44-sonli davlat MTTda oʻtgan oʻquv yili davomida amalga oshirilgan ishlar tahlil qilindi

Yangi oʻquv yili boshlanishi munosabati bilan Amudaryo tumanidagi 44-sonli davlat maktabgacha taʼlim tashkilotida muassasa direktori Aynur Rahmonova raisligida pedagogik kengash yigʻilishi oʻtkazildi. Tadbirda tashkilot direktori, Kuzatuv kengashi raisi, tashkilotning jami 25 nafar pedagog va 20 nafar texnik xodimlari ishtirok etishdi.

Pedagogik kengash yigʻilishini muassasa rahbari Aynur Rahmonova tabrik soʻzi bilan ochdi va yigʻilganlarni kun tartibidagi masalalar bilan tanishtirdi. Tashkilot direktori oʻz nutqida barchani istiqlolimizning 33 yilligi va yangi oʻquv yili bilan qizgʻin muborakbod etib, tarbiyachi va pedagog xodimlarga keyingi ish faoliyatida muvaffaqiyatlar tiladi.

Pedagogik kengash yigʻilishi kun tartibiga koʻra, dastlab, oʻtgan 2023-2024 oʻquv yilida tashkilotda olib borilgan taʼlim-tarbiyaviy, sogʻlomlashtirish ishlari, xodimlarning jamoat ishlaridagi ishtiroki haqidagi tashkilot uslubchisi va hamshirasining yillik hisoboti tinglandi. Shundan keyin yangi oʻquv yilidagi asosiy vazifalar, pedagog-koucherning ish rejasi va amaliy faoliyati, ish hujjatlari va koʻrgazmali-didaktik materiallardan foydalanish boʻyicha tavsiyalar taqdimotiga navbat berildi. Shuningdek, pedagoglar orasidan tashkilot Kuzatuv kengashiga nomzodlar saylash masalasi ham Kengash tomonidan koʻrib chiqildi.

44-sonli davlat maktabgacha taʼlim tashkiloti uslubchisi, pedagog-koucher Sevara Shomurodova oʻz maʼruzasida oʻtgan oʻquv yilida tashkilotda olib borilgan oʻquv-tarbiyaviy ishlar, tashkil etilgan ochiq darslar va namunaviy mashgʻulotlar, bayram tadbirlari va badiiy kechalar, ularning samarali natijasi hamda kuzatilgan kamchiliklar toʻgʻrisida fikr-mulohazalarini bildirib oʻtdi.

Muassasa hamshirasi Zubayda Madiyorova esa maktabgacha taʼlim tashkilotining yil davomidagi sanitariya-gigiyenik holati, tarbiyalanuvchilarni sogʻlom ovqatlantirish boʻyicha qilingan ishlar, mavsumiy taomnoma, tarbiyalanuvchilar hamda xodimlarning oʻz vaqtida tibbiy koʻrikdan oʻtkazilganligi toʻgʻrisidagi hisobotni taqdim etdi. Shuningdek, yozgi sogʻlomlashtirish davri reja asosida tashkil etilganligi va samarali olib borilganligi haqida batafsil toʻxtalib oʻtildi.

Tadbir davomida muassasaning pedagog-kouching faoliyati tahlil qilinib, yangi oʻquv yili uchun pedagog-koucherlar va hamkorlar saylash uchun nomzodlar eʼlon qilindi. Koʻrsatilgan talabga koʻra, 5-yildan ortiq pedagogik stajga ega pedagoglar – pedagog-koucherlar va boshqa pedagoglar – pedagogik-kouching hamkorlari deb belgilandi. Pedagogik-kouching ish rejasini va ochiq mashgʻulotlar jadvalini ishlab chiqish vazifasi uslubchi, pedagog-koucher Sevara Shomurodova zimmasiga yuklatildi.

Shundan keyin pedagog-koucher Sohiba Gulmirzayeva soʻzga chiqib, pedagoglarga tashkilotning namunali kun tartibi toʻgʻrisida video-rolik taqdim qildi. Pedagogik-kouching hamkori, tarbiyachi Dilfuza Dosekeyeva oʻz taqdimotida taʼlim-tarbiya jarayonida innovatsion usullardan foydalanish toʻgʻrisida fikr-mulohazalarini bildirib, “Mening tanlovim” tablosi bilan tanishtirdi.

Taqdimotlar davomida pedagogik-kouching hamkori, tarbiyachi Shoira Madiyorova soʻzga chiqib, taʼlim-tarbiya jarayonida koʻrgazmali-didaktik materiallardan foydalanishning ahamiyati, bu kabi materiallarning mazmuni, ulardan foydalanish tartibi haqida maʼruza qildi.

Pedagogik kengash-tadbirining keyingi qismida pedagogik jamoa oʻrtasida ish hujjatlari va taʼlim-tarbiya jarayoni, markazlardagi faoliyat yuzasidan oʻzaro fikrlar almashildi. Tashkilotning yordamchi tarbiyachilari Sharofat Safarboyeva, Raushan Xalillayeva, Muhabbat Qurbonboyevalar tomonidan tadbir davomida qilingan taqdimotlar yuzasidan fikr-mulohazalar bildirildi. Shuningdek, pedagogik-kouching hamkorlari, tarbiyachilar Barno Avezbayeva va Hilola Durdiboyeva tayyorlangan taqdimotlar yuzasidan oʻz takliflarini berishdi.

Shu oʻrinda aytish joizki, Pedagogik kengash zamonaviy axborot texnologiyalaridan unumli foydalangan holda, yuqori saviyada tashkil etildi va oʻtgan oʻquv yili davomida ilgʻor va faol boʻlgan bir qator pedagog va texnik xodimlar tashkilot rahbarining tashakkurnomalari bilan taqdirlandi.

Pedagogik kengash yakunida muassasaning yangi oʻquv yili uchun ishlab chiqilgan yillik ish rejalari, pedagoglarning ish hujjatlari tasdiqlandi.

Sohiba Gulmirzayeva, 44-sonli davlat maktabgacha taʼlim tashkiloti tarbiyachisi.