Taʼlim sohasi ilgʻorlari “VETERAN” faxriy baynalmilal jangchilar Uyushmasi tomonidan mukofotlandi

Oʻsib kelayotgan yosh avlodni vatanparvarlik, mustaqillik gʻoyalari asosida tarbiyalash, ular ongida milliy-maʼnaviy immunitetni shakllantirishda nafaqat oʻqituvchi va murabbiylar, balki barcha sohalarda faoliyat olib borayotgan, ustoz-shogird anʼanalari asosida yoshlarning oʻz sohalari boʻyicha yetuk mutaxassislar boʻlib kamolga yetishishlarida fidoyilik bilan mehnat qilayotgan barcha kasb egalarining xizmatlari katta. Ayniqsa, zaxiradagi harbiy zobitlar, taʼlim-tarbiya sohasi rahbarlari, sobiq baynalmilal jangchilar, kutubxonachilarning yosh avlod taʼlim-tarbiyasiga qoʻshayotgan hissalari alohida eʼtibor va eʼtirofga munosib.

Oʻqituvchi va murabbiylar kuni – umumxalq bayrami munosabati bilan Amudaryo tumanining turli sohalarida ishlayotgan, oʻz mehnat faoliyatlari davomida yoshlarni har tomonlama yetuk va barkamol insonlar qilib tarbiyalashdek masʼuliyatli vazifani ado etishga munosib hissalarini qoʻshayotgan fidoyi insonlardan bir guruhi Oʻzbekiston Respublikasi “VETERAN” faxriy baynalmilal jangchilar Uyushmasi tomonidan taqdirlandilar. Mazkur Uyushma tomonidan taqdirlanganlar orasida Amudaryo tumani Maktabgacha va maktab taʼlimi boʻlimi boshligʻi Yalgʻashboy Shomurodov hamda ushbu boʻlim tasarrufidagi 12-sonli maktab kutubxonachisi Muborak Mahmudovalar ham bor.

Yaqinda Oʻzbekiston Respublikasi “VETERAN” faxriy baynalmilal jangchilar Uyushmasining Qoraqalpogʻiston Respublikasi Amudaryo tuman boʻlimi rahbari Bahodir Jumaniyozov hamda uyushma aʼzosi Hamro Safarboyevlar mukofotlarni oʻz egalariga topshirdilar.

Taqdirlash marosimida bir guruh sobiq faxriy baynalmilalchi jangchilar ham ishtirok etishib, Yalgʻashboy Shomurodovning yoshlarni vatanparvarlik ruhida tarbiyalash borasida amalga oshirayotgan katta xizmatlarini mamnuniyat bilan eʼtirof etishdi va unga “VETERAN” faxriy baynalmilal jangchilar Uyushmasi oldidagi sharafli xizmatlari uchun “VETERAN” medalini topshirishdi.

Shuningdek, 12-sonli umumtaʼlim maktabining kutubxonachisi Muborak Mahmudovaga ham Uyushma tomonidan “Yoshlarni vatanparvarlik ruhida tarbiyalash uchun” medali topshirildi.

Darvoqe, inson qaysi sohada ishlashidan qatʼiy nazar, oʻsib kelayotgan yosh avlod taʼlim-tarbiyasiga masʼuliyat bilan yondashib, oʻzlari tanlagan yoʻnalishlar boʻyicha zarur koʻnikmalarga ega boʻlishlari uchun oʻz bilim va tajribalarini oʻrgatsa, ularning el-yurt fidoyilari safidan joy olishlariga yaqin koʻmakdosh boʻlsa u haqiqiy ustozdir.

Shu bois, Oʻqituvchi va murabbiylar kuni – umumxalq bayrami munosabati bilan oʻz sohalarining bilimdonlari va yoshlarni vatanparvarlik, istiqlol gʻoyalariga sadoqat ruhida, oʻz kasbining fidoyilari qilib tarbiyalashga qoʻshgan hissalari uchun barcha sohalarning fidoyilariga shogirdlari va davlatimiz tomonidan alohida hurmat va ehtirom koʻrsatiladi.

Yalgʻashboy Shomurodov va Muborak Mahmudovalar ana shunday hurmat, eʼtibor va ehtiromga munosib koʻrilgani mamlakatimizda ustozlik eʼtibor va eʼzozga, yuksak ehtiromga munosib koʻrilganining yaqqol isbotidir.

Robiya Yoʻldosheva.