Fuqaro muhofazasi kuni tadbiri oʻtkazildi
Amudaryo tumani hokim – Fuqaro muhofazasi boshligʻining 2024-yil 15-mart kungi “Amudaryo tumani hududida 2024-yil 15-mart kunidan 15-aprel kuniga qadar Favqulodda vaziyatlardan muhofaza qilish va Fuqaro muhofazasi oyligini tashkil etish va oʻtkazish toʻgʻrisida”gi 5-sonli buyrugʻi ijrosini taʼminlash maqsadida joriy yilning 3-aprel kunida tumanning Oʻrta qala ovuli hududidagi 12-sonli umumtaʼlim maktabida Fuqaro muhofazasi kuni tadbiri oʻtkazildi.
Aytish joizki, “Fuqaro muhofazasi toʻgʻrisida”gi Oʻzbekiston Respublikasi Qonunining 16-moddaga koʻra umumtaʼlim maktablari, akademik litseylar, oliy oʻquv yurtlari, ishlab chiqarish va yashash joylarda aholini fuqaro muhofazasi sohasida oʻrgatish umumiy va majburiydir.
Fuqaro muhofazasi sohasidagi bilimlarni targʻib etish davlat organlari, shuningdek odamlarni muhofaza qilish va qutqarish borasidagi tegishli jamoat birlashmalari tomonidan taʼminlanadi.
Amudaryo tumani favqulodda vaziyatlar boʻlimi tezkor boʻlinmasi xodimlari tomonidan tashkil qilingan ushbu tadbirning 1-qismida oʻquvchi yoshlarga tabiiy va texnogen tusdagi favqulodda vaziyatlarda harakat qilish tartibi oʻrgatildi.
Maʼlumki, “Aholini va hududlarni tabiiy hamda texnogen xususiyatli favqulodda vaziyatlardan muhofaza qilish toʻgʻrisida”gi Oʻzbekiston Respublikasi Qonuniga koʻra muayyan hududda odamlar qurbon boʻlishiga, odamlarning sogʻligʻiga yoki atrof tabiiy muhitga zarar yetishiga, jiddiy moddiy talafotlarga hamda odamlarning hayot faoliyati sharoitlari buzilishiga olib kelishi mumkin boʻlgan yoki olib kelgan avariya, halokat, xavfli tabiiy hodisalar tabiiy hamda texnogen xususiyatli favqulodda vaziyatlar deyiladi. Shuningdek, tabiiy ofat yoki boshqa ofat natijasida, karantinli va inson uchun xavfli boʻlgan boshqa yuqumli kasalliklar tarqalishi natijasida yuzaga kelgan vaziyatlar ham shunday toifaga kiritiladi. Oʻquvchilarga bunday sharoitda oʻzini qoʻlga olish va harakatlanish tartibi toʻgʻrisida mutaxassislar tomonidan tushunchalar berildi.
Fuqaro muhofazasi kuni tadbirida tabiiy ofat – zilzila sodir boʻlganda binoni qanday tark etish va xavfsiz joyga chiqish hamda jabrlanganlarga birinchi yordam koʻrsatish tartibi amaliy misollar orqali koʻrsatib berildi.
Tadbirning 2-qismida maktabdagi oʻquvchi yoshlarga yongʻin oʻchirish maxsus avtomobilidagi asbobob-anjomlar bilan koʻrgazmali oʻquv mashgʻuloti oʻtkazildi.
Mutaxassislar bino, inshoot va xonalarga qoʻyiladigan yongʻin xavfsizligi talablariga muvofiq obʼektlar avtomatik yongʻin oʻchirish qurilmalari va yongʻin signalizatsiyasi bilan jihozlangan boʻlishi lozimligini, binolar, inshootlar va xonalardan, asbob-uskunalardan, jihozlardan faqat loyiha va ekspluatatsion-texnik hujjatlarda belgilangan maqsadlarda va yongʻin xavfsizligi talablariga rioya qilingan holda foydalanish kerakligini alohida taʼkidladilar. Oʻquvchilarga yongʻin kelib chiqishining oldini olish, bunday noxush holat sodir boʻlganda esa uni zudlik bilan bartaraf qilish boʻyicha amaliy koʻrsatmalar berildi.
Bundan tashqari oʻquvchilarga yongʻinni oʻchirishning birlamchi vositalari, yaʼni koʻchma oʻt oʻchirgichlar, qum solinadigan qutilar, yongʻinga chidamli matolar, suv bilan toʻldirilgan idishlar, qoʻlda foydalaniladigan yongʻinga qarshi vositalar, yongʻin oʻchirish maxsus avtomobilidagi asbobob-anjomlar haqida batafsil maʼlumotlar berildi.
Gʻ.Yeshniyozov
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
