MTTDA SEMINAR-TRENING: “ILK QADAM” DAVLAT DASTURI ASOSIDAGI MAVZULI TADBIRLAR QANDAY AMALGA OShIRILADI?

Amudaryo tumanida 5ta davlat-xususiy sherikchilik asosidagi hamda 101ta oilaviy nodavlat maktabgacha taʼlim tashkilotlari mavjud boʻlib, ularga 3704 nafar tarbiyalanuvchilar qamrab olingan. Mazkur maktabgacha taʼlim muassasalarida taʼlim-tarbiya ishlarini tashkillashtirishda “Ilk qadam” davlat oʻquv dasturida belgilangan talablar asosida oʻsib kelayotgan yosh avlodni jismonan va aqlan, intellektual-maʼnaviy rivojlantirishga alohida eʼtibor qaratiladi. Bunda MTTlarda bolalarning nutqiy jihatdan nuqsonsiz oʻsib-ulgʻayishlari, jismonan sogʻlom, aqlan yetukligini taʼminlovchi turli didaktik oʻyinlar, bola xotirasini mustahkamlashga xizmat qiluvchi interfaol mashqlar oʻtkazish, shuningdek, pedagog-tarbiyachilarning bilim va malakalarini doimiy ravishda oshirib borishlari uchun zarur sharoitlar yaratish muhim ahamiyatga ega.

Bu borada Amudaryo tuman Maktabgacha va maktab taʼlimi boʻlimining Maktabgacha taʼlim tashkilotlari faoliyatini muvofiqlashtirish shuʼbasi uslubchilari va mutaxassislari tomonidan amalga oshirilayotgan chora-tadbirlar, seminar-treninglar oʻzining ijobiy samarasini bermoqda.

Shu maqsadda 4-mart sanasida 5-sonli Maktabgacha taʼlim tashkilotida oʻtkazilgan seminar-trening ham MTT pedagog-tarbiyachilarining kasbiy mahoratini oshirish, oʻzaro tajriba almashish borasidagi fikrlarga boy tarzda oʻtdi.

Seminar-treningda Amudaryo tuman Maktabgacha va maktab taʼlimi boʻlimining Maktabgacha taʼlim tashkilotlari faoliyatini muvofiqlashtirish shuʼbasi uslubchisi Saule Patullayeva, Davlat xususiy sherikchilik asosidagi taʼlim tashkilotlari faoliyatini muvofiqlashtirish boʻyicha bosh mutaxassisi Abdurashid Nasirillayev hamda hududlardagi nodavlat maktabgacha taʼlim tashkilotlari rahbarlari va pedagog-tarbiyachilari ishtirok etishdi.

Seminar-treningda “Ilk qadam” davlat oʻquv dasturida belgilangan vazifalar va davlat talablari haqida, tashkilotlardagi markazlarning joylashishi hamda taʼlim-tarbiya jarayonida qoʻllaniladigan bolalarni rivojlantirish xaritalarining yuritilishi boʻyicha soha mutaxassislari tomonidan atroflicha tushunchalar berilib, kerakli maʼlumotlar taqdim etildi.

Shuningdek, Oʻzbekiston Respublikasi Maktabgacha va maktab taʼlimi vazirligining tegishli buyrugʻi ijrosini taʼminlash maqsadida ish hujjatlarining yuritilishi yuzasidan ham amaliy-koʻrgazmali mashgʻulotlar olib borilib, tushuntirish-targʻibot ishlari ham oʻtkazildi.

Seminar davomida bolalarni rivojlantirishga qaratilgan 5ta asosiy yoʻnalish qamrab olinib, tegishli oʻquv dasturi asosida rejaviy-jadvalda belgilangan mavzuga mos interfaol mashqlarni bajarish, didaktik materiallarni qoʻllash texnologiyalari, mavzuga mos oʻyinlarni oʻtkazish uslublari, bolalar uchun sheʼr va qoʻshiqlarni tanlash mahorati toʻgʻrisida mutaxassislar tomonidan “oʻrgan-oʻrgat” tamoyili asosida tajriba almashuv soatlari tashkil etildi.

Shundan soʻng mazkur tayanch maktabgacha taʼlim tashkiloti uslubchisi, trener-mentor Gulchehra Yoʻldosheva tomonidan maktabgacha taʼlim tashkilotlarida amalga oshiriladigan yillik mavzuli ish rejasi asosidagi oy va hafta mavzulari boʻyicha slaydlar yordamida amaliy mashgʻulot tashkil etilib, unda mart oyining birinchi hafta mavzusi ­– “8-mart – Xalqaro xotin-qizlar kuni” munosabati bilan bolajonlar ishtirokida tashkillashtiriladigan tadbirning bola tarbiyasidagi ahamiyati yuzasidan slayd namoyish qilindi.

Bundan tashqari, mavzu bilan tanishtirishda kuzatish, koʻrgazmali vositalarni qoʻllash, ogʻzaki va amaliy uslublardan hamda tarqatma manbalaridan foydalanish boʻyicha nazariy bilimlar ham taqdim etildi.

Seminar-treningda ishtirokchilar uchun “Mavsumiy oʻzgarishlar” mavzusida 5 ta rivojlanish yoʻnalishi asosida biri-biridan qiziqarli innovatsion mashgʻulotlar ham tashkillashtirildi. Unga koʻra, 5 ta rivojlanish yoʻnalishi asosida maqsadlarni toʻgʻri belgilash va ularni amalga oshirish usullari, texnologiyalari, ushbu mavzularda taʼlimiy faoliyatda foydalaniladigan koʻrgazmali jihozlar va tarqatma vositalarini tayyorlash boʻyicha oʻtkazilgan amaliy va nazariy mashgʻulotlar orqali ishtirokchilarning oʻz kasbiy mahoratlarini oshirish imkoniyati ham yaratildi.

ROBIYa YOʻLDOShEVA.