1-sonli maktabda Yangi yil munosabati bilan tadbir boʻlib oʻtdi

Yangi yil – qalblarga oʻzgacha quvonch va hayajon ulashuvchi, kattalarni ham bir zumga bolalikka qaytaradigan ajib moʻʼjizaviy bayram! Ushbu bayram shukuhi kezib yurgan pallalarda xonadonlarimiz goʻzalikka burkanadi. Uyimiz toʻridan joy olgan archaning shoxlariga turli bezaklarni ilib, kichkintoylarga qoʻshilib, biz ham suyunamiz. Ha, Yangi yil kayfiyati yurtdoshlarimizni ancha vaqtgacha tark etmaydi. Uyimizdagi mehr ila bezatilgan zarlar esa, to qish tugamaguncha olib tashlanmaydi. Albatta, bu odamlarning naqadar Yangi yilni sevishidan dalolat. Uning boshqa bayramlardan farqi ham shunda.

Shu bilan birga, Yangi yil yurtimizdagi barcha muassasa va tashkilotlarda, taʼlim maskanlarida koʻtarinki ruhda nishonlanadi. Joylarda bayram munosabati bilan oʻtkazilayotgan tadbirlarning biri ikkinchisini takrorlamaydi. Har bir bayram tadbirining oʻziga xos tomoni bor. Masalan, yaqindagina Amudaryo tumanidagi 1-sonli umumtaʼlim maktabida oʻtkazilgan “Moʻʼjizaviy yangi yil”  mavzusi ostida tashkil qilingan bayram tadbirini boshlovchilar oʻzbek tilidan tashqari, rus va ingliz tillarida ham olib borishdi. Bu esa, bayram kechasining nafaqat oʻzgacha oʻtishini taʼminladi, balki bayramda qatnashayotgan boshqa oʻquvchilarning ham chet tillari boʻyicha savodxonligining ortishiga hissa qoʻshdi.

Bayram sahnasi rang-barang dekoratsiyalar va qishki manzaralar tushirilgan rasmlar, yulduzchalar bilan bezatildi. Bu esa, yigʻilganlarning koʻngillariga bayramona ruh olib kirdi.

Bayram tadbirini maktab direktori Dilrabo Sherboyeva ochib berdi hamda oʻqituvchilarni va oʻquvchilarni bayram bilan tabriklab, ularning oʻqish va ishlarida zafarlar tiladi.

Shundan soʻng bayram tadbirining badiiy qismiga navbat berildi. Sahnada turli yoshdagi oʻquvchilar jozibali raqslarga tushib, yigʻilganlarga bayramona kayfiyat ulashdi. Keyin esa, bazmga Qorbobo va Qorqiz tashrif buyurib, bolajonlarga bayram sovgʻalarini taqdim etdilar. Ular bilan birgalikda qish faslining tarovati, goʻzalliklari haqida suhbatlashdilar. Boshlangʻich sinf oʻquvchilari sahnaga chiqib, oʻzlarining qish va yangi yil haqidagi sheʼr va qoʻshiqlarini aytib berishdi. Ayniqsa, 6-sinf oʻquvchilarining “Jingle Bells” qoʻshigʻiga raqsga tushishi davraga oʻzgacha fayz bagʻishladi.

Shuningdek, bolajonlarning sevimli ertaklaridan biri boʻlgan “Oppogʻoy va yetti gnom” ertagi asosida sahnalashtirilgan bayram ertagi tomoshasi yigʻilganlarni bir zumga ertaklar olamiga olib kirganday boʻldi. Shu tariqa bayram kechasi bir-biridan ajoyib bayram qoʻshiqlari ijrosi bilan davom etdi.

Ayniqsa, oʻquvchilar ijrosida yangragan “Buratino”, “Kalinka”, “Ten ten nad vodoy”, “Sneg idyot” kabi qoʻshiqlar va raqslar bayram qatnashchilarining olqishlariga sabab boʻldi. Tadbir oʻquvchilarda olam-olam taassurot qoldirdi.

Albatta, bu kabi tadbirlar oʻquvchilarda ijodiy qobiliyatlarini shakllantirgani, bir-birlari bilan oʻzaro hamjihatlikda ishlashish koʻnikmalarini oʻstirishi, jamoa boʻlib, oʻz isteʼdodlarini rivojlantirishi, shuningdek, darsdan tashqari boʻsh vaqtini mazmunli oʻtkazgani bilan ahamiyatlidir.

Soʻzimiz avvalida Yangi yil kattalarni ham bir zumga bolalikka qaytaradi, deb aytgan edik. Ha, chindan ham shunday. Sababi, Yangi yilda har bir inson qachonlardir Qorbobodan sovgʻa kutgan. Derazadan moʻralab, Qorbobo kelishini intiqlik bilan sogʻingan. Ulgʻaygach esa, koʻpchilik Yangi yil arafasida yaqinlaridan bayram tabriklari, bayram sovgʻalari qabul qilishadi. Kimdir farzandidan, kimdir esa qoʻshnisidan, qarindoshidan.

Soʻzimiz soʻngida ana shu sovgʻalarga qoʻshaloq tarzda, kirib kelgan yangi 2025-yil insonlarga kutilmagan hadyalar va kutilmagan xushxabarlarni tortiq qilsin, deymiz.

Aziza Madrahimova