АМУДАРЁ ТЕЛЕВИДЕНИЕСИ ВА АХБОРОТ-КУТУБХОНА МАРКАЗИ ХОДИМЛАРИ ҲАМКОРЛИГИДА INFOLIB – ЎЗБЕКИСТОН-23 ҲАФТАЛИГИ ДОИРАСИДА КУТУБХОНАГА САЁҲАТ УЮШТИРИЛДИ

Мамлакатимизда 23-27 октябрь кунлари Infolib Ўзбекистон – 2023  XII миллий Ахборот-кутубхона ҳафталиги ҳақиқий китобсеварлик, ижодкорлик байрами сифатида кенг нишонланмоқда. Ҳафталик доирасида илмий-амалий анжуманлар, замонавий Ахборот-кутубхона хизматларини йўлга қўйиш борасидаги инновацион лойиҳалар тақдимотлари, кутубхоначиларда ёш кутубхоналар учун компьютер технологияларидан самарали фойдаланиш бўйича семинар ўқув-машғулотлари, таниқли ёзувчилар, шоирларнинг янги асарлари тақдимотига бағишланган адабий учрашувлар, ижодкорлар билан дилдан суҳбат тадбирлари, ёш китобхонларнинг Ахборот-кутубхона марказларига саёҳатлари ташкил этилиб, бу тадбирларга кўплаб китобхон ёшлар қамраб олинмоқда.

Жорий йилнинг 25 октябрь санасида Амударё туман Ахборот-кутубхона марказида Infolib Ўзбекистон – 2023 XII миллий Ахборот-кутубхона ҳафталиги доирасида ёш кутубхоначилар III форуми ўтказилди. Амударё телевидениесининг “Юксак маънавиятли ва ахлоқли ёшлар – келажак пойдевори” грант-лойиҳаси ижодкорларидан бири, Қорақалпоғистон Республикасида хизмат кўрсатган журналист, Ўзбекистон Ёзувчилар уюшмаси аъзоси, шоира Робия Йўлдошева билан ҳамкорликда мазкур ҳафталик доирасида ташкил этилган тадбирда Ахборот-кутубхона Маркази ходимлари, китобхон ёшлар, “Жайхун илҳомлари” ННТ аъзоси шоира Зуҳра Аҳмедова ҳамда 55-сонли мактаб ўқувчилари иштирок этдилар.

Тадбирни Ахборот-кутубхона маркази ходими Роҳатой Романова очди ва Ўзбекистон Infolib Ўзбекистон – 2023 миллий Ахборот-кутубхона ҳафталиги Ёш кутубхоначилар III форуми Амударё телевидениесининг “Юксак маънавиятли ва ахлоқли ёшлар – келажак пойдевори” грант-лойиҳаси ижодкорлари билан ҳамкорликда ўтказилаётгани жуда катта рамзий маънога эга эканлигини алоҳида эътироф этди.

Шундан сўнг, “Юксак маънавиятли ва ахлоқли ёшлар - келажак пойдевори” грант лойиҳаси координатори Робия Йўлдошева ҳамкорликда ташкил этилган мазкур маънавий-маърифий тадбирнинг ёшлар ҳаётида тутган ўрни ва аҳамияти хусусида фикр юритиб, таълим-тарбия соҳасининг бош манбаи – илм эканлигини, илм эса китоблар орқали эгалланишини таъкидлади. Тадбир иштирокчиларига китоб ўқишнинг беқиёс катта аҳамиятини ўзбек халқининг буюк қомусий олимлари ҳаёти ва фаолиятлари мисолида таъсирчан ҳикоялар орқали сўзлаб берди.

Тадбир давомида “Жайхун илҳомлари” ННТ аъзоси, бири-биридан қизиқарли, ҳаётий ҳикоялар, гўзал шеърлар муаллифи Зуҳра Аҳмедова китобхон ёшлар ва ёш кутубхоначиларга ўзининг ижод майдонига кириб келишида китобнинг ўрни катта аҳамият касб этганини фахрланиб эътироф этди ва янги шеърларидан ўқиб берди. Тадбир давомида ўқувчи-ёшлар кутубхоначи опалари ҳамроҳлигида Ахборот-кутубхона китоб жавонлари бўйлаб саёҳат қилдилар. Саёҳат жараёнида “Юксак маънавиятли ва ахлоқли ёшлар – келажак пойдевори” грант лойиҳаси координатори Робия Йўлдошева, “Жайхун илҳомлари” ННТ аъзоси, шоира Зуҳра Аҳмедова ҳамда Ахборот-кутубхона маркази ходимлари китобхон ўқувчиларга бадиий асарларни танлашда яқиндан ёрдам бердилар. Китобхон ёшлар китоблар оламига саёҳат ҳамда шоира Робия Йўлдошева билан учрашувдан олам-олам завқ олдилар ва “Жайхун илҳомлари” ННТ аъзоси Зуҳра Аҳмедова билан дилдан суҳбатлашдилар.

Infolib Ўзбекистон – 2023 XII миллий Ахборот-кутубхона ҳафталиги Ёш кутубхоначилар III форуми ташкилотчилари – Амударё туман Ахборот-кутубхона маркази ходимлари ва Амударё телевидениесининг “Юксак маънавиятли ва ахлоқли ёшлар – келажак пойдевори” грант лойиҳаси ижодкорлари ҳамкорлигидаги кутубхонага саёҳат ва шоира Робия Йўлдошева билан ижодий учрашув тадбири ёшлар маънавиятини юксалтириш, уларни китобхонликка даъват этиш, ижодга мойил ёшлар иқтидорини ривожлантириш, шунингдек, ёш кутубхоначилар салоҳиятини ошириш орқали ёш авлод вакилларининг китоб мутолаасига бўлган қизиқиш ва интилишларини рағбатлантиришга қаратилгани билан муҳим аҳамият касб этди.

Муяссар ХАЛИЛЛАЕВА.