MTTDA KOʻRGAZMALI SEMINAR: BOLA QALBIGA YOʻL TOPISh UChUN NIMALAR QILISh KERAK?

Maktabgacha taʼlim tashkilotlarida faoliyat olib boruvchi pedagog-tarbiyachilarning kasbiy mahoratlarini oshirib borishlariga sharoit yaratish, sohada amalga oshirilayotgan innovatsion loyihalarni amaliyotga tatbiq etish maqsadida Amudaryo tuman Maktabgacha va maktab taʼlimi boʻlimining Maktabgacha taʼlim tashkilotlari ishini muvofiqlashtirish shuʼbasi tomonidan turli sanalar munosabati bilan tadbirlar oʻtkazib kelinmoqda

Joriy yilning 3-mart kuni tumandagi 24-sonli maktabgacha taʼlim tashkilotida boʻlib oʻtgan “Goʻzal bahor” mavzusidagi koʻrgazmali seminar ham yosh avlod kamolotida maktabgacha taʼlim tashkilotlarining tutgan oʻrni va pedagog-tarbiyachilarning zamonaviy bilimlarni egallash borasidagi mahoratlarini ommalashtirishga bagʻishlandi. Seminarda Toʻlqin, Qipchoq, Qangli, Choykoʻl, Oq oltin ovullarida faoliyat olib boruvchi 13ta maktabgacha taʼlim tashkilotlari rahbarlari va pedagog-tarbiyachilar ishtirok etishdi.

Seminar oʻtkazish uchun mazkur 24-sonli maktabgacha taʼlim tashkiloti bejizga tanlanmagan. 2022-yilda, “Obod qishloq” dasturi doirasida qayta taʼmirlangan va zamonaviy qiyofa kasb etgan tashkilotning barcha xonalari shinam va yorugʻ, isitish tizimlari bilan toʻliq taʼminlangan.

Ayni paytda tashkilotda asosiy guruhlarda 105 nafar, majburiy maktabgacha taʼlim guruhida 25 nafar, shuningdek, 5ta qisqa muddatli guruhlarda 106 nafar bolajonlar taʼlim-tarbiya olishmoqda.

MTTda bolajonlarning zamon talablari darajasida taʼlim-tarbiya olishlari uchun zarur sharoitlar yaratilgan. Jamoaning barcha pedagog-tarbiyachilari oliy maʼlumotli mutaxassislar boʻlib, rejaviy-jadval asosida oʻtkaziladigan har bir mashgʻulotning bolalar yoshiga mutanosib ravishda, davlat taʼlim meʼyorlari darajasida amalga oshirilishiga alohida eʼtibor qaratiladi.

Kichkintoylarning qiziqishlarini hisobga olgan holda koʻrgazmali vositalar bilan bezatilgan oʻyin xonalari, jonli tabiat burchagi, oʻsimliklar dunyosi haqida hikoya qiluvchi manzarali surat-lavhalar, ularning “Bu nima?” “Qachon?” “Qayerda?” kabi savollariga amaliy javob sifatida tashkil etilgan innovatsion albomlar, har bir guruh tarbiyalanuvchilarining qiziqish va intilishlarini aks ettiruvchi bolajonlar tomonidan yasalgan oʻyinchoqlar, chizilgan suratlar toʻplamlarining mavjudligi tashkilot pedagog-tarbiyachilarining izlanuvchan va mahoratli xodimlar ekanligidan yaqqol dalolatdir.

Toʻrtta guruhda tashkil etilgan ochiq tarbiyaviy mashgʻulotlarni tayyorlov guruhi tarbiyachisi Shahlo Shomurodova, 2-katta guruh tarbiyachisi Zilola Xolmanova, 3-oʻrta guruh tarbiyachisi Marjona Davlatbayeva, majburiy maktabga tayyorlov guruhi tarbiyachisi Dilfuza Yoʻldoshevalar yuksak saviyada olib bordilar.

Xususan, bahor bayramlari ­– 1-mart – xalqimizning sevimli shoirasi Zulfiyaxonim tavalludining 110 yilligi, 8-mart – Xalqaro xotin-qizlar kuni hamda Navroʻz ayyomi toʻgʻrisida innovatsion texnologiyalardan foydalangan holda oʻtkazilgan qiziqarli mashgʻulotlar ishtirokchilarda katta taassurot qoldirdi.

Ayniqsa, bahor bayramlarining xalqimiz hayotida tutgan oʻrni, milliy oʻzlikni anglash borasidagi ahamiyati, shuningdek, oʻzbek xalqining buyuk farzandi Zulfiyaxonimning shaxsiy hayoti va ijodi bilan bolajonlarni tanishtirish, ular qalbida badiiy adabiyotga, ayniqsa, sheʼriyatga ixlos va qiziqish uygʻotish borasidagi mashgʻulotlar oʻtkazish boʻyicha tajribalari hamda uslubiy ishlanmalari seminar ishtirokchilari tomonidan yuqori baholandi.

Seminar davomida  ishtirokchilar guruhlarida xalqimizning oʻziga xos boy tarixiy merosi va milliy qadriyatlari orqali maktabgacha yoshdagi bolalarda oila, Vatan, ona tabiatga boʻlgan maʼnaviy-axloqiy munosabat hamda estetik qarashlarni shakllantirish, davlat ramzlariga, ona tiliga hurmat, kindik qoni tomgan tuproqqa muhabbat va gʻurur tuygʻularini uygʻotish maqsadida tashkil etilgan oʻzbek xalq ertaklari asosidagi kompozitsiyalar, maʼnaviyat va vatanparvarlik burchaklari bilan bezatilgan mashgʻulotlar xonalari bilan yaqindan tanishdilar.

Seminar yakunida Amudaryo tuman Maktabgacha va maktab taʼlimi boʻlimining maktabgacha taʼlim tashkilotlari faoliyatini muvofiqlashtirish shuʼbasi uslubchisi Shahnoza Qilicheva hamda seminar ishtirokchilari MTT pedagog-tarbiyachilari tomonidan oʻtkazilgan ochiq mashgʻulotlarni tahlil qilishib, mashgʻulotlardan olgan taassurotlari yuzasidan oʻz fikrlarini bildirdilar. Ular, ayniqsa, MTTdagi tartib-intizom, pedagog-tarbiyachilarning madaniyati, mashgʻulotlarni tashkillashtirish va bola qalbiga yoʻl topish borasidagi yuksak pedagogik mahoratlariga yuqori baho berdilar. Shu bilan birga, mazkur muassasaning oʻziga xos ish faoliyatini pedagog-tarbiyachilarining uslubiy tajribalarini keng ommalashtirish zarurligini taʼkidladilar.

ROBIYa YOʻLDOShEVA.