Амударё тумани мамлакат миқёсидаги семинарга мезбонлик қилди

Мамалакат ривожини таълим сифати ва кадрлар салоҳияти белгилаб беради. Шу мақсадда юртимизда мактабгача ва мактаб таълимини янги босқичга кўтариш йўлида қатор ислоҳотлар амалга ошириляпти. Жумаладан, мактабларда Миллий ўқув дастури ва замонавий дасрликларни амалиётга жорий этиш, бу жараёнда педагог ходимларга узликсиз методик хизмат кўрсатиш, қизил тоифадаги мактабларга манзилли ёрдам бериш устувор вазифа сифатида белгиланган.

Айни йўналишда амалга оширилаётган ишларнинг натижасини яна бир марта сарҳисоб қилиш, бу борадаги ютуқларни эътироф этиб, камчиликларни бартараф этиш мақсадида Амударё туманидаги 76-сонли мактабда Ўзбекистон миқёсида методик тур ташкил қилинди.

Методик турга мамлакатнинг барча ҳудудларидан келган соҳа вакиллари мактаб биноси олдида карнай садолари билан тантанавор кутиб олинди. Меҳмонларга қадриятимизга айланган анъана – нон-туз тутилди. Ўқувчилар томонидан чолғу асбобларида ижро этилган миллий куй ва мусиқалар барчага ўзгача кайфият бахш этди. Махсус тайёрланган кўргазмада ўқувчиларнинг қўл меҳнати билан ишланган буюмлар, юмшоқ ўйинчоқлар ва ҳар хил мавзуларда чизилган суратлар намойиш қилинди.

Семинарда Ўзбекистон Республикаси Мактабгача ва мактаб таълими вазирининг биринчи ўринбосари У.Шарифходжаев, Вазирликнинг Методика ва дарсликлар бошқармаси бошлиғи Д.Норбоева, Республика таълим маркази директори Ш.Худайқулов, Қорақалпоғистон Республикаси Вазирлар кенгаши раиси ўринбосари Б.Отемуратов, Қорақалпоғистон Республикаси Мактабгача ва мактаб таълими вазири Г.Қожабаева, барча вилоятлар Мактабгача ва мактаб таълими бўлимларининг ўқувчиларда замонавий кўникмаларни шакллантириш шўъбалари бош методистлари, ҳудудий методик хизмат кўрсатиш бўлими бошлиқлари, туманимизнинг соҳага масъул мутасаддилари ҳамда оммавий ахборот воситалари вакиллари иштирок этди.

Мактабнинг фаоллар залида ўтказилган йиғилишда Ўзбекистон Республикаси Мактабгача ва мактаб таълими вазирининг биринчи ўринбосари Усман Шарифходжаев ҳамда Қорақалпоғистон Республикаси Мактабгача ва мактаб таълими вазири Гулистан Қожабаевалар сўзга чиқиб, мамлакатимизда мактабгача ва мактаб таълими соҳасида амалга оширилаётган кенг кўламли ислоҳотлар, ўқувчиларнинг сифатли таълим олиши учун яратилаётган шароитлар, ўқитувчиларга берилаётган имтиёзлар ва яратилаётган имкониятлар ҳақида тўхталиб, методик турнинг аҳамияти ҳақида маълумотлар беришди. Шундан сўнг Амударё тумани Мактабгача ва мактаб таълими бўлими бошлиғи Ялғашбой Шомуратов “қизил” тоифага кирган мактабларда амалга оширилган ишлар, эришилган ижобий натижалар ва кейинги режалар ҳақида тақдимот қилди.

Жумладан, 2021 йилда туманда 4 та умумий ўрта таълим мактаби, шу ўринда 76-сонли мактаб ҳам таълим сифати юқори бўлмаганлиги сабабли “қизил” тоифага киритилган эди. Тегишли муассасалар томонидан методик ёрдам берилиб, манзилли ишлаш натижасида барча мактаблар “яшил” тоифага ўтказилди. Ушбу мактаб эса бугунги кунда тумандаги энг кучли мактаблар бешталигидан жой олган. Кейинги йилларда ўқувчилар сони ортгани сабабли мактабга қўшимча янги бино қурилган. Ҳозирда туманимизда таълим сифати бўйича “қизил” тоифадаги мактаблар мавжуд эмас.

Семинар давомида меҳмонлар ва соҳа вакиллари мактабда яратилган шароитлар, замонавий методларга таянган ҳолда ўтилаётган дарс жараёнлари билан яқиндан танишдилар. Меҳмонлар дарс жараёнларида бевосита иштирок этиб, ўқитувчиларнинг дарс ўтиш услуби ва ўқувчиларнинг мавзу бўйича фаолликларини кузатишди.

Таълим даргоҳида “бир касб – икки хорижий тил” тажрибаси жорий қилинган. Ушбу тамойил асосида ўқувчиларга иккита хорижий тил чуурлаштирилган тарзда ўргатилиб, уларнинг касб-корли бўлишлари, ҳунар эгаллашлари учун ҳам шароитлар яратилмоқда. Мактабда дурадгорлик ва тикувчилик тўгараклари фаолият юритмоқда. Тикувчилик тўгарагига соҳада катта тажрибага эга бўлган илғор бизнес эгалари, фаол тадбиркорлар жалб қилинган. Улар ўқув-ишлаб чиқариш устахоналарини ташкил қилиш ва жиҳозлаш ишларида амалий ёрдамлар кўрсатиб келмоқда.

Маълумки, Ўзбекистон Республикаси Президентининг “2022-2026-йилларда халқ таълимини ривожлантириш бўйича миллий дастурини тасдиқлаш тўғрисида”ги Фармони қабул қилинган эди. Фармон ижроси юзасидан мактаб ўқувчиларининг билими ва кўникмаларини шакллантириш, уларни миллий ҳамда умуминсоний қадриятларга содиқлик руҳида тарбиялаш, ўқитувчи касби нуфузини ва педагогларнинг сифат таркибини ошириш, дарсликлар ва ўқув методик мажмуаларни замон талаблари асосида такомиллаштириш, халқ таълими муассасаларининг халқаро стандартларга жавоб берадиган замонавий моделларини барпо этиш мақсадида қатор вазифалар белгилан.

Эндиликда сифати юқори бўлмаган умумий ўрта таълим мактабларида манзилли методик ёрдам кўрсатиш бўйича Қорақалпоғистон тажрибасини Ўзбекистон Республикаси миқёсида оммалаштириш кутилмоқда. Бу каби амалий ишлар орқали “қизил” тоифага киритилган мактабларда таълим сифатини янада яхшилаш, самарадорлигини ошириш кўзда тутилган.

Ушбу методик тур доирасида мамлакат миқёсида турли ҳудудлардан келган меҳмонлар Амударё туманидан ташқари Қўнғирот ва Мўйноқ туманлари ҳамда Нукус шаҳарларида бўлишиб, мактаблар ва мактабгача таълим ташкилотларига ташриф буюришди ва методик хизмат кўрсатиш бўйича билим ва тажрибаларини янада оширдилар.

Шоҳзод Қурбонбоев