1-SONLI MAKTABNING 100 YILLIGI KENG NIShONLANDI

Insoniyat hayotida muhim iz qoldiruvchi, hatto taqdirini goʻzal va nurli tomonga yoʻnaltirib, shaxs sifatida shakllanishida maʼnaviy-maʼrifiy jihatdan qoʻllab-quvvatlaguvchi maskan – bu maktabdir. Uning bagʻrida inson oq-qorani taniydi, qalbini ilm nuri bilan ziynatlab, dunyoga intiladi, oʻzi tugʻilib-oʻsgan ona zaminga, Vataniga mehr-muhabbat ruhida voyaga yetadi. Shu bois, biz uni umrbod yaxshi koʻramiz, mehr-u muhabbatga toʻla bagʻrida kechgan lahzalarni sogʻinib yashaymiz, “ona maktabim”, deya ezgu xotiralarimiz koʻshkida ardoqlaymiz. Ulugʻ bobokalonimiz Mahmudxoʻja Behbudiy hazratlari aytganlariday, hayotimizda biz bilgan imoratlar ichida “eng aziz va moʻʼtabari maktab” tomon intilaveramiz.

Bundan 100-yil muqaddam, Oʻrta Osiyoda milliy chegaralanish oʻtkazilgan 1924-yilning 27-oktyabr sanasida, Amudaryo tumanining Mangʻit shahrida hududdagi ilk ziyo maskani – hozirgi 1-sonli maktab tashkil etilib, ilmga chanqoq ilk oʻquvchilarni oʻz bagʻriga olgan edi. 1924-1925 oʻquv yilida mangʻitlik Matniyozboy ismli shaxsning uyida boshlangʻich maktab tarzida ochilgan mazkur maktabga oʻz taʼlim-tarbiyasi bilan el-u xalqimizga namuna boʻlsin, degan ezgu niyat bilan “Namuna” deb nom berildi.

“Namuna” maktabi haqiqatdan ham ilk oʻquv yilidanoq oʻz nomiga munosib yoshlarni tarbiyalash, ularga chuqur bilim berishga qodir taʼlim-tarbiya muassasasi sifatida namoyon boʻldi. Mamlakatimiz taʼlim-tarbiya sohasi tarixida chuqur iz qoldirgan tarixiy shaxslar – Xoʻjayoz afandi va Sodiq Matchonovlar faoliyat yuritgan “Namuna” maktabining birinchi oʻquvchilari va birinchi qaldirgʻochlari Jongil Ziyoddinova, Madat Matnazarov, Qurbonboy Jumaniyozov, Hayitboy Poʻlatov, Rahim Jumaniyozov va Kamol Niyozovlar boʻldilar.

1932-yildan 1938-yilgacha 7 yillik toʻliqsiz oʻrta, 1938-1939 oʻquv yilidan boshlab oʻrta maktab maqomida faoliyat olib borgan ushbu taʼlim maskani oʻzining 100 yillik tarixi davomida Amudaryo tumanidagi barcha oʻquv muassasalari uchun ham tayanch, ham tom maʼnoda yuksak namunali ilm dargohi vazifasini oʻtadi.

Mazkur maktab taʼlim-tarbiyasini olgan minglab bitiruvchilar orasida dunyoga taniqli ilm-fan fidoyilari, professor va akademik olimlar, ixtirochilar, davlat va jamoat arboblari bor. Xususan, fizika-matematika fanlari doktorlari, akademik MUxtor Saidov, ixtirochi-olim Amin Saidov, toponimika ilmining bilimdoni, filolog-olim Ahmad Ishayev, mashhur tarixchi-olim Qurbonboy Sobirov, filologiya fanlari doktori Pirmat Shermuhammedov, pedagogika fanlari doktori Ahmadjon Nurmatov, qishloq xoʻjalik fanlari doktori Ibodulla Ollayorovlarning nomlari Oʻzbekiston ilm-fani dargʻalari orasida hurmat va ehtirom bilan tilga olinadi.

Joriy yilning 11-noyabr sanasida mazkur taʼlim-tarbiya muassasasining 100 yilligi keng nishonlandi. Unda Qoraqalpogʻiston Respublikasi Maktabgacha va maktab taʼlimi Vazirining oʻrinbosari Oybek Davlatboyev, Amudaryo tumani hokimi Sobir Xoʻjametov, Amudaryo tumani prokurori Abat Jumamuratov, shuningdek, tuman hokimining oʻrinbosarlari, 1-sonli maktabda turli yillarda ishlab, nafaqaga chiqqan faxriy ustozlar, davlat va jamoat tashkilotlari rahbarlari, oʻzini-oʻzi boshqarish organlari masʼullari, maktabning sobiq bitiruvchilari hamda ayni paytda faoliyat yuritayotgan pedagog xodimlar va oʻquvchi-yoshlar ishtirok etdilar.

Tadbir avvalida mehmonlar maktabning 100 yillik tarixi haqida hikoya qiluvchi muzeyning ochilish marosimida ishtirok etdilar. Maktab direktori Dilrabo Sherbayeva rahbarligida tashkil etilgan muzeyni tuman hokimi Sobir Xoʻjametov ochdi va tarixiy eksponatlarga boy muzeyga yuqori baho berib, Amudaryo tumani umumiy tarixining asosi sifatida eʼtirof etdi. Marosim ishtirokchilari muzey eksponatlarini qiziqib tomosha qildilar va oʻzlarining samimiy dil soʻzlarini izhor etdilar.

Tantanali yubiley tadbirining adabiy-musiqiy qismini Amudaryo tuman hokimligi mutaxassisi Ashirboy Qoʻshayev ochdi va barchani tumandagi jamiki umumtaʼlim muassasalari uchun bir asr davomida namuna va tayanch vazifasini oʻtagan taʼlim maskanining 100 yilligi bilan tabriklab, maktab pedagogika jamoasiga bundan keyingi faoliyatlarida katta yutuqlar yor boʻlishini tiladi.

Shundan soʻng, mazkur maktabda uzoq yillar yoshlarga taʼlim-tarbiya bergan faxriy ustozlar va oʻzlarining fidoyi mehnatlari bilan el-yurt hurmatini qozongan oʻqituvchilarga Qoraqalpogʻiston Respublikasi Joʻqorgʻi Kengesi hamda Qoraqalpogʻiston Respublikasi Maktabgacha va maktab taʼlimi Vazirligining esdalik koʻkrak nishonlari, Faxriy yorliqlari tantanali ravishda topshirildi. Xususan, maktabning matematika fani oʻqituvchisi Sobir Matyoqubov “Vatan fidoyisi”, qoraqalpoq tili fani oʻqituvchisi Dildora Qoʻchqorova “Qoraqalpogʻiston Xalq taʼlimi aʼlochisi” koʻkrak nishonlari bilan, maktab direktori Dilrabo Sherboyeva, shuningdek, Anorgul Oʻrozimbetova, Aqljon Saidovalar Qoraqalpogʻiston Respublikasi Joʻqorgʻi Kengesining faxriy yorliqlari bilan taqdirlandilar.

Bundan tashqari, uzoq yillar yoshlarga taʼlim-tarbiya berib, ayni paytda keksalik gashtini surayotgan maktabning sobiq boshlangʻich sinf oʻqituvchisi Shukurjon Safarova hamda sobiq biologiya fani oʻqituvchisi Saidaxon Polvonovalarga “Ardaqli nuraniy” koʻkrak nishonlari, bir guruh oʻqituvchilarga tuman hokimining tashakkurnomalari va faxriy yorliqlari tantanali ravishda topshirildi.

Yubiley tadbiri davomida Amudaryo tumani madaniyat boʻlimi sanʼatkorlari tomonidan tayyorlangan kontsert dasturi namoyish etildi. Boʻlib oʻtgan yubiley tadbiri Amudaryo tumani Maktabgacha va maktab taʼlimi tizimidagi buyuk tarixiy voqea sifatida ishtirokchilarda katta taassurot qoldirdi.

Robiya Yoʻldosheva.