TUMANIMIZDA “XAVFSIZ HUDUD” MAXSUS PROFILAKTIK NAZORAT TADBIRLARI AMALGA OShIRILMOQDA

Mamlakatimizda amalga oshirilayotgan islohotlar doirasida aholining tinch va osoyishta hayotini taʼminlash hamda jamiyatda qonunlarimizga hurmat va itoatkorlik, fuqarolar oʻrtasida jamoat xavfsizligi madaniyatini shakllantirishga alohida eʼtibor qaratilmoqda. Xususan, soha masʼullari tomonidan joylarda jamoat xavfsizligini taʼminlashga qaratilgan profilaktik chora-tadbirlar rejasi ishlab chiqilib, amaliyotga joriy etilayotgani bu boradagi ishlar natijadorligini oshirmoqda.

Oʻzbekiston Respublikasi Ichki Ishlar Vazirligi Jamoat xavfsizligi xizmati Yoʻl harakati xavfsizligi boshqarmasining 2024-yil 11-noyabrdagi Farmoyishiga asosan qabul qilingan Qoraqalpogʻiston Respublikasi Ichki Ishlar Vazirligining farmoyishiga koʻra, 2024-yilning 11-noyabr va 2025-yil 2-yanvar kunlari oraligʻida Qoraqalpogʻiston Respublikasida “Xavfsiz hudud” maxsus profilaktik dolzarb 50 kun sifatida belgilanib, ishchi guruh tarkibi tasdiqlangan edi. Ayni kunlarda ishchi guruh tomonidan Amudaryo tumanida ham dolzarb 50 kun doirasida profilaktik nazorat tadbirlari amalga oshirilmoqda.

Nazorat tadbirlari jarayonida Yoʻl harakati xavfsizligi boshqarmasi xodimlari tomonidan aholiga jamoat xavfsizligi toʻgʻrisida tushunchalar ham berib borilmoqda.

Avvalo, jamoat xavfsizligi – bu shaxs, jamiyat va davlatning hayotiy manfaatlarini toʻsqinliksiz amalga oshirishni taʼminlash, turli koʻrinishdagi xavf-xatarlarning oldini olish va bartaraf etishga qaratilgan jamoat munosabatlari ekanligi, fuqarolar va davlatning osoyishtaligiga, insonlarning salomatligiga xavf soluvchi har qanday hatti-harakatlarning kelib chiqishiga qarshi tez va ishonchli choralar koʻrish, bu boradagi fuqarolarning burch va majburiyatlari toʻgʻrisida masʼullar tomonidan atroflicha maʼlumotlar taqdim etilib, yoʻllarda harakatlanish madaniyatiga amal qilish zarurligi haqida tushuntirishlar, tavsiyalar berilmoqda.

Shuni alohida qayd etish kerakki, soʻnggi yillarda xalqimizning iqtisodiy farovonligi oshib, deyarli har 5 xonadondan birida yengil avtomobil yoki skuterlar mavjud. Oddiy, xalqona til bilan aytganda, yoʻllarimiz toʻla mashina. Bu farovonlik biz uchun qanchalik yoqimli boʻlishidan qatʼiy nazar, yoʻllarda ehtiyotkorlik va ogohlikni unutishga haqqimiz yoʻq. Chunki salgina ehtiyotsizlik tuzatib boʻlmas xatolarni keltirib chiqarishi, yoʻl harakati qoidalariga amal qilmaslik insonlar oʻlimiga yoki umrbod nogiron boʻlib qolishlariga olib kelishi hech gap emas.

Shuningdek, jamoat joylarida, toʻyxonalar, istirohat bogʻlari, umumtaʼlim muassasalari, bozorlar atrofida spirtli ichimlik taʼsirida shovqin koʻtarish, begunoh fuqarolarni haqoratlash, taʼlim-tarbiya jarayoniga, insonlarning dam olish, hordiq chiqarish damlariga salbiy taʼsir koʻrsatuvchi xatti-harakatlar sodir etishga moyil huquqbuzar fuqarolarning jamiyatda oʻzini tutish qoidalariga amal qilmasliklari oqibatida kelib chiqadigan koʻngilsiz hodisalar tufayli ayrim holatlarda bunday shaxslarga nisbatan qonuniy choralar koʻrilayotgani ham sir emas.

Bu kabi koʻngilsiz hodisalarning oldini olish maqsadida ishchi guruh aʼzolari tomonidan Amudaryo tumanining barcha hududlarida nazorat tadbirlari amalga oshirilmoqda.

Joriy yilning 11-noyabr sanasidan boshlangan dolzarb 50 kunlik “Xavfsiz hudud” maxsus profilaktik nazorat tadbirlari 2025-yil 2-yanvargacha davom etadi va mazkur tadbir doirasida rejaviy asosda tumanimiz aholisining xavfsizligi va osoyishtaligini taʼminlashga qaratilgan “Tigʻ”, “Xavfsiz tun”, “Yoʻl qoidasi – umr foydasi”, “Svetofor” kabi maʼrifiy suhbatlar, tushuntirish-targʻibot ishlari ham olib boriladi.

Qadrli yurtdoshlar, jamoat xavfsizligini taʼminlashga hissa qoʻshish har bir fuqaroning ishi. Chunki har qanday xavf-xatardan xoli hududda rivojlanish va taraqqiyot, tinchlik hokim boʻladi, oilalarda xotirjamlik hukm suradi. Xotirjamlik esa har bir insonga baxtiyorlik baxsh etadi. Yaqinlashib kelayotgan Yangi yil bayrami arafasida har biringizni jamoat xavfsizligini taʼminlashga munosib hissa qoʻshishga chaqiramiz.

Robiya Yoʻldosheva.