Экинларни тўқсонбости усулида экиш бўйича ҳудудий семинарлар ўтказилди

Аҳолининг эртаки сабзавот маҳсулотларига бўлган талабини тўлиқ қондириш мақсадида ҳосилдан бўшаган майдонларга совуққа чидамли пиёз ва саримсоқпиёз каби экинларни тўқсонбости усулида экиш ишлари қизғин суръатларда олиб борилмоқда.

15 октябрь куни Амударё туманининг Қиличбой овули ҳудудида фаолият юритувчи “Амирхон” фермер хўжалигида пиёз, саримсоқпиёз экинларини тўқсонбости усулида экиш бўйича семинар бўлиб ўтди.

Деҳқончиликнинг тўқсонбости усули яхшигина даромад манбаи ҳисобланади. Бу усулда қишнинг тўқсон куни назарда тутилган бўлиб, қиш ва баҳор ойларида ҳам бозорларимиз тўкин-сочин, нарх-наво барқарор бўлишида қўл келади. Халқимизда “Тўқсонда суғорсанг, тўқсон ботмон ҳосил оласан”, деган нақл бежизга айтилмаган. Кузда экилиб, қор остида қолдирилган сабзавот экинлари уруғлари эрта кўкламда ердан жуда барвақт униб чиқиб, тез ривожланиши ҳисобига эрта ҳосил беради.

Семинарда Ўзбекистон Республикаси Қишлоқ хўжалиги вазирининг биринчи ўринбосари Ботир Тоғаев, Президент Администрацияси ишчи гуруҳ аъзоси Сунатилло Собиров, туман ҳокимининг Қишлоқ ва сув хўжалиги масалалари бўйича ўринбосари Анвар Йўлдошев ҳамда фермер хўжаликлари раҳбарлари, маҳалла ва овул фуқаролар йиғинлари раислари қатнашдилар.

Семинарда 2024 йил ҳосили учун фермер ва деҳқон хўжаликларида пиёз ва саримсоқпиёз экинларини тўқсонбости усулида экишнинг ўзига хос жиҳатлари, бу борада эътибор қаратиш лозим бўлган агротехник талаблар ҳақида ҳамда дала четига узум, тут ниҳолларини ўтқазиш бўйича тушунчалар берилди.

Тўқсонбости усулида етиштирилган сабзавотларнинг эрта баҳорда бозори чаққон бўлиши ҳеч кимга сир эмас. Ушбу масалага ҳукуматимиз томонидан ҳам алоҳида эътибор қаратилиб, аҳолининг соғлом овқатланиши, халқимиз дастурхони йил давомида ҳар хил сабзавот маҳсулотлари билан таъминланиши бугунги куннинг долзарб масаласи сифатида эътироф этилмоқда. Бу борада Амударё туманида ҳам қизғин ишлар олиб борилмоқда.

Айтиш жоизки, кейинги йилларда республикада туманларнинг ихтисослашуви, минтақаларнинг тупроқ-иқлим шароитлари ва сув билан таъминланиши ҳамда бошқа омилларни эътиборга олган ҳолда қишлоқ хўжалиги экинларини оқилона жойлаштиришга алоҳида эътибор бериб келинмоқда. Шундан келиб чиққан ҳолда бу йил туман бўйича жами 1777 гектар майдонга пиёз, саримсоқпиёз каби экинларни тўқсонбости усулида экиш режалаштирилган.

Оқ олтин, Холимбег, Қиличбой, Дўрман овулларида бу борада ишлар яхши ташкил этилиб, ҳудудлардаги меҳнаткаш фермер, деҳқон хўжалиги раҳбарлари ва томорқа ер эгалари ҳар қарич ердан самарали фойдаланишмоқда.

Хусусан, Оқолтин овули ҳудудида 44,9 гектар ерга тўқсонбости усулида экинлар экиш режалаштирилган. Ҳозирда 38,2 гектар ердаги экиш ишлари якунланди.

Экинларни тўқсонбости усулида экиш фермер ва деҳқонларга даромад келтириши билан бирга, бозорларимизда нарх-наво барқарорлигини таъминлашда ҳам муҳим аҳамият касб этади. Шуларни инобатга олган ҳолда амударёлик деҳқон ва фермерлар ҳамда томорқачилар кузнинг илиқ кунларидан фойдаланган ҳолда экиш ишларини қисқа фурсатларда якунлаш учун барча чораларни ишга солишмоқда.

Туман ҳокимлиги Ахборот хизмати