Choykoʻl ovuli va Boʻston mahallasida sumalak sayllari oʻtkazildi

Bahor fasli nafaqat yosharish va yangilanish ayyomi, balki dillarni dillarga ulab, el-ulus, qoʻni-qoʻshnilar orasida ogʻzibirchilik, mehr-muruvvat har qachongidan ham kuchayib, oʻzaro birdamlik hukm suradigan fasldir. Boisi, ushbu faslda asriy anʼanalarimiz ulugʻlanuvchi bayramlar koʻp. Xalqimiz fevralning oxirgi kunlaridan boshlab, bahorning soʻnggi kunlarigacha sumalak sayllarini oʻtkazadilar. Mahalladoshlar esa, turli xil bahoriy taomlar tayyorlab, bir-biriga ilinishadi. Mahalladagi nochor, kam taʼminlangan va ijtimoiy koʻmakka muhtoj oilalar holidan xabar olinib, necha-necha koʻngillar obod boʻladi. Bu yil ana shunday goʻzal va xayrli amallar qilinadigan navbahor fasli Ramazon bilan hamqadam boʻldi. Natijada, yurtdoshlarimiz qalbi saxovat-u, ehtiromga yanada toʻlib, joylarda sumalak sayllari oʻtkazilmoqda.

Ana shunday goʻzal tadbirlardan biri yaqinda Amudaryo tumanining Choykoʻl ovuli va Boʻston mahallasida boʻlib oʻtdi. Choykul OFY xotin qizlar faoli Saylixon Muratbayeva boshchiligida tashkillashtirilgan sumalak saylida Qoraqalpogʻiston Respublikasi Vazirlar Kengashi Raisi oʻrinbosari, Oila va xotin-qizlar qoʻmitasi raisi Maryam Ahmedova hamda tuman hokimi oʻrinbosari Goʻzal Soburova, turli idora-tashkilotlardan kelgan mehmonlar, shuningdek, ovuldagi nuroniy onaxon-u, qiz-kelinchaklar, faol ayollar, mahalla ahli ishtirok etdilar.

Mahallaning Dilband-2 koʻcha boshchisi Rohatoy Yerekeyeva koʻchasidagi ayollar bilan birgalikda sumalak, koʻk somsa, patir, boʻgʻirsoq singari milliy yeguliklarimizdan dasturxon tuzab, mehmonlarni non-tuz bilan kutib oldilar.

Sumalak milliy taomining tayyorlanishi oʻzgacha bir zavqli jarayon boʻlsa, bugʻdoyni undirib, qozonga solishgacha boʻlgan jarayon ham muhim va masʼuliyatli hisoblanadi. Sababi, sumalakning qay darajada shirin va totli chiqishi aynan oʻsha jarayonga bogʻliq. Mahallaning kayvoni ayollaridan Bibisora Sultonova ana shu masʼuliyatli vazifani oʻz zimmasiga olib, bugʻdoyni oʻstirib bergan boʻlsa, Goʻzal Yovmutbayeva xonadonida doshqozon osildi.

Shuningdek, sumalak saylida Shirin Yusupova, Oysulton Boltabayeva, Nilufar Gaipova, Gavhar Shatayeva, Mamura Kamolova, Gulnora Raimova, Tozagul Xojiyeva singari bir qator faol ayollar qatnashdilar. Shu bilan birga, mahalladagi uchta xonadonda bayramona va bahoriy dasturxonlar yozilib, milliy taomlarimiz tortildi.

Mehmonlar va mahalla ahli ushbu noz-neʼmatlarlardan baxramand boʻlib, el-yurt tinchligi, dasturxonlarimiz toʻkinligini tilab, duoga qoʻl ochdilar. Non, patir, koʻk somsa, gumma, joʻxori kurtik, zogʻora, boʻgʻirsoq kabi neʼmatlarni tayyorlab, dasturxonga tortishda ovuldagi Mahmud Norbayev, Omongul Dustmuratova, Nurbek Urazimbetov, Gulasal Xaytakovalar oilalari faollik koʻrsatdi.

Shuningdek, milliy taomlarni tayyorlashda va mehmonlarni munosib kutib olishda Beshchinor koʻchasi boshchisi Malika opa Nurmanova, Dilband koʻchasi koʻcha boshchilari Zumrad Jabborova va Salima Gulmonovalar boshchiligida Saltanat Raxmatullayeva hamda muqaddas Qurbaniyazova xonadonlari ham faollik koʻrsatib, Shaxnoza Kazakova, Feruza Raimova, Nargiza Kamolova, Manzura Raxmatullayeva, Muhabbat Aliyeva, Toʻlgʻonoy Nurimova, Dilnoza Jumaniyazova, Muhabbat Kalliyeva kabi bir qator ayol-qizlar ham ushbu xayrli ishga hissa qoʻshdilar.

Milliy anʼanalarimiz aks etgan mazkur tadbir bahoriy kuy-qoʻshiqlarga, oʻyin-kulgularga ulanib ketdi.

Yana shunday “Sumalak sayli” tadbirlaridan biri tumanimizning Boʻston mahallasida ham oʻtkazildi. Ushbu tadbir ham milliy urf-odatlarimizni targʻib qilish, oʻzaro totuvlik, bagʻrikenglik, mehr-oqibat, xayr-u, saxovat tuygʻularini kamol toptirish niyatida tashkil qilindi.

Tadbir mahallada yashovchi tadbirkor Gulasal Oʻrozmetova xonadonida boʻlib oʻtdi. Xonadon hovlisida toʻrtta doshqozonda sumalak qaynatilib, jarayonga mahalladagi nuroniy onaxonlar, mahalla xotin-qizlar faoli Goʻzal Sobirova, ayol-qizlar, mahalladagi “Aristokrat baby” oilaviy bogʻchasining tarbiyalanuvchilari hamda keng jamoatchilik vakillari ishtirok etdilar.

Tadbir davomida milliyligimiz, milliy qadriyatlarimiz ulugʻlanib, “Alla”, “Yor-yor” kabi milliy oʻzligimizni aks ettiruvchi qoʻshiqlarimiz yangradi. Yigʻilganlar doshqozon atrofida ezgu tilaklar aytib, duoga qoʻl ochdilar. Mahalladoshlarni ezgu niyat ilinjida bir manzilga jamlagan sumalakka mehr, muruvvat, baraka yogʻilib, yurtdoshlarimiz qalblariga bahoriy iliqlik olib kirdi.

Sumalak sayli davomida saxovatpesha hamyurtimiz Gulasal Oʻrozmetova tomonidan mahalladagi kam taʼminlangan, ijtimoiy himoyaga muhtoj oilalarning holidan xabar olinib, sumalaklar tarqatilib, ularga bayram sovgʻalari ham topshirildi. Albatta, bunday eʼtibor va gʻamxoʻrlikdan qanchadan-qancha koʻngillarga shodlik ulashilgan boʻlsa, ajab emas.

Ha, sumalak sayllarining ahamiyati, insonlarni birdamlikka, ogʻzibirchilikka, doʻstlikka chorlashida, ginalarni unutib, odamlarni kechirimlilik, bagʻrikenglik sari yetaklashidadir.

Aziza Madrahimova.