Yongʻin xavfsizligi oyligi doirasida tadbirlar oʻtkazilmoqda

15-noyabrdan 15-dekabrgacha mamlakatimiz boʻylab “Yongʻin xavfsizligi oyligi” tadbirlari oʻtkazilayotgani Amudaryo tumani Favqulodda vaziyatlar boʻlimi xodimlarini yanada samarali faoliyat olib borishga undamoqda. Oylik doirasida Amudaryo tumani ixtisoslashtirilgan maktabi oʻquvchilari bilan uchrashuv oʻtkazilib, unda yongʻinni oʻchirish texnikalari namoyish qilindi.

Oʻquvchilarga yongʻin xavfsizligi qoidalariga amal qilish, yoqilgʻi yoqiladigan moslamalarni qarovsiz qoldirmaslik, elektr uskunalarini faqat soz holatda ishlatish, yonuvchan materiallarini maxsus joylarda saqlash boʻyicha tavsiyalar berildi. Bundan tashqari, birlamchi yongʻin oʻchirish vositalari haqida maʼlumot berilib, yongʻin sodir boʻlganda harakatlanish tartibi boʻyicha maʼlumotlar berildi.

Shuningdek, masʼullar maktabda yongʻin xavfsizligini taʼminlash boʻyicha koʻrilgan choralar bilan yaqindan tanishib, isitish tizimi joylashgan qozonxonada havo almashinuvini taʼminlash, xavfsizlik talablariga qatʼiy rioya qilish, isitish qurilmalarini doimiy ravishda tekshirib, soz holatda ishlatish boʻyicha tavsiyalar berdilar. Barqaror isitish tizimlari ijtimoiy obʼektlarda sogʻlom muhitni taʼminlab, oʻquvchi va oʻqituvchilarning faoliyatiga ijobiy taʼsir koʻrsatishi alohida qayd etildi.

Oylik doirasida masʼullar ovul va mahallalarda boʻlib, aholi oʻrtasida tushuntirish ishlarini olib borishga ham eʼtibor qaratishmoqda. Maʼlumki, kunlar sovib, isitish tizimlari ishga tushishi bilan, aholi oʻrtasida is gazidan zaharlanishdek noxush hodisalar koʻproq sodir boʻla boshlaydi. Is gazi – rangi va hidi boʻlmagan zaharli gaz boʻlib, u uglerodning toʻliq yonimasligi natijasida paydo boʻladi. Bu gaz havo tarkibida yuqori kontsentratsiyada boʻlsa, inson salomatligiga jiddiy xavf soladi. Is gazi turli yoqilgʻilarning, jumladan, koʻmir, tabiiy gaz, yogʻoch yoki benzinning chala yonishi oqibatida paydo boʻladi. Havo yoʻli bilan organizmga kirgan is gazi qondagi gemoglobin bilan bogʻlanib, tana toʻqimalariga kislorod yetib borishiga toʻsqinlik qiladi, bu esa zaharlanishga olib keladi.

Mana shunday noxush holatlar sodir boʻlishining oldini olish, unga sharoit yaratib beruvchi sabablarni aniqlash va bartaraf etish hamda aholini ogohlikka chaqirish maqsadida masʼullar muntazam ravishda aholi xonadonlarida boʻlib, oʻrganishlar oʻtkazmoqda va tushuntirish ishlarini olib bormoqda.

Tahlillarga koʻra gaz moslamalaridan foydalanish jarayonlarida xavfsizlik qoidalariga rioya qilmaslik, yoqilgʻi yoqish tizimlaridagi nuqsonlar, yaʼni pechlar, gaz plitalari va qozonlar texnik holatining tekshirilmasligi, xona ichida havo aylanishining cheklanganligi, yaʼni ventilyator yoʻqligi yoki oynalarning ochmasligi, qozonxona yoki gaz plitalarining uy ichida joylashishi is gazidan zaharlanishning asosiy sabablari sirasiga kiradi.

Masʼullar koʻp qavatli uylarda, mahallalar va koʻchalarda boʻlib, aholi ishtirokida yigʻilishlar oʻtkazib, tushuntirish-targʻibot ishlarini olib bordilar hamda yongʻin xavfsizligi, xususan is gazidan zaharlanishning oldini olish boʻyicha zarur tavsiyalar berdilar.