Amudaryo tumanida “Aholining tomorqa va ijara yerlaridan samarali foydalanish orqali daromadlarini oshirish chora-tadbirlari” mavzusida Qoraqalpogʻiston miqyosidagi koʻrgazmali seminar boʻlib oʻtdi

Soʻnggi yillarda mamlakatimizda dehqon xoʻjaliklari va tomorqa yer egalariga ajratilgan maydonlardan samarali foydalanish, ularning huquqlari va qonuniy manfaatlarini himoya qilish, qishloq aholisining bandligi va turmush darajasini oshirish boʻyicha tizimli ishlar amalga oshirilmoqda.

Muhtaram Prezidentimiz tomonidan joriy yilning 30-yanvar sanasida oʻtkazilgan yigʻilishida tomorqa va dehqonchilik yerlarida yuqori daromadli ekinlar yetishtirish boʻyicha yangi tashabbuslar ilgari surildi hamda bu borada qator ustuvor vazifalar belgilab berildi.

28-fevral kuni Amudaryo tumanida davlatimiz rahbari tomonidan belgilab berilgan yangi tizim asosida “Aholining tomorqa va ijara yerlaridan samarali foydalanish orqali daromadlarini oshirish chora-tadbirlari” mavzusida Qoraqalpogʻiston Respublikasi miqyosidagi koʻrgazmali seminari boʻlib oʻtdi. Unda Oʻzbekiston Respublikasi Prezidentining maslahatchisi Tursunxon Xudaybergenov, Oʻzbekiston Respublikasi Prezidenti maslahatchisining oʻrinbosari ­– Prezident Xalq qabulxonasi rahbari Ulugʻbek Muhammadiyev, Oʻzbekiston Respublikasi Bosh vazirining oʻrinbosari – Oila va xotin-qizlar qoʻmitasi raisi Zulayho Mahkamova, Qoraqalpogʻiston Respublikasi Joʻqorgʻi Kengesi Raisi Amanbay Orinbayev, Vazirlar Kengashining Raisi Farhod Ermanov ishtirok etdi.

Shuningdek, mazkur koʻrgazmali seminarda respublikadagi tegishli tashkilotlar masʼullari, barcha tumanlarning sektorlar rahbarlari, ogʻir toifaga kiritilgan mahallalar masʼullari qatnashdilar.

Dastlab mehmonlar “Qipchoq” shaharchasi hududidagi “Hoji Eshon bobo” jomʼe masjidiga tashrif buyurishdi. Masjidda muborak Ramazon oyida respublikada boshlanayotgan ishlarning xayrli boʻlishi uchun Qurʼon tilovat qilinib, duoga qoʻl ochildi.

Seminar doirasidagi keyingi manzilda ishtirokchilar Jayxun ovulida “Nukus Dilisha” MChJ tomonidan ishga tushirilgan “Un ishlab chiqarish” loyihasining ochilish marosimida ishtirok etishdi. Mehmonlar tumanda ishlab chiqarish salmogʻini yuksaltirishga katta hissa qoʻshadigan un ishlab chiqaruvchi korxona faoliyati bilan yaqindan tanishdilar. Shuningdek, mehmonlar eʼtiboriga tumandagi tadbirkor va hunarmandlar tomonidan ishlab chiqarilayotgan mahsulotlar koʻrgazmasi ham taqdim etildi.

Maʼlumot oʻrnida aytish joizki, “Nukus Dilisha” MChJning tashabbuskor rahbari Bahrom Yoʻldashev tomonidan qiymati 15 mlrd. soʻmlik mazkur un ishlab chiqarish loyihasi ishga tushirilishi natijasida 51 ta yangi ish oʻrinlari yaratilishi rejalashtirilmoqda.

Seminar ishtirokchilari Choykoʻllik Mahmud Norbayev tomonidan tomorqa va dehqon xoʻjaligidan samarali foydalanish maqsadida amalga oshirilayotgan ishlar bilan ham yaqindan tanishdilar. Tomorqachi yurtimizda tadbirkorlik uchun yaratilayotgan imkoniyatlardan samarali foydalanib, imtiyozli kredit mablagʻlari evaziga tashkil etgan issiqxonasida 30 nafardan ortiq ishsiz xotin-qizlarni mavsumiy ish bilan taʼminlab kelmoqda.

Mahmud Norboyev dastlab 2022-yilda mahalladagi hokim yordamchisi tomonidan 33 mln. soʻm miqdorida kredit olib, tomorqasida 9 sotix issiqxona tashkil qilish orqali oʻz faoliyatini boshlagan. Shuningdek, tadbirkor faoliyatini kengaytirish maqsadida Oʻzbekiston Respublikasi Prezidentining 306-sonli qaroriga asosan 230 mln. soʻm kredit olib, 1,5 gektar yer ijaraga olgan va bu yerda qoʻshimcha 21 sotix issiqxona tashkil qilgan. Bugungi kunda jami 30 sotix issiqxonada pomidor va bodring yetishtirilmoqda. Ekilgan har bir koʻchatdan oʻrtacha 5 kg hosil olinib, ichki bozorlarga sotilishi natijasida tomorqachi bir yil davomida 300 mln. soʻmgacha daromad olmoqda.

Seminar davomida Choykoʻl ovuli hududida “Yashil makon” umummilliy loyihasi doirasida daraxt koʻchatlarini ekish tadbiri ham tashkil etilib, unda 2 gektar yer maydonga yaxshi niyatlar bilan mevali daraxt koʻchatlari ekildi. Tadbirda yoshlar, nuroniylar, Respublika, shahar va tuman sektor rahbarlari ishtirok etdi.

Keyingi manzilda respublika koʻrgazmali seminari ishtirokchilari Oʻrta qalʼa ovulida oʻz tomorqasining 1 gektar maydonida issiqxona tashkil qilib, moʻl hosil olayotgan Rustam Yusupovning faoliyati bilan tanishdilar va aholi tomonidan kooperatsiya asosida tashkil qilingan issiqxonalarda koʻchat va sabzavotlar yetishtirish faoliyatini koʻzdan kechirdilar.

2023-yilda 1 gektar maydonda tashkil etilgan issiqxonada pomidor, bodring mahsulotlari yetishtirilayotgan boʻlib, har yili jami 50 tonnadan ortiq hosil olinmoqda va tomorqachi 500 mln. soʻm atrofida daromad koʻrmoqda.

Shundan soʻng mehmonlar Chordara mahallasida joylashgan “Tomorqa xizmati” MChJning bazasida boʻlib, faoliyati bilan yaqindan tanishdilar. Jamiyat tomonidan aholi tomorqasiga 12 yoʻnalishdagi xizmatlar koʻrsatish yoʻlga qoʻyilgan boʻlib, 1 gektar maydonda issiqxona tashkil etilgan. Ishtirokchilar jamiyatning aholining tomorqasidan koʻproq daromad olishiga koʻmaklashishga qaratilgan choralar, shu yoʻnalishda olib borilayotgan ishlar bilan yaqindan tanishdi. Shuningdek, tadbir davomida faol tomorqa egalari va fermer xoʻjaliklari rahbarlariga maxsus texnikalar tantanali ravishda topshirilib, hurmatli Prezidentimizning Qoraqalpogʻiston uchun alohida qabul qilingan qaror va farmonlari asosida yaratilgan imkoniyatlar haqida keng toʻxtalib oʻtildi.

Qayd etish joizki, jamiyat tomonidan 700 tonnalik sovutgichli omborxona, 40 ming dona joʻja chiqarish inkubatoriyasi, kuniga 1000 litr sutni qabul qilish va qayta ishlash tsexi, yiliga 3000 tonna mosh va 2000 tonna kunjut mahsulotlarini qayta ishlash, 400 tonna mevani quritish tsexlari tashkil qilingan boʻlib, 75 ta yangi ish oʻrinlari yaratilgan. Buguni kunda tumandagi 37 ming xonadon tomorqasiga kompleks xizmat koʻrsatib kelmoqda.

Seminar mobaynida tumandagi soʻlim maskanlarning birida tomorqadan samarali foydalanish borasidagi ustuvor vazifalarga bagʻishlangan yigʻilish oʻtkazildi. Unda Qoraqalpogʻiston Respublikasi Joʻqorgʻi Kengesi Raisi Amanbay Orinbayev, Oʻzbekiston Respublikasi Prezidenti maslahatchisining birinchi oʻrinbosari Ulugʻbek Muhammadiyev, Oʻzbekiston Respublikasi Bosh vazirining oʻrinbosari – Oila va xotin-qizlar qoʻmitasi raisi Zulayho Mahkamova soʻzga chiqdi.

Yigʻilishda joylardagi ogʻir sharoitdagi mahallalarni obod qilish, aholining tomorqadan samarali foydalanish madaniyatini oshirish, “Bir mahalla – bir mahsulot” tamoyili asosida ishlarni tashkil etish va fuqarolar tomonidan kooperatsiyalar tuzilishiga koʻmaklashish, eng asosiysi, Prezidentimiz tomonidan belgilab berilgan vazifalarning soʻzsiz bajarilishini taʼminlash boʻyicha dolzarb masalalar xususida soʻz yuritildi.

Yigʻilishda soʻzga chiqqanlar tomorqa yerlaridan samarali foydalanish, tomorqaga kompleks xizmatlar koʻrsatuvchi subʼektlar sonini koʻpaytirish hamda moddiy-texnik bazasini mustahkamlash, faoliyatini yanada kengaytirish va aholi tomorqalarini xizmatlari bilan qamrab olish darajasini oshirish, shuningdek, mahsulotlarni eksport qilish imkoniyatlarini yanada oshirish lozimligini alohida taʼkidladilar va shu yoʻnalishlarda ustuvor vazifalar belgilab olindi.

Charos Arslonova, tuman hokimligining Axborot xizmati rahbari.

(Foto: Joʻqorgʻi Kengesning Axborot xizmati)