ФЕРМЕР ХЎЖАЛИКЛАРИ ДАЛАЛАРИДА ПАХТА ЙИҒИМ-ТЕРИМИ ҚИЗҒИН ДАВОМ ЭТМОҚДА

Мамлакатимизнинг барча ҳудудларидаги каби шу кунларда туманимизда ҳам пахта йиғим-терим ишлари қизғин тусга кирган. Теримчилар эрта кўкламдан то шу кунга қадар бўлган давр мобайнидаги машаққатли меҳнат эвазига етиштирилган мўл ҳосилни об-ҳаво очиқлигидан унумли фойдаланган ҳолда қисқа муддатларда сифатли йиғиб-териб олишга ҳаракат қилишмоқда.

Жорий йилда тумандаги “Amudaryotex” хорижий корхонаси пахта-тўқимачилик кластери билан шартнома тузган 348 та фермер хўжаликларида 13 минг 900 гектар майдонга чигит экилган эди. Замонавий сеялкалар ёрдамида ерга қадалган чигитлар бир текис униб чиқишига эришилди. Ёз ойларида агротехник тадбирлар ўз вақтида бажарилгани натижасида далаларда мўл ҳосил тўпланди. Режага кўра, бу йилги мавсумда 44 минг 650 тонналик сарбаланд пахта хирмонини бунёд этиш мақсад қилинган бўлиб, терим ишлари қизғин давом этмоқда.

Қиличбой овулидаги Қаҳрамон Сапарбоев раҳбарлик қилаётган “Сапарбоев Қаҳрамон” фермер хўжалигида ҳам эрта баҳорда  50 гектар майдонга чигит қадалди. Хўжаликнинг 22 нафар пудратчиси, тажрибали деҳқонлари ҳамжиҳатликда фидокорона меҳнат қилиб, мўл ҳосил тўплашга эришишди. Мавсум бошидан йиғим-терим ишларига 55 нафардан ортиқ теримчилар жалб қилинди. Биринчилардан бўлиб пахта йиғим-теримига киришилган хўжаликда 100 тонна пахта топшириш режа қилинган бўлиб, шу пайтга қадар 65 тонна ҳосил йиғиштириб олинди.

Торёп маҳалласидаги Қўшмурод Жуматов раҳбарлик қилаётган “Кўклан Аноргул” фермер хўжалигида 74 гектар ерда мўл ҳосил етиштирилган бўлса, пахта майдонларидан биринчи теримнинг ўзидаёқ 100 нафарга яқин теримчилар ёрдамида 80 тонна пахта ҳосили йиғиб олинди. Бу йил ўртача ҳосилдорлик гектарига 20 центнерни ташкил қилди. Далалардаги ҳосил чўғини ҳисобга олган фермер хўжалиги деҳқонлари ҳосилдорликни 25-30 центнерга етказиш учун астойдил меҳнат қилмоқдалар. Хўжалик пахтакорлари ҳар бири кунига 180-200 кг.гача пахта теришмоқда.

Барча хўжаликларда теримчиларга дала бошида бепул тушлик қилиб берилмоқда. Ўз вақтида берилаётган иссиқ тушлик теримчиларнинг ғайратига ғайрат қўшмоқда. Илғорларнинг фермер хўжалиги томонидан алоҳида рағбатлантирилаётгани ҳам терим суръатини янада оширмоқда.

Пахта далаларида терим ишлари авж паллага кирган. Қабул масканларидаги хирмонлар кўкка бўй чўзмоқда. Янада юксак хирмон барпо этиш мақсадида пахта теримини жадаллаштираётган фермер хўжаликлари сони ҳам кундан кунга ортиб бормоқда.

О.Худойберганова