YaNGI MEHNAT FASLINI BOShLAGAN FERMER

Bugun hamma dalada. Ayniqsa, dehqon ahli uchun qaynoq mehnat onlari boshlanayotir. Koʻklamning tashrifini dala bagʻrida qarshi olishga odatlangan dehqon uchun hamal kirishini kutishning ham oʻzgacha gashti bor. Yangi dehqonchilik yili uchun tuzilgan ezgu rejalarni tahlil qilish orqali imkonlari doirasida ulugʻvor marralarni koʻzlab, ish faslini boshlash esa yanada zavqli.

Boʻz yop ovulidagi “Tojiboyev Rustam” