67-sonli maktabda boʻlib oʻtgan bayram tadbiridan taassurotlar

Hech kim sizning hayotingizga daxl qila olmaydi, haq-huquqlaringizni poymol qilib, sizga zoʻravonlik qilishga hech kimning haqqi yoʻq. Har kim oʻz qilgan ishi uchun oʻzi javob beradi, birovning qilmishi uchun birov tovon toʻlamaydi... Chunki biz qonun ustuvor boʻlgan jamiyatda yashayapmiz. Chunki bizda har qadamda, har nafasda haq-huquqlarimizni himoya qiladigan, “Oʻzbekiston Respublikasida barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, eʼtiqodi, ijtimoiy kelib chiqishi, ijtimoiy mavqeidan qatʼi nazar, qonun oldida tengdirlar” deya eʼtirof etilgan Konstitutsiya bor! Ha, Konstitutsiya ana shunday muhim hujjat.

Har yili qomusimiz qabul qilingan sana munosabati bilan yurtimizdagi barcha taʼlim maskanlarida, idora va tashkilotlarda, maktablarda turli xil tadbirlar, bayram kechalari oʻtkaziladi. Albatta bunday tadbirlarning maqsadi yosh avlodga, fuqarolarga Konstitutsiyamizning mazmun-mohiyatini anglatish, undagi har bir moddaning jamiyat va insonlar hayotida tutgan oʻrnini uqtirish, oʻsib kelayotgan yosh avlod qalbiga qonun ustuvorligi, adolat, huquq kabi keng tushunchalarni singdirish va ularning huquqiy savodxonligini oshirishdan iborat.

Oʻzbekiston Respublikasi Prezidentining 2024-yil 17-oktyabrdagi “Oʻzbekiston Respublikasi Konstitutsiyasi kuni bayramiga tayyorgarlik koʻrish va uni oʻtkazish toʻgʻrisida”gi farmoyishi ijrosini taʼminlash maqsadida Amudaryo tumani Maktabgacha va maktab taʼlimi boʻlimiga qarashli 67-sonli maktabda bayram tadbiri oʻtkazildi.

Tadbirda maktab oʻqituvchilari hamda oʻquvchilari qatnashdi. Dastlab, tadbirni maktab direktori Hamro Tursunboyev kirish soʻzi bilan ochib  berdi va barcha oʻqituvchilar va oʻquvchilarni Bosh qomusimiz boʻlgan Konstitutsiyamizning 32 yilligi bilan muborakbod etdi. Yuraklarni faxr va iftixor tuygʻulariga toʻldirib Oʻzbekiston va Qoraqalpogʻiston Respublikalari davlat madhiyalari yangradi. Yigʻilganlar qoʻllarini koʻksida tutib, bugungi dorilamon kunlarga shukronalar aytishdi.

Tadbirda maktabning huquq fani oʻqituvchisi Oybek Boltaboyev soʻzga chiqib, oʻquvchilarni bayram bilan tabrikladi, Konstitutsiya va qonunlarning hayotimizda tutgan ahamiyati toʻgʻrisida soʻz yuritdi.

Shundan soʻng, tadbir davomida oʻquvchilarning huquqiy savodxonligini oshirish maqsadida yangi tahrirdagi Konstitutsiyaga oid bir qancha maʼlumotlar berib oʻtildi. Oʻquvchilar Bosh qomusimizdan oʻrin olgan moddalarning ayrimlariga toʻxtalib, ularni tengdoshlariga yoddan aytib berishdi.

Shundan keyin, tadbirning badiiy qismiga navbat berildi. Maktab oʻquvchilari ijrosida dilrabo qoʻshiqlar yangradi. Oʻquvchi qizlar Konstitutsiya haqidagi yod olgan sheʼrlarini aytib berdilar.

Tadbir soʻngida 67-sonli maktabning boshlangʻich sinf oʻquvchilari oʻrtasida “Husnixat ham bir sanʼat” mavzusida oʻtkazilgan koʻrik tanlovning gʻoliblari aniqlandi va tanlovda qatnashib, gʻoliblikni qoʻlga kiritgan oʻquvchilarga faxriy yorliqlar topshirildi, sovgʻa tariqasida oʻquvchilarga badiiy kitoblar taqdim etildi.

Bugungi kunda inson qadr-qimmati, uning huquqlari, erkinliklari va qonuniy manfaatlarini taʼminlash gʻoyasi davlatimizning butun ichki va tashqi siyosatining tamal toshiga, Yangi Oʻzbekistonda olib borilayotgan demokratik islohotlarning eng muhim harakatlantiruvchi kuchiga hamda ushbu ezgu saʼy-harakatlarni oʻzaro bogʻlab turuvchi muhim omilga aylandi. Shunday ekan, Bosh qomusimizdan joy olgan moddalarning mohiyatini anglash, haq-huquqlarimizni bilishimiz va amalda ularni qoʻllay olishimizda huquqiy ong va huquqiy savodxonlikning ahamiyati katta. Shu jihatdan olib qaraydigan boʻlsak, oʻtkaziladigan bu kabi tadbirlar oʻquvchilar uchun ham, jamoatchilik uchun ham birday ahamiyatlidir.

Aziza Madrahimova