Томорқасидан самарали фойдаланаётган бободеҳқон ҳамюртларимиз ҳаётидан

Мамалакатимизда қишлоқ хўжалигининг барча тармоқлари сингари гул етиштириш, кўчатчиликни ривожлантиришга ҳам алоҳида эътибор қаратилмоқда. Амударё туманида узоқ йиллардан буён гулчилик билан шуғулланиб, рўзғорини тебратиб келаётган ҳамюртларимиз талайгина.

Уйшин маҳалласида яшовчи ҳамюртимиз Омонбой Жалолов 15 йилдан буён гулчилик билан шуғулланиб келади. Биз билан суҳбат чоғида Омонбой ака гул етиштириш жуда нозик, катта сабр ва меҳр талаб қиладиган фаолият турларидан бири эканлигини, гул кўчатларини етиштириш билан шуғулланган инсонларнинг гўзаллик яратишга бўлган қизиқишлари, табиатга, ҳаётга муҳаббати янада ошишини алоҳида таъкидлади.

Омонбой Жалолов турмуш ўртоғи, фарзандлари билан бирга 1 сотих ер майдонида ташкил этган иссиқхонада ҳар йили 25 минг дона гул кўчатларини етиштиришади ва яхши даромад олишади. Турмуш ўртоғи, икки нафар ўғли ва қизи ўқиш ва ишларидан бўш вақтларида иссиқхонада гул кўчатларини парваришлашади.

Иссиқхонада Қорақалпоғистон Республикаси табиатига, иқлим шароитига мос бўлган ҳар хил турдаги гул кўчатлари етиштирилади. Шафран, петуня, катрандус, сальвия каби ноёб гуллар кўчатлари шулар жумласидандир. Етиштирилган гуллар кўчатлари Нукус шаҳри ва республикадаги барча туманларга буюртма асосида етказиб берилади.

Шу ўринда маълумот тариқасида келтириш жоизки, 2023 йилнинг 24 октябрь санасида Ўзбекистон Республикаси Президентининг “Гулчилик ва кўчатчилик соҳаларини давлат томонидан қўллаб-қувватлашга доир қўшимча чора-тадбирлар тўғрисида”ги қарори имзоланган эди. Мазкур қарор билан 2023 йил 1 ноябрдан 2026 йил 1 январга қадар туганаклар, пиёзбошлар, туганаксимон илдизлар, туганак пиёзлар, илдизпоя, жумладан вегетатив тиним ҳолатидаги, вегетация ёки гуллаш давридаги сертармоқлари, бошқа тирик ўсимликлар (жумладан, илдизлари), қаламчалар импортида божхона божининг ноль ставкаси қўлланилиши белгиланган бўлиб, ушбу ҳужжат гул етиштиришни яна ривожланириш борасида муҳим дастуруламал бўлмоқда.

Тўлқин овулида яшовчи Азимжон Мухтаров ота-боболаридан ўрганган деҳқончилик сирларини бугун фарзандларига ўргатиб келаётган тажрибали деҳқонлардан биридир. Азимжон ака 25 сотих томорқа ер майдонида турли хил сабзавотлар, қишлоқ хўжалик маҳсулотлари етиштириб, оиласига яхши даромад олиб келмоқда.

Томорқанинг 5 сотих ер майдонига қурилган иссиқхонада 4 йилдан буён помидор, бодринг, бақлажон, карам каби маҳсулотлардан йилига 2 мартадан ҳосил олинади. Ҳосилни Манғит деҳқон бозорига олиб бориб сотишади ва оилага яхшигина қўшимча даромад келади.

Олий маълумотли, 33-сонли умумтаълим мактабининг жисмоний тарбия фани ўқитувчиси бўлган Азимжон аканинг деҳқончиликка, ерга бўлган меҳри бўлакча. Томорқасидаги бир қарич ерни ҳам бўш қўймасдан ҳар хил деҳқончилик маҳсулотларини экиб, йилига икки марта ҳосил олишни йўлга қўйган.

Турмуш ўртоғи Барно Шомуродова ҳам ушбу мактабнинг она-тили ва адабиёт фани ўқитувчиси, у ҳам ишдан бўш вақтларида томорқасидаги етиштирилаётган сабзавотларни парваришлашга кўмаклашади.

Азимжон аканинг икки нафар ўғли айни пайтда олий ўқув юртлари талабалари. Уларнинг ҳам деҳқончиликка қизиқишлари кучли бўлиб, ўқишдан бўш вақтларда иссиқхонада ва томорқада ота-оналари билан меҳнат қилиб келишмоқда.

Чарос Арслонова, туман ҳокимлигининг Ахборот хизмати раҳбари.