ЮҚОРИ ҚИШЛОҚДАГИ ИЛҒОР МАКТАБДА БАРКАМОЛ АВЛОД УЛҒАЙМОҚДА

Ёш авлодни маънавий етук, комил инсонлар этиб тарбиялашда мактабларнинг ўрни катта. Мактаб ёшларга билим асосларини сингдиради, болаликдан илму дунёқараши шаклланишида асосий пойдевор бўлиб хизмат қилади. Таълим даргоҳи ёшлар учун нафақат билим маскани, балки тарбия ўчоғи ҳамдир. Ўсиб келаётган ёш авлодни миллий-маънавий қадриятларга ҳурмат руҳида, ўз халқига хизмат қиладиган ва жамият ривожига муносиб ҳисса қўша оладиган етук шахслар қилиб тарбиялаш ҳам мактаблардаги ўқитувчи-педагогларнинг асосий вазифаси ҳисобланади.

Амударё туманининг Қиличбой овули Юқори қишлоқ маҳалласида жойлашган 8-сонли мактабда ҳам Ватанга муносиб, ўзини юрт тараққиётига дахлдор деб биладиган ёшлар таълим-тарбия олиб, камолга етишмоқда. Ушбу мактаб таълим-тарбия ва маънавий-маърифий самарадорликни ошириш борасидаги ишларга алоҳида эътибор қаратилгани, ютуқларга, ижобий натижаларга эришилаётгани туфайли “яшил тоифа”га киритилган.

Ҳозирги пайтда Равшан Шомуродов раҳбарлик қилаётган мазкур мактаб 1974 йилда қурилган. Мактаб биноси 2018 йилда жорий ва капитал таъмирдан чиқарилган бўлиб, 400 ўринли қувватга эга. Мактабдаги 21 та синфда таълим олаётган 464 нафар ўқувчини 53 нафар олий ва ўрта махсус маълумотли ўқитувчи-педагоглар баркамол авлод қилиб тарбиялашмоқда.

Мактабда дарс машғулотларидан ташқари пайтда ўқувчиларнинг барча билимларни чуқур ўзлаштиришларини таъминлаш мақсадида фан тўгараклари ташкил этилган. Шунингдек, уларни китобхонликка жалб этиш, бўш вақтларини мазмунли ўтказишларига ҳам алоҳида эътибор қаратилиб, мактаб кутубхонаси бадиий китоблар билан бойитилган.

Мактабнинг иқтидорли ўқитувчиларидан Мансур Ўрозимбетов ўқувчиларнинг интеллектуал салоҳиятини ошириш, дунёқарашини кенгайтиришга астойдил ҳаракат қилмоқда. Ўқувчилар ўртасида мунтазам равишда турли хил интеллектуал ўйинлар ташкиллаштириб, уларнинг тафаккури ва дунёқарашини янада ўстириб, билимларини бойитиб бормоқда. Ушбу тўгарак аъзолари бўлган ўқувчилар машғулотларда катта қизиқиш билан иштирок этишмоқда ва ўз иқтидорларини, билимларини туман миқёсидаги мусобақаларида намойиш этиб, фахрли ўринлар ғолиблари бўлишмоқда.

Ўқувчилар тасвирий санъат фани ўқитувчиси Моҳира Жумамуродованинг дарс ва тўгарак машғулотларини ҳам жуда яхши кўришади. Маълумки, ёшларни бадиий жиҳатдан баркамол, Ватанга ва миллий санъатга садоқат руҳида тарбиялаб вояга етказишда тасвирий санъат фанининг ўрни алоҳида аҳамият касб этади. Тасвирий санъат фани умумий ўрта таълим мактабларида ўқитиладиган барча махсус фанларнинг асоси ҳисобланади ва улар орасидаги бевосита боғлиқликни таъминлайди.

Мактабнинг бошланғич синфларига шу фандан дарс бериб келаётган Моҳира Жумамуродова ўқувчиларга кўпроқ Ватан, юрт манзараларини турли бўёқларда тасвирлашга ўргатади. Фасллар, гўзал табиатни, миллий қадриятларимиз, байрамларимизни рангларда жилолантираётган болажонлар қалбига она диёрга муҳаббат туйғуларини ҳам жойлашга ҳаракат қилади.

Таълим масканида физика, кимё фанлари хоналари қаторида информатика хонаси ҳам мавжуд бўлиб, ушбу хона замонавий компьютерлар, ахборот технологиялари воситалари билан жиҳозланган. Мактаб ўқувчилари интернет тармоғига уланган компьютерлар ёрдамида замонавий билимларни янада чуқурроқ ўрганишга интилишмоқда. Фан ўқитувчиси Аминбой Жумамуродов ўқувчиларга компьютердан ва интернетдан самарали фойдаланиш бўйича тавсиялар, тушунчалар бериб келмоқда. Уларга компьютерни ишга тайёрлаш, матн ва график муҳаррирлари воситасидан фойдаланиш, маълумотлар, дастурларнинг нусхаларини олиш ва кўпайтириш, масалалар кабиларни ўргатиб, билимларини оширмоқда.

Таълим-тарбия ишлари самарали йўлга қўйилган мазкур мактабда келажагимизга мустаҳкам пойдеворлар қўйилмоқда. Ишонамизки, мактабда таълим олаётган юқори қишлоқлик ёшлардан юрт тараққиётига муносиб ҳисса қўша оладиган комил инсонлар етишиб чиқади.

О.Худойберганова.