MAHMUDXOʻJA BEHBUDIY TAVALLUDINING 150 YILLIGIGA BAGʻIShLANGAN TADBIR OʻTKAZILDI

Inson hayotida ilm-maʼrifatning oʻrnini hech narsa bilan qiyoslab boʻlmaydi. U biz uchun yoʻlchi yulduz misoli. Bugungi shiddatli axborot asrida yosh avlod tarbiyasiga jiddiy qarash zaruriy ehtiyojga aylandi. Shunday ekan, yurtimizda ham muhim islohotlar olib borilayotgan bir paytda, davr talablariga mos, har tomonlama barkamol, mustaqil fikrlaydigan, masʼuliyatli, tashabbuskor, zamonaviy texnologiyalarni mukammal oʻzlashtirgan, shijoatli va iqtidorli yoshlarni tarbiyalash eng dolzarb masalalardan biri hisoblanadi.

Prezident maktablari tizimidagi Amudaryo ixtisoslashtirilgan maktabi pedagogik jamoasi ham shu maqsad yoʻlida harakat qilishmoqda. Bu borada oʻquvchilarning erishayotgan yutuqlari ham quvonarli. Ayniqsa, noanʼanaviy uslubdagi dars mashgʻulotlari, darsdan tashqari tashkil qilinayotgan turli fakultativ kurslar va iqtidorli yoshlarning qobiliyatlarini rivojlantirishga qaratilgan toʻgaraklar oʻquvchilarning istiqboli uchun oʻzining samarali taʼsirini koʻrsatib kelmoqda.

Ayni kunlarda maktabda jadid bobomiz Mahmudxoʻja Behbudiy tavalludining 150 yilligiga bagʻishlangan adabiy-badiiy kechalar oʻtkazilib, bu tadbirlarga deyarli barcha sinflarning oʻquvchilari qamrab olinmoqda.

Ana shunday maʼnaviy-maʼrifiy tadbirlardan biri Amudaryo tuman Axborot-kutubxona markazi xodimlari bilan hamkorlikda oʻtkazildi. “Mahmudxoʻja Behbudiy ­– buyuk maʼrifatparvar olim” mavzusida oʻtkazilgan tadbirni tashkil etishda maktabning “Turon” teatr toʻgaragi oʻquvchilari faol ishtirok etishdi. Shuningdek, Amudaryo tuman Axborot-kutubxona markazi xodimlari tomonidan Mahmudxoʻja Behbudiy ijodiga mansub asarlar, buyuk bobokalonimizning jadidchilik faoliyatiga oid tarixiy adabiyotlar, suratli lavhalardan iborat koʻrgazma ham namoyish qilinib, oʻquvchilar tomonidan Behbudiy haqida maʼruzalar oʻqildi, turli sahna koʻrinishlari, viktorina oʻyinlari, sheʼrlar va kuy-qoʻshiqlar ijro qilindi.

Tadbir davomida oʻquvchilarga jadidchilik haqida keng tushunchalar berildi. Unga koʻra, jadidchilik oqim emas, balki harakatdir. Bu – ijtimoiy, siyosiy, maʼrifiy harakat ekanligi yuzasidan fikrlar aytilib, yaqin kunlargacha ham u faqat maʼrifatchilik harakati deb kelinganligi toʻgʻrisidagi maʼlumotlar taqdim etildi. Aslida esa bu harakat oʻzining samarali faoliyati bilan jamiyatning barcha qatlamlarini jalb eta olgani va uygʻonish mafkurasi boʻlib xizmat qilgani, mustaqillik uchun kurash olib borgani toʻgʻrisida mufassal soʻz yuritilib, buyuk bobokalonimiz Mahmudxoʻja Behbudiyning bu boradagi beqiyos katta xizmatlari faxr bilan eʼtirof etildi.

Xususan, uning gʻayrati va tashabbusi bilan dunyo koʻrgan Turkiston muxtoriyati bu yoʻldagi amaliy harakatning dastlabki natijasi boʻldi. Shu barobarida maorif va madaniyatni, matbuotni ijtimoiy-siyosiy maqsadlarga moslab, qayta ishlab chiqdi. Jadidchilik harakatining mazmun-mohiyati haqida, Mahmudxoʻja Behbudiy va bobomizning zamondoshlari boʻlgan jadidchilik harakati aʼzolarining ilm-maʼrifat yoʻlida qilgan ezgu ishlari haqida tadbirda yoshlarga yetarlicha maʼlumotlar berildi.

Bundan tashqari, Behbudiy tavalludining 150 yilligiga bagʻishlab oʻquvchilar orasida insholar tanlovi va ochiq dars ham tashkil qilindi. Tanlov yakunlariga koʻra 8-02-sinf oʻquvchisi Ruxsora Ziyatboyeva yozgan insho eng yaxshi yozilgan insho deb eʼtirof etildi va 1-oʻringa munosib koʻrildi. 2-oʻringa 9-01-sinf oʻquvchisi Diana Jumaboyeva, 3-oʻringa esa 8-02-sinf oʻquvchisi Rayhona Erdosheva yozgan insholar munosib deb topildi.

Behbudiyning hayoti va faoliyatiga bagʻishlangan ochiq darsni maktabning ona tili va adabiyot fani oʻqituvchisi Yulduz Tursunboyeva tashkillashtirdi. U mazkur darsi orqali 9-03-sinf oʻquvchilariga Mahmudxoʻja Behbudiyning oʻz faoliyati davomida Turkistonda jadidchilikni rivojlantirishga qoʻshgan mislsiz katta hissasi xususida batafsil tushunchalar berdi.

Mahmudxoʻja Behbudiy xotirasiga yuksak ehtirom ruhida oʻtkazilgan mazkur maʼnaviy-maʼrifiy tadbirni tashkillashtirishda maktab direktorining maʼnaviy-maʼrifiy ishlar boʻyicha oʻrinbosari Muyassar Rahmatullayeva, ona tili fani oʻqituvchilari hamda Amudaryo tuman Axborot-kutubxona markazi xodimlari oʻzaro hamkorlik qilishdi.

Hamkorlikdagi saʼy-harakatlar zamirida esa yoshlarni ilmga qiziqtirish, ularga toʻgʻri yoʻnalish berish, ustozlar bilan ishlash, turli sohalarga oid bilimlarini, ayniqsa, kasb-hunar egallashga boʻlgan intilishlarini ragʻbatlantirish, oʻsib kelayotgan yosh avlod qalbida buyuk ajdodlarimiz xotirasiga va ularning maʼnaviy merosiga chuqur hurmat tuygʻusini uygʻotish kabi ezgu niyatlar mujassam.

Yulduz TURSUNBOYeVA, maktabning ona tili va adabiyot fani oʻqituvchisi