ҲАМЖИҲАТЛИКДА, ФИДОЙИЛИК БИЛАН ХИЗМАТ ҚИЛАМИЗ

Мамлакатимизда иқтисодий ўсишнинг барқарор юқори суръатларини, иқтисодиёт ва ижтимоий соҳанинг молиявий мутаносиблигини таъминлашда, давлатнинг ижтимоий мажбуриятларини тўлиқ ва ўз вақтида бажаришида, йирик инвестиция лойиҳаларини молиялаштириш ва мамлакатнинг мудофаа қобилиятини мустаҳкамлашда молия органларининг ролини оширишга йўналтирилган ягона давлат солиқ-бюджет сиёсати амалга оширилмоқда.

Туман молия бўлими шу асосда мавжуд резервларни мобилизация қилиш бўйича ҳар куни ўтказиладиган мониторингни ҳисобга олган ҳолда бюджетни ижро этишга, шунингдек, Ўзбекистон Республикаси Президенти томонидан тасдиқланган Давлат дастурларини барқарор молиялаштиришнинг муҳим омили сифатида маҳаллий бюджет даромадлар базасини кенгайтиришга йўналтирилган чораларни амалга оширмоқда. Саъй-ҳаракатларимиз натижасида туман маҳаллий бюджетининг даромадлар қисми ижроси жорий йилнинг тўққиз ойи давомида ортиғи билан, яъни 118,8 фоизга адо этилди. Бу режага нисбатан 10 млрд. 472 млн. 826 минг сўмга кўпдир. Ўтган 9 ой давомида бюджет харажатлари режаси киритилган ўзгаришлардан кейин жами 277 млрд. 419 млн. сўмдан ортиқни ташкил этмоқда.  Бюджет маблағлари харажатлари ҳисобидан жами 250 млрд. 898 млн. 95,6 минг сўм сарфланди. Буни соҳалар кесимида айтадиган бўлсак, қишлоқ хўжалиги ва ободонлаштириш соҳасига жами 18 млрд. 459 млн. сўмдан зиёд маблағ сарфланган. Бу жами бюджет харажатлари ҳажмининг 7,3 фоизини ташкил қилади. Жами бюджет харажатлари ҳажмининг 7,3 фоизи мактабгача таълим, 4,2 фоизи таълим, 2,2 фоизи маданият ва спорт соҳасига, 29,7 фоизи соғлиқни сақлаш, 33,5 фоизи ижтимоий таъминот, 6,9 фоизи бошқарув органлари соҳасига, 1,2 фоизи ўзини-ўзи бошқариш органлари соҳасига йўналтирилди. Ижтимоий қўллаб-қувватлаш жамғармаси, ёшлар ва аёллар дафтарлари харажатларига жами 1 млрд. 690 млн. сўм сарфланди. Шунингдек, заҳира жамғармаси маблағлари учун 1 млрд. 230 млн. 76 минг 22 сўм, бошқа харажатларга эса 967 млн. 809 минг сўм ажратилди.

“Фуқаролар ташаббусли жамғармаси”га жорий йил учун тасдиқланган харажатлар сметасида жами 12 млрд. 39 млн. 432 минг сўм режалаштирилган бўлиб, шундан фуқаролар бюджети жорий йилдаги биринчи мавсуми учун кўзда тутилган маблағларнинг, яъни 6 млрд. 19 млн. 716 минг сўми, шунингдек, жорий йил бошига “Фуқаролар ташаббусли жамғармаси”даги қолдиқ маблағлардан 1 млрд. 487 млн. 737 минг 3 сўм, 2022 йил якунлари бўйича шаклланган эркин қолдиқ маблағларининг камида 30 фоиз қисми ҳисобидан 44 млн. сўм, 2022 йил 2-мавсумида ўтказилган ташаббусли бюджет жараёни якунларига кўра, ишларни амалга ошириш учун ҳисоб рақамларга ажратилган маблағларнинг тадбирлар тўлиқ амалга оширилиши натижасида иқтисод қилинган қисмини жамғармага қайта тиклаш ҳисобига 283 млн. 766 минг 3 сўм, Қорақалпоғистон Республикаси бюджети қўшимча маблағларининг 30 фоизи миқдоридан 1 млрд. 335 млн. сўм, жами 9 млрд. 170 млн. 219 сўм маблағлар йўналтирилди. Иккинчи мавсуми учун эса “Фуқаролар ташаббуси жамғармаси”га барча йўналишлардан жами 9 млрд. 291 млн. 700 минг сўм маблағлар йўналтирилди. Ажратилган ушбу маблағлар туманимизда истиқомат қилувчи фуқаролар ҳаёти сифатини оширишга, ҳудудлардаги муаммоларни тезкор ҳал этишга сарфланади.

Туман молия бўлими ходимлари мамлакатимиз Президенти Фармон ва Қарорларини ҳаётга татбиқ этишда, туман маҳаллий бюджет даромадлар қисмининг шаклланиши ва мақсадли сарфланиши йўлида ғазначилик, Бюджетдан ташқари пенсия жамғармаси туман бўлимлари масъул ходимлари билан биргаликда  фидойилик  билан хизмат қилаверади.

Жавлон ЖУМАМУРАТОВ,

туман Молия бўлими бошлиғи.