Ғалла ўрим-йиғимига бағишланган республика миқёсидаги семинар бўлиб ўтди

9 июнь куни Амударё туманида ғалла ўрим-йиғимига бағишланган республика миқёсидаги кўргазмали семинар бўлиб ўтди. Семинарда Қорақалпоғистон Республикаси Жўқорғи Кенгеси Раиси Аманбай Оринбаев, Вазирлар Кенгаши Раиси Фарҳод Эрманов, туманлар ҳокимлари, қишлоқ хўжалиги соҳа мутасаддилари ҳамда фермерлар иштирок этди.

Дастлаб семинар иштирокчилари Чойкўл овули ҳудудидаги “Чойкўл-Дўстлик” фермер хўжалидаги буғдой далаларида жорий йилги ўрим-йиғим мавсумига тайёргарлик кўриш бўйича амалга оширилган ишлар билан танишдилар. Масъуллар жорий йилги ҳосилни нест-нобуд қилмасдан ўриб-йиғиб олиш, ғалладан бўшаган ерларга такрорий экин экиш ва келгуси йил ҳосили учун буғдой экиш ҳамда уни парваришлаш жараёнида сув тежовчи технологиялардан самарали фойдаланиш бўйича тавсиялар берди.

Таъкидланганидек, сувга бўлган талаб ошиб борар экан, сув тежовчи технологияларни жорий қилиш тобора муҳим аҳамият касб этиб бормоқда. Сўнгги йилларда мамлакатимизда сув ресурсларидан фойдаланиш тизими тубдан ислоҳ қилинмоқда. Сувдан оқилона ва самарали фойдаланиш, суғориладиган ерларнинг мелиоратив ҳолатини яхшилаш қишлоқ хўжалигининг энг муҳим масалаларидан бири сифатида қаралмоқда. Сув тежовчи технологиялардан оқилона фойдаланиш нафақат қишлоқ хўжалиги соҳаси, балки иқтисодиётимиз учун ҳам муҳим аҳамиятга эга. Бизнинг иқтисодиётимиз қишлоқ хўжалигига асосланган. Аҳолининг катта қисми аграр соҳа билан банд. Қишлоқ хўжалигида сув истеъмолини камайтириш миллионлаб тонна сувни тежаб қолиш ва уни аҳоли эҳтиёжларига йўналтириш имконини яратади.

Семинар иштирокчиларининг навбатдаги манзили Ўртақалъа овули  ҳудудидаги “Юсуфхўжа” фермер хўжалигининг ғалла даласи бўлди. Дала бошида Қуръон тиловат қилиниб, нуронийлар деҳқонларимизнинг олдида турган машаққатли ва масъулиятли ишларига куч-қувват, юртимизга фаровонлик, халқимиз дастурхони тўкис бўлиши тилаб, дуо қилишди.
Семинарда сўзга чиққанлар ўрим-йиғим мавсумида амалга оширилиши керак бўлган ишлар, жорий йилги ғалла етиштириш бўйича контрактация шартномаларини тўлиқ ҳажмда бажариш, юксак ғалла хирмонини яратишдаги устувор вазифалар хусусида сўз юритдилар.

Айтиш жоизки, деҳқонларимиз ғаллачиликда ҳосилдорликни ошириш, эл-юртимиз дастурхони тўкинлигини таъминлашга доимий эътибор қаратиб келишади. Айниқса, амударёлик ғаллакорлар ҳар йили мўл ҳосил олиб, юксак хирмонлари билан мамлакатимизда пешқадамлар сафида келмоқда.

Жорий йил ҳам туманимиз фермерлари томонидан мўл ғалла етиштириш мақсадида буғдой уруғи ерга қадалганидан тортиб, ҳосил пишиб етилгунига қадар барча агротехник тадбирлар ўз вақтида ва сифатли амалга оширилди. Етиштирилган ҳосилни қисқа фурсатларда нест-нобуд қилмай ўриб-йиғиб олиш мақсадида барча ҳаракатлар изчиллик билан амалга оширилмоқда.

Шу ўринда маълумот тариқасида айтиш жоизки, туманда 2024 йил ҳосили учун 313 та фермер хўжаликлари ҳамда қишлоқ хўжалиги корхоналари томонидан 4800 гектар майдонга буғдой экилган эди. Ушбу далалардан 14 минг 400 тоннадан ортиқ ғалла ҳосили олиш режа қилинган.

Ғалла ҳосилини ўриш учун туманда 22 та отрядлар ташкил қилиниб, ушбу отрядларга юқори унумли 22 та комбайнлар, 47 нафар ИИБ, ФВБ ва Миллий гвардия ходимлари, 66 та юк машиналари бириктирилди ва 14 июнь санасидан 1 июлгача, 21 кунда ғалла ҳосилини нест-нобуд қилмасдан ўриб олиш бўйича чора-тадбирлар режаси ҳамда ўрим графиклари ишлаб чиқилган.

Семинар якунида буғдой ўрим-йиғими даврида ёнғин хавфсизлигига амал қилиш, ҳосилнинг нобуд бўлишига йўл қуймаслик бўйича фермер хўжаликларининг раҳбарларига, ғаллакор ва механизаторларига тушунтиришлар ва тавсиялар берилди.

Чарос Арслонова, туман ҳокимлигининг Ахборот хизмати раҳбари.