YuQORI QIShLOQDAGI ILGʻOR MAKTABDA BARKAMOL AVLOD ULGʻAYMOQDA

Yosh avlodni maʼnaviy yetuk, komil insonlar etib tarbiyalashda maktablarning oʻrni katta. Maktab yoshlarga bilim asoslarini singdiradi, bolalikdan ilmu dunyoqarashi shakllanishida asosiy poydevor boʻlib xizmat qiladi. Taʼlim dargohi yoshlar uchun nafaqat bilim maskani, balki tarbiya oʻchogʻi hamdir. Oʻsib kelayotgan yosh avlodni milliy-maʼnaviy qadriyatlarga hurmat ruhida, oʻz xalqiga xizmat qiladigan va jamiyat rivojiga munosib hissa qoʻsha oladigan yetuk shaxslar qilib tarbiyalash ham maktablardagi oʻqituvchi-pedagoglarning asosiy vazifasi hisoblanadi.

Amudaryo tumanining Qilichboy ovuli Yuqori qishloq mahallasida joylashgan 8-sonli maktabda ham Vatanga munosib, oʻzini yurt taraqqiyotiga daxldor deb biladigan yoshlar taʼlim-tarbiya olib, kamolga yetishmoqda. Ushbu maktab taʼlim-tarbiya va maʼnaviy-maʼrifiy samaradorlikni oshirish borasidagi ishlarga alohida eʼtibor qaratilgani, yutuqlarga, ijobiy natijalarga erishilayotgani tufayli “yashil toifa”ga kiritilgan.

Hozirgi paytda Ravshan Shomurodov rahbarlik qilayotgan mazkur maktab 1974-yilda qurilgan. Maktab binosi 2018-yilda joriy va kapital taʼmirdan chiqarilgan boʻlib, 400-oʻrinli quvvatga ega. Maktabdagi 21 ta sinfda taʼlim olayotgan 464 nafar oʻquvchini 53 nafar oliy va oʻrta maxsus maʼlumotli oʻqituvchi-pedagoglar barkamol avlod qilib tarbiyalashmoqda.

Maktabda dars mashgʻulotlaridan tashqari paytda oʻquvchilarning barcha bilimlarni chuqur oʻzlashtirishlarini taʼminlash maqsadida fan toʻgaraklari tashkil etilgan. Shuningdek, ularni kitobxonlikka jalb etish, boʻsh vaqtlarini mazmunli oʻtkazishlariga ham alohida eʼtibor qaratilib, maktab kutubxonasi badiiy kitoblar bilan boyitilgan.

Maktabning iqtidorli oʻqituvchilaridan Mansur Oʻrozimbetov oʻquvchilarning intellektual salohiyatini oshirish, dunyoqarashini kengaytirishga astoydil harakat qilmoqda. Oʻquvchilar oʻrtasida muntazam ravishda turli xil intellektual oʻyinlar tashkillashtirib, ularning tafakkuri va dunyoqarashini yanada oʻstirib, bilimlarini boyitib bormoqda. Ushbu toʻgarak aʼzolari boʻlgan oʻquvchilar mashgʻulotlarda katta qiziqish bilan ishtirok etishmoqda va oʻz iqtidorlarini, bilimlarini tuman miqyosidagi musobaqalarida namoyish etib, faxrli oʻrinlar gʻoliblari boʻlishmoqda.

Oʻquvchilar tasviriy sanʼat fani oʻqituvchisi Mohira Jumamurodovaning dars va toʻgarak mashgʻulotlarini ham juda yaxshi koʻrishadi. Maʼlumki, yoshlarni badiiy jihatdan barkamol, Vatanga va milliy sanʼatga sadoqat ruhida tarbiyalab voyaga yetkazishda tasviriy sanʼat fanining oʻrni alohida ahamiyat kasb etadi. Tasviriy sanʼat fani umumiy oʻrta taʼlim maktablarida oʻqitiladigan barcha maxsus fanlarning asosi hisoblanadi va ular orasidagi bevosita bogʻliqlikni taʼminlaydi.

Maktabning boshlangʻich sinflariga shu fandan dars berib kelayotgan Mohira Jumamurodova oʻquvchilarga koʻproq Vatan, yurt manzaralarini turli boʻyoqlarda tasvirlashga oʻrgatadi. Fasllar, goʻzal tabiatni, milliy qadriyatlarimiz, bayramlarimizni ranglarda jilolantirayotgan bolajonlar qalbiga ona diyorga muhabbat tuygʻularini ham joylashga harakat qiladi.

Taʼlim maskanida fizika, kimyo fanlari xonalari qatorida informatika xonasi ham mavjud boʻlib, ushbu xona zamonaviy kompyuterlar, axborot texnologiyalari vositalari bilan jihozlangan. Maktab oʻquvchilari internet tarmogʻiga ulangan kompyuterlar yordamida zamonaviy bilimlarni yanada chuqurroq oʻrganishga intilishmoqda. Fan oʻqituvchisi Aminboy Jumamurodov oʻquvchilarga kompyuterdan va internetdan samarali foydalanish boʻyicha tavsiyalar, tushunchalar berib kelmoqda. Ularga kompyuterni ishga tayyorlash, matn va grafik muharrirlari vositasidan foydalanish, maʼlumotlar, dasturlarning nusxalarini olish va koʻpaytirish, masalalar kabilarni oʻrgatib, bilimlarini oshirmoqda.

Taʼlim-tarbiya ishlari samarali yoʻlga qoʻyilgan mazkur maktabda kelajagimizga mustahkam poydevorlar qoʻyilmoqda. Ishonamizki, maktabda taʼlim olayotgan yuqori qishloqlik yoshlardan yurt taraqqiyotiga munosib hissa qoʻsha oladigan komil insonlar yetishib chiqadi.

O.Xudoyberganova.