat ekanligi, uning oilaga salbiy taʼsiri, nosogʻlom oilalar va nosogʻlom farzandlar tugʻilishi manbai ekanligi batafsil tushuntirilmoqda.

Shifokor Bahodir Chorshamov oila sogʻlom boʻlsagina uning barqarorligi va obodligi taʼminlanishi, aksincha oilada giyohvandlik va ichkilikbozlik hukmron boʻlsa oilaning tanazzulga yuz tutishini aholiga sodda va tushunarli tarzda, hayotiy misollarni keltirgan holda tushuntirdi. Undan tashqari, tuman Tibbiyot birlashmasi tomonidan ichkilikbozlikka berilganlarni davolash, toʻgʻri hayot tarziga qaytarish borasida olib borilayotgan chora-tadbirlar xususida maʼlumotlar berdi.

Taʼkidlanganidek, tuman Tibbiyot birlashmasining koʻp tarmoqli poliklinikasiga qarashli narkologiya boʻlimi 1985-yilda tashkil etilgan. Bugungi kunda surunkali alkogolizmga chalinganlar 168 nafarni, giyohvandlikka chalinganlar esa 4 nafarni tashkil qiladi. Joriy yilda Markaziy shifoxonada alkogolizm kasalligiga chalingan bemorlarga tashxis qoʻyishga moʻljallangan 10 ta oʻrinli reabilitatsiya markazi tashkil etilgan boʻlib, shu paytga qadar ushbu markazga 510 nafar fuqaro qabul qilingan. Shundan 19 nafari Respublika Narkologiya dispanseriga 6 oy muddatga davolanishga joʻnatilgan.

Tadbirda soʻzga chiqqan Tibbiyot birlashmasining salomatlik boʻlimi shifokori Tamara Saidova ham oilaning mustahkamligi koʻpgina omillar qatori – ona, ota va bolaning salomatligiga bogʻliqligini taʼkidladi. Oilada kimdir giyohvand va alkogol mahsulotlarni istemol qilmasa, yaqin qarindoshlar va balogʻatga yetmaganlar oʻrtasidagi nikoh boʻlmasa, jismoniy va aqliy jihatdan sogʻlom farzand dunyoga kelishini tushuntirdi. Shu bilan birga nikohlanuvchi shaxslar oʻrtasidagi tibbiy koʻrikning kelajak avlod uchun zarurligi, kasallik aniqlangan holatlarda davolanish kurslarini oʻtab, keyin nikoh tuzilishi kerakligini ham aytib oʻtdi. Shuningdek, xotin-qizlar va nikohdan oʻtuvchi yoshlar orasida sogʻlom oila qurish, sogʻlom hayot kechirish, sogʻlom turmush tarzi borasida yetarli maʼlumotlar berdi.

“Sogʻlom muhit – sogʻlom hayot” grant loyihasi doirasida oʻtkazilgan tadbirda ishtirokchilarning sogʻlom turmush tarzi haqidagi tushunchalari kengaytirildi. Shuningdek, suhbat mavzulariga doir eslatmalar va bukletlar ham tarqatildi.

O.Xudoyberganova.