“ЯНГИ ЎЗБЕКИСТОН АРМИЯСИ – МАМЛАКАТ ҚУДРАТИ, ЮКСАК ҒУРУР ВА САДОҚАТ ТИМСОЛИДИР” ШИОРИ ОСТИДА ЎТКАЗИЛГАН ТАДБИР ЁШЛАРГА КЎТАРИНКИ РУҲ БАҒИШЛАДИ

Юртимизда ёшларда ватанпарварлик туйғуларини шакллантириш, уларни она Ватанга садоқат руҳида тарбиялаш, аҳолига мудофаа тизимида амалга оширилаётган ислоҳотларни етказиш, Қуролли Кучларнинг салоҳиятини намойиш этиш мақсадида ватанпарварлик ойлиги доирасидаги тадбирлар ўтказилмоқда. Президентимизнинг 2023 йил 14 декабрь кунги Фармойишига асосан Амударё тумани Мудофаа ишлари бўлими томонидан ҳам ватанпарварлик ойлиги доирасида Қуролли Кучлари ташкил этилганининг 32 йиллиги ҳамда Ватан ҳимоячилари куни байрами муносабати билан “Янги Ўзбекистон Армияси – мамлакат қудрати, юксак ғурур ва садоқат тимсолидир” шиори остида тадбирлар ташкил этилмоқда.

2023 йил 22 декабрь куни 16-сонли умумтаълим мактабида шу муносабат билан бўлиб ўтган навбатдаги тадбирда туманимиздаги Давлат хавфсизлик хизмати чегара қўшинларига қарашли ҳарбий қисм командирининг тарбиявий ва мафкуравий ишлар бўйича ўринбосари, кичик сержант Шерзод Атаев, Мудофаа ишлари бўлими бошлиғининг тарбиявий ва мафкуравий ишлар бўйича ўринбосари Зокир Саъдуллаев, Мудофаа вазирлиги фахрийси Даврон Болтабоевлар иштирок этишди. Шунингдек, мактаб ўқитувчилари, 9-11-синфлардаги “Ватан таянчи” отряди аъзолари қатнашдилар.

Тадбирда туманимиздаги Давлат хавфсизлик хизмати чегара қўшинларига қарашли ҳарбий қисм командирининг тарбиявий ва мафкуравий ишлар бўйича ўринбосари, кичик сержант Шерзод Атаев сўзга чиқиб, Президентимизнинг 2023 йил 14 декабрь кунги Фармойишига асосан ватанпарварлик ойлиги ўтказилаётгани, ойлик доирасида ўтказилаётган тадбирлар ёшлар қалбида Ватанга муҳаббат, юртга садоқат туйғуларини мустаҳкамлаётганини айтиб ўтди. Ҳарбий хизматчи Қуролли Кучлар тизимида амалга оширилаётган ислоҳотлар, юрт ва халқ хавфсизлигини қўриқлаш йўлида мардларча хизмат қилаётган қаҳрамонлар, Ватан тинчлиги ва осойишталиги йўлида жон фидо қилганлар ҳақида ҳам сўзлаб берди.

Шерзод Атаев Ватан ҳимоячилари кунини муносиб кутиб олиш ва уни умумхалқ байрами сифатида кенг нишонлаш жараёнида ўтказилаётган ватанпарварлик ойлиги халқ ва армия якдиллигини янада мустаҳкамлаб, ёшларни ватанпарварлик руҳида тарбиялаш ва жаҳонда Миллий армиямиз нуфузини янада оширишга хизмат қилаётгани билан янада аҳамиятли бўлаётганини алоҳида эътироф этди.

Тадбир давомида ҳарбийликка қизиқувчи мактаб ўқувчилари учун физика-математика, география ва тарих фанларини ўрганиш зарурлиги, бу фанлардан олган билимларидан ҳарбийликда муҳим аҳамият касб этиши тушунтирилди. Ўқувчи-ёшлар ҳарбийлик йўналишидаги олий ўқув юртларига қизиқиш билдирганлиги сабабли, уларни олий таълим даргоҳларига қабул қилиш шартлари, абитуриентлар томонидан топшириладиган синовлар ва умуман, ҳарбий хизматчиларга бериладиган имтиёзлар ҳақида кўплаб саволлар бериб, керакли маълумотларга эга бўлишди. Ўқувчилар ҳам ўз навбатида, меҳмонларга мактаб ва спортдаги муваффақиятлари, ўқиган севимли китоблари ва севимли машғулотлари ҳақида сўзлаб беришди.

Ўқувчи-ёшлар туманимиздаги Давлат хавфсизлик хизмати чегара қўшинларига қарашли ҳарбий қисм аскарлари томонидан намойиш этилган кўргазмада ҳарбий техникалар ва қурол-аслаҳалар билан танишишди. Ҳарбий аскарлар уларга ушбу техникалар ва қурол-аслаҳалар, уларнинг қандай мақсадларда ишлатилиши тўғрисида батафсил маълумотлар, тушунчалар беришди. Тадбирда “Ватан таянчи” отряди аъзоларига кўкрак нишонлари ҳам топширилди.

Кўтаринки руҳда ўтган мазкур тадбир ёшлар қалбидаги ватанпарварлик ҳиссини ошириб, юртга садоқат туйғусини янада мустаҳкамлади.

О.Худойберганова.