ИСТИҚЛОЛ БАЙРАМИ АРАФАСИДА ТУМАНИМИЗ ҲУДУДИ ОБОДОНЛАШТИРИЛИБ, БАЙРАМОНА БЕЗАТИЛМОҚДА

Ободлик, саранжом-саришталик билан элимиз янада файзли, кўркам бўлади. Амударё туманида ҳам халқимизнинг асрий анъаналаридан ҳисобланган байрам ва шодиёналар олдидан ҳашар ва ободонлаштириш ишларини ўтказиш анъанага айланган.

Туманимизда Ободонлаштириш бошқармаси томонидан ободонлаштириш ва кўкаламзорлаштириш ишлари тизимли тартибда йўлга қўйилган. Бошқарманинг жонкуяр ходимлари Мустақиллигимизнинг 32 йиллиги яқинлашаётган айни кунларда энг улуғ, энг азиз байрамимизни муносиб кутиб олиш мақсадида тайёргарлик ишларини қизғин олиб боришмоқда.

Ўтган давр мобайнида Бошқарма ходимлари томонидан шаҳар марказий кўчалари, Қипчоқ, Баркамол авлод, Қиличбой, Гурлан кўчаларидаги катта йўл бўйларига арча кўчатлари, гуллар ҳамда манзарали дарахтлар ўтқазилиб, парвариш қилиб келинмоқда. Бу каби кўкаламзорлаштириш ишлари давом эттирилиб, белгиланган ҳудудларда боғ барпо этиш ишлари олиб борилмоқда. Бундан ташқари, жамоат ишлари учун бириктирилган ишчилар Янгиобод, Фаровон, Гулзор, Бойовул маҳаллалари ҳудудининг марказий кўчаларида ва бошқа ҳудудлардаги кўчаларда, шунингдек, қабристонларда ҳам ободонлаштириш ишларини амалга оширишмоқда.

Ҳудудларда амалга оширилаётган ободонлаштириш ва кўкаламзорлаштириш ишларига бошқармадан 100 нафар ишчи-ходимлар, шунингдек, иш самарадорлигини ошириш мақсадида 15 та техникалар бириктирилган. Улар манзарали дарахтлар ва гул кўчатларини парвариш қилиш, бошқарма балансида бўлган пиёдалар йўлакчаларининг тозалигини таъминлаш, Манғит шаҳри ҳудудидаги ички ирригация тармоқларини тозалаш, туман ҳудудидаги тунги кўча ёритиш чироқларининг доимий ишлашини таъминлаш каби ишларни бажаришмоқда.

Шу билан бирга, овул ва маҳаллалар ҳудудларидаги ички кўча йўлларини таъмирлаш ишлари ташкил этилиб, аҳоли томорқаларига оқар сув етказиб бериш мақсадида ариқ қазиш ишлари амалга оширилмоқда. Қолаверса, ҳудудлардаги ижтимоий ҳимояга муҳтож, кам таъминланган оилаларнинг турар жойларини ҳам таъмирлаш ишлари ташкил этилмоқда.

Шу кунларда туман Ободонлаштириш бошқармасининг 30 нафар ишчи-ходимлари ва 20 нафар жамоат ишларига бириктирилган ишчилар истиқлол байрамини муносиб кутиб олиш ва нишонлаш мақсадида байрам бўлиб ўтадиган Дўстлик маҳалласидаги Марказий ўйингоҳ ҳудудидаги манзарали буталар ва гулзорларни, дарахтларни тартибга келтиришмоқда, ариқ ва зовурларни чим ва бегона ўтлардан тозалашмоқда.

Ундан ташқари, туман аҳолиси кечки сайрга чиққан пайтида байрам шукуҳини ҳис қилишлари учун марказий кўчалар ранг-баранг чироқлар билан байрамона безатилиб, байроқчалар ўрнатилди. Оқшом пайтларида йўл четларидаги Ўзбекистон ва Қорақалпоғистон байроқлари, турфа хилдаги гуллар кўринишида ёғду сочаётган чироқлар атроф-муҳитга янада кўркамлик бахш этиб, юртдошларимизга байрамона кайфият улашмоқда.

Бугун мамлакатимизнинг қай гўшасига, қай манзилига борманг, Ватанни янада обод этиш истагида яшаётган юртдошларимизнинг эзгу ишларига гувоҳ бўлишингиз мумкин. Мустақил диёримизнинг бугунги жамоли, кўрки кишини ҳайратга соладиган даражада ўзгариб, гўзаллашиб ва ободонлашиб бормоқда.

О.Худойберганова.