Qoraqalpogʻiston Respublikasi Vazirlar Kengashi Raisi ishtirokida seminar boʻlib oʻtdi

29-avgust kuni Amudaryo tumanidagi “Oq oltin” ovulida 2025-yil hosili uchun gʻalla ekish ishlarini tashkil etish hamda gʻoʻza parvarishi borasida olib borilayotgan ishlar yuzasidan seminar boʻlib oʻtdi. Hududdagi “Yakubova Gavhar” fermer xoʻjaligining ekin dalasida tashkil etilgan seminarda Qoraqalpogʻiston Respublikasi Vazirlar Kengashining Raisi Farhod Ermanov, tuman hokimi Sobir Xoʻjametov, qoʻshni tumanlar hokimlari, respublika hamda tumandagi qishloq xoʻjaligi sohasi masʼullari ishtirok etdilar.

Seminarda gʻalladan yuqori hosil olish maqsadida ekish ishlarini uyushqoqlik bilan tashkil etish, agrotexnik tadbirlarni oʻz vaqtida amalga oshirish orqali ekin maydonlaridan samarali foydalanish yuzasidan oldinda turgan ustuvor vazifalar xususida soʻz yuritildi. Shuningdek, seminar mobaynida mehmonlar paxtadan moʻl hosil olish borasida fermer xoʻjaligida amalga oshirilayotgan ishlar bilan ham tanishdilar.

Vazirlar Kengashining Raisi Farhod Ermanov oʻz soʻzida respublikamiz aholisini arzon va sifatli oziq-ovqat mahsulotlari bilan uzluksiz taʼminlash hamda fermer xoʻjaliklari iqtisodini mustahkamlash maqsadida gʻalladan boʻshagan ekin maydonlarga takroriy ekin ekish ishlarini jadallashtirish hamda ulardan yaxshi hosil olish uchun toʻgʻri parvarishlash lozimligi, gʻalla va paxta hosilining moʻl boʻlishida oʻz vaqtida amalga oshirilgan agrotexnik tadbirlarning ahamiyati katta ekanligi, fermer xoʻjaliklari ekin yer maydonlarida suv tejovchi texnologiyalarni joriy qilish orqali sugʻorish ishlarini tashkil qilish ham suvni tejashga, shuningdek, hosil moʻl boʻlishiga xizmat qilishi xususida soʻz yuritdi. Fermer xoʻjaliklari rahbarlariga gʻalla hamda paxta yetishtirish borasida tegishli tavsiya va koʻrsatmalar berildi.

Shu oʻrinda maʼlumot tariqasida aytish joizki, kelgusi yil hosili uchun tumandagi 301ta fermer xoʻjaliklari va qishloq xoʻjaligi korxonalari tomonidan 4800 gektar maydonga gʻalla ekish rejalashtirilgan. Gʻalla ekish ishlarini uyushqoqlik bilan oʻtkazish maqsadida 17ta otryad tashkil qilinib, otryad rahbarlari sifatida hududiy agronomlar biriktirilgan. Joriy yilda gʻallani optimal muddatlarda ekish uchun 71ta yuqori unumli surim texnikalari, 12ta gʻalla ekish seyalkalari, 59ta chizellar, 72ta kultivator moslamalari, 51ta yer tayyorlash mexanizmlari, 51ta yer tekislagichlar, 16ta oʻgʻit sepkich uskunalar, 21ta egat olgichlardan unumli foydalanish rejalashtirilgan va ushbu texnikalar mavsum oldidan toʻliq taʼmirdan chiqarilgan.

Kelgusi yil hosili uchun sifat koʻrsatkichlari yuqori boʻlgan navlar, jumladan, 1465 gektar maydonga Aleksevich navi, 2436 gektar maydonga Antonina navi, 250 gektar maydonga Grut navi, 649 gektar maydonga Vassa navlarini ekish rejalashtirilgan. Bundan tashqari, jami 13 ming 900 gektar gʻoʻza maydonlarning 11 ming 722 gektar qismini defoliatsiya qilish rejalashtirilgan.

Tumanda paxtadan moʻl hosil olish maqsadida ham tegishli chora-tadbirlar amalga oshirilmoqda. 2024-yil hosili uchun 352ta fermer xoʻjaliklari tomonidan 13 ming 900 gektar maydonga chigit ekilib, sifatli parvarish qilinmoqda. Ushbu maydonlarda yetishtirilishi kutilayotgan 48 ming 500 tonna paxta hosilini sotish boʻyicha 6ta klasterlar bilan shartnomalar imzolangan. Paxta yigʻim-terimi mavsumiga puxta tayyorgarlik koʻrish va uni optimal muddatlarda amalga oshirish maqsadida 310ta terim otryadlari tashkil qilindi. Terim otryadlariga 100-150 nafardan iborat tashabbuskor guruhlar hamda mahallalarda tajribali koʻcha faollaridan iborat otryad rahbarlari tayinlangan. Otryadlarga jami 17 ming 490 nafar terimchilar jalb qilinadi.

Yigʻim-terim mavsumida 347ta paxta tashish texnikalari, 734ta tirkamalar, 1468ta avtoyopqichlar, 1660ta brezentlar, 620ta tarozilar ishlatilishi kutilmoqda.

Seminarda kun tartibidagi masala yuzasidan amalga oshirilayotgan ishlar atroflicha oʻrganilib, tahlil qilindi hamda mavjud kamchiliklarni joyida bartaraf qilish yuzasidan tegishli masʼullarga koʻrsatmalar va topshiriqlar berildi.

Charos Arslonova, tuman hokimligining Axborot xizmati rahbari.