Tuman Prokuraturasi: bosh maqsad — qonun ustuvorligi va adolatni taʼminlashdan iborat

Oʻzbekiston Respublikasining 2016-yil 19-dekabrda qabul qilingan qonuni bilan 8-yanvar – Oʻzbekiston Respublikasi prokuratura organlari xodimlari kuni etib belgilangan. Prokuratura organlari davlat va jamiyatning barqaror taraqqiyotini taʼminlashda muhim rol oʻynaydi. Ularning asosiy vazifalari qonun ustuvorligini taʼminlash, huquqbuzarliklarning oldini olish va adolatni taʼminlashdan iborat.

Amudaryo tumani Prokuraturasi xodimlari ham “Prokuratura toʻgʻrisida”gi Oʻzbekiston Respublikasi qonuniga muvofiq idoralar, fuqarolarning oʻzini oʻzi boshqarish organlari, jamoat birlashmalari, korxonalar, muassasalar, tashkilotlar va boshqa mansabdor shaxslar tomonidan qonunlarning ijro etilishi ustidan nazorat oʻrnatishda faollik koʻrsatib kelmoqda. Shu maqsadda muntazam ravishda oʻrganishlar oʻtkazilib, natijalari boʻyicha qonuniy choralar koʻrib kelinmoqda.

Tuman prokurorining oʻrinbosari Omirbay Xudaybergenov tomonidan tuman Ichki ishlar boʻlimi Jamoat xavfsizligi boʻlinmasi Yoʻl harakati xavfsizligi xizmati xodimlari ishtirokida oʻtkazilgan yigʻilishda toʻy sayllari chogʻida avtotransport vositalarining guruh boʻlib harakatlanishi yoʻl harakati xavfsizligiga jiddiy tahdid solayotgani qayd qilinib, bu borada huquqbuzarlar ishtirokida tushuntirish ishlari olib borildi.

Toʻy sayllarida haydovchilar oʻrtasida bellashuvlar oʻtkazish holatlari yoʻllarda toʻqnashuv xavfini oshirib, avtomashina ichidagi yoʻlovchilar va yoʻl harakatining boshqa ishtirokchilari hayotini xavf ostiga qoʻyishi mumkinligi taʼkidlanib, bunday noxush holatlarning oldini olish boʻyicha koʻrsatmalar berildi.

Amudaryo tumani prokurorining yordamchisi Sanjar Abdullayev tuman Kambagʻallikni qisqartirish va bandlikka koʻmaklashish boʻlimida oʻtkazilgan oʻrganish davomida sohada qonun buzilish holatlarining oldini olish hamda qonunchilikka rioya qilish jamiyatning ijtimoiy-iqtisodiy barqarorligini taʼminlash uchun muhim ahamiyatga ega ekanligini qayd qildi. Shu maqsadda kambagʻallikni qisqartirishga qaratilgan dasturlarni moliyalashtirishda korruptsiyaning oldini olish uchun barcha jarayonlarni shaffoflashtirish, davlat yordami va bandlikni taʼminlashga qaratilgan dasturlarning amalga oshirilishi ustidan jamoatchilik nazoratini kuchaytirish, bandlik xizmatlari va ijtimoiy yordam taqdim etishda aniq va shaffof tartiblarni ishlab chiqish muhimligi qayd qilindi.

Uchrashuvda kambagʻallikni qisqartirish va bandlikka koʻmaklashish maqsadida ajratilgan mablagʻlarning noqonuniy sarflanishiga yoʻl qoʻymaslik, boʻlim tomonidan aholiga xizmatlar koʻrsatishda korruptsiya va taʼmagirlik holatlarining oldini olish, kambagʻallikni qisqartirish va bandlikni taʼminlash sohasida faoliyat olib borayotgan xodimlarning huquqiy bilimlarini oshirish uchun muntazam oʻquv kurslarini tashkil qilish, aholi bilan ishlashda xodimlarning etika meʼyorlariga rioya qilishi boʻyicha tushuntirish ishlarini olib borildi. 

