МАС-РEСТЛИНГ СПОРТ ТУРИ БЎЙИЧА 12-СОНЛИ МАКТАБДА МАҲОРАТ ДАРСИ БЎЛИБ ЎТДИ

Сўнгги йилларда мамлакатимизда жисмоний тарбия ва спортни ривожлантириш, спортга оммавий жалб қилиш орқали ёшларнинг саломатлигини мустаҳкамлаш, иқтидор ва салоҳиятини юзага чиқаришга доимий равишда эътибор қаратилиб келинмоқда.

Аҳоли ўртасида айниқса, мактаб ўқувчилари ўртасида жисмоний тарбия ва оммавий спортни кенг тарғиб қилиш борасида кўпгина чора-тадбирлар амалга оширилмоқда. Маҳаллаларда, кўп қаватли уйлар атрофида “Саломатлик йўлаклари”, мактабларда, маҳаллаларда спорт майдончалари қурилиб, тўгараклар фаолияти йўлга қўйилмоқда.

27 сентябрь куни туманимиздаги 12-сонли умумтаълим мактабининг замонавий спорт залида янгидан фаолиятини бошлаган мас-рестлинг тўгараги аъзолари учун ушбу спорт тури усталари маҳорат дарси ўтказишди.

Маҳорат дарсларида Ўзбекистон бодибилдинг, фитнесс ва мас-рестлинг Федерацияси бош котиби ҳамда Осиё мас-рестлинг Федерацияси бош котиби Фарҳод Маткаримов, мас-рестлинг спорт тури бўйича Ўзбекистон бош мураббийи Илёс Қодиров, ушбу спорт тури бўйича бир неча бор Ўзбекистон чемпиони, жаҳон чемпионати совриндорлари, Осиё чемпионати ғолиблари ҳамда халқаро тоифадаги спорт усталари, мактаб раҳбарлари, ўқитувчилари, ўқувчилар ва уларнинг ота-оналари иштирок этдилар.

Тадбирни мактаб директори Маҳмуд Қутлимурадов очиб берди.

Ўзбекистон бодибилдинг, фитнесс ва мас-рестлинг Федерацияси бош котиби ҳамда Осиё мас-рестлинг Федерацияси бош котиби Фарҳод Маткаримов сўзга чиқиб, бугунги кунда мамлакатимизда ёшларнинг спорт билан шуғулланишлари учун яратиб берилаётган имкониятлар, чекка ҳудудларда янгидан қад ростлаётган спорт иншоотлари ва натижада спортнинг тобора оммалашаётгани ҳақида айтиб ўтди.

Мас-рестлинг спорт тури бўйича бош мураббий Илёс Қодиров сўзга чиқиб, навқирон авлодни жисмонан соғлом, маънан етук ҳамда замонавий билим ва касб-ҳунар сирларини пухта ўзлаштирган мутахассислар этиб тарбиялаш, таълим масканларининг моддий-техник базасини янада мустаҳкамлаш Президентимиз раҳнамолигида таълим тизимида амалга оширилаётган кенг кўламли ислоҳотларнинг устувор йўналишидан бири эканлигини айтиб ўтди. Ушбу ҳудуд ёшларининг спортга қизиқишлари инобатга олинган ҳолда мактабда ўз фаолиятини бошлаган мас-рестлинг тўгараги аъзоларининг қисқа муддатда ўйин техникаларини яхши ўзлаштирганига алоҳида эътибор қаратилди.

Шундан сўнг тўгарак аъзолари учун спорт усталари маҳорат дарсини ўтказишди. Машғулотлар давомида ҳар бир иштирокчи ушбу спорт тури бўйича кўпроқ билим ва малакага эга бўлишга ҳаракат қилиб, берилган топшириқларни бехато бажаришга интилдилар. Ёшлар ўртасида мас-рестлинг спорт турига бўлган қизиқишларини орттириш ҳамда тарғиб қилиш мақсадида ташкил этилган машғулотларда 30 нафар ўқувчи ёшлар шуғулланиб келмоқда.

Маҳорат дарсидан кейин иштирокчиларнинг ушбу спорт тури бўйича кучларини ва эпчилликларини синовдан ўтказиш мақсадида махсус мусобақа ташкил этилди.

Мусобақада маҳалладаги ҳоким ёрдамчиси Шаҳзод Каримов ҳамда мактаб директори ҳомийлигида ғолиб иштирокчилар қимматбаҳо совға ҳамда дипломлар билан тақдирландилар.

Туман ҳокимлиги Ахборот хизмати