Фуқаро муҳофазаси куни тадбири ўтказилди
Амударё тумани ҳоким – Фуқаро муҳофазаси бошлиғининг 2024 йил 15 март кунги “Амударё тумани ҳудудида 2024 йил 15 март кунидан 15 апрель кунига қадар Фавқулодда вазиятлардан муҳофаза қилиш ва Фуқаро муҳофазаси ойлигини ташкил этиш ва ўтказиш тўғрисида”ги 5-сонли буйруғи ижросини таъминлаш мақсадида жорий йилнинг 3 апрель кунида туманнинг Ўрта қала овули ҳудудидаги 12-сонли умумтаълим мактабида Фуқаро муҳофазаси куни тадбири ўтказилди.
Айтиш жоизки, “Фуқаро муҳофазаси тўғрисида”ги Ўзбекистон Республикаси Қонунининг 16-моддага кўра умумтаълим мактаблари, академик лицейлар, олий ўқув юртлари, ишлаб чиқариш ва яшаш жойларда аҳолини фуқаро муҳофазаси соҳасида ўргатиш умумий ва мажбурийдир.
Фуқаро муҳофазаси соҳасидаги билимларни тарғиб этиш давлат органлари, шунингдек одамларни муҳофаза қилиш ва қутқариш борасидаги тегишли жамоат бирлашмалари томонидан таъминланади.
Амударё тумани фавқулодда вазиятлар бўлими тезкор бўлинмаси ходимлари томонидан ташкил қилинган ушбу тадбирнинг 1-қисмида ўқувчи ёшларга табиий ва техноген тусдаги фавқулодда вазиятларда ҳаракат қилиш тартиби ўргатилди.
Маълумки, “Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида”ги Ўзбекистон Республикаси Қонунига кўра муайян ҳудудда одамлар қурбон бўлишига, одамларнинг соғлиғига ёки атроф табиий муҳитга зарар етишига, жиддий моддий талафотларга ҳамда одамларнинг ҳаёт фаолияти шароитлари бузилишига олиб келиши мумкин бўлган ёки олиб келган авария, ҳалокат, хавфли табиий ҳодисалар табиий ҳамда техноген хусусиятли фавқулодда вазиятлар дейилади. Шунингдек, табиий офат ёки бошқа офат натижасида, карантинли ва инсон учун хавфли бўлган бошқа юқумли касалликлар тарқалиши натижасида юзага келган вазиятлар ҳам шундай тоифага киритилади. Ўқувчиларга бундай шароитда ўзини қўлга олиш ва ҳаракатланиш тартиби тўғрисида мутахассислар томонидан тушунчалар берилди.
Фуқаро муҳофазаси куни тадбирида табиий офат – зилзила содир бўлганда бинони қандай тарк этиш ва хавфсиз жойга чиқиш ҳамда жабрланганларга биринчи ёрдам кўрсатиш тартиби амалий мисоллар орқали кўрсатиб берилди.
Тадбирнинг 2-қисмида мактабдаги ўқувчи ёшларга ёнғин ўчириш махсус автомобилидаги асбобоб-анжомлар билан кўргазмали ўқув машғулоти ўтказилди.
Мутахассислар бино, иншоот ва хоналарга қўйиладиган ёнғин хавфсизлиги талабларига мувофиқ объектлар автоматик ёнғин ўчириш қурилмалари ва ёнғин сигнализацияси билан жиҳозланган бўлиши лозимлигини, бинолар, иншоотлар ва хоналардан, асбоб-ускуналардан, жиҳозлардан фақат лойиҳа ва эксплуатацион-техник ҳужжатларда белгиланган мақсадларда ва ёнғин хавфсизлиги талабларига риоя қилинган ҳолда фойдаланиш кераклигини алоҳида таъкидладилар. Ўқувчиларга ёнғин келиб чиқишининг олдини олиш, бундай нохуш ҳолат содир бўлганда эса уни зудлик билан бартараф қилиш бўйича амалий кўрсатмалар берилди.
Бундан ташқари ўқувчиларга ёнғинни ўчиришнинг бирламчи воситалари, яъни кўчма ўт ўчиргичлар, қум солинадиган қутилар, ёнғинга чидамли матолар, сув билан тўлдирилган идишлар, қўлда фойдаланиладиган ёнғинга қарши воситалар, ёнғин ўчириш махсус автомобилидаги асбобоб-анжомлар ҳақида батафсил маълумотлар берилди.
Ғ.Ешниёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