Amudaryo tumani prokurorining katta yordamchisi Sharyar Joldasov tomonidan tuman elektr taʼminoti korxonasida elektr energiyasidan noqonuniy foydalanish xolatlarining oldini olish, bunday holatlar aniqlanganda huquqni muhofaza qiluvchi organlarga xabar berish, elektr taʼminotidagi avariyaviy holatlarning oldini olish maqsadida korxona xodimlari ishtirokida uchrashuv oʻtkazildi.

Uchrashuvda elektr taʼminoti sohasida qonun buzilish holatlarining oldini olish davlatning iqtisodiy barqarorligi, jamiyat farovonligi va xavfsizlikni taʼminlash uchun muhim ahamiyatga ega ekanligi qayd qilindi.

Elektr energiyasiga boʻlgan talabning oshib borishi sharoitida uning oqilona taqsimoti hamda oʻz vaqtida amalga oshiriladigan hisob-kitob ishlari bu sohadagi samaradorlik va barqarorlikni taʼminlaydi. Masʼullarga tarmoqqa noqonuniy ulanishlar va energiya oʻgʻriliklarining oldini olish, qurilmalarni qonunga xilof ravishda oʻzgartirish, hisoblagichlarni oʻzboshimchalik bilan sozlashga harakat qilish kabi holatlarga barham berish, shu maqsadda muntazam ravishda reydlar oʻtkazish lozimligi qayd qilindi.

Shuningdek, Amudaryo tuman Prokuraturasi tomonidan qurilishga oid davlat dasturlari ijrosi ahvoli ham oʻrganilmoqda. Amudaryo tumani prokurorining katta yordamchisi Sharyar Joldasov Oʻzbekiston Respublikasi Prezidentining 2021-yil 18-sentyabrdagi “Islom taraqqiyot banki va OPEK xalqaro taraqqiyot jamgʻarmasi ishtirokida qishloq joylarni barqaror rivojlantirish loyihasini amalga oshirish chora-tadbirlari toʻgʻrisida”gi qaroriga asosan Amudaryo tumanining Olmazor mahallasi hududida 120-oʻrinli, Arna boʻyi mahallasi hududida 150-oʻrinli yangi maktabgacha taʼlim tashkiloti binosini qurish ishlarining borishi bilan tanishdi.

Oʻrganish davomida obʼektlarni oʻz muddatida va sifatli topshirish, ishchi kuchi va maxsus texnikalar sonini koʻpaytirish orqali ishlarni jadallashtirish, qurilish materiallarini mahalliy ishlab chiqaruvchilardan xarid qilish va  energotejamkor uskunalardan foydalanish lozimligi taʼkidlanib, ishchilarni rasmiy sektorga oʻtkazish boʻyicha topshiriqlar berildi.

Bundan tashqari, tumandagi Doʻstlik mahallasi hududida qurilayotgan “Yangi Oʻzbekiston” massivlarida amalga oshirilayotgan qurilish ishlar ahvoli ham koʻzdan kechirilib, koʻp qavatli uylarni oʻz muddatida va sifatli holda foydalanishga topshirish boʻyicha koʻrsatmalar berildi.

Qonunchilikka muvofiq prokuratura organlari qonunlar ijrosini nazorat qiladi va barcha fuqarolar, tashkilotlar hamda davlat organlari qonunlarga amal qilishini taʼminlaydi. Bu jamiyatda adolat va huquqiy tartibotni mustahkamlaydi. Fuqarolarning huquqlari va erkinliklari buzilganda prokuratura organlari ularni tiklash uchun choralar koʻradi. Buning natijasida jamiyatda huquqiy xavfsizlik va ijtimoiy barqarorlik taʼminlanadi. Shunday ekan, davlat va jamiyat taraqqiyotida prokurata organlari xizmatchilarining oʻrni nihoyatda ahamiyatlidir. Fursatdan foydalanib, soha xodimlarini kasb bayramlari bilan tabriklab, sharafli va masʼuliyatli ishlarida omad va zafarlar tilaymiz!

Gʻ.Yeshniyozov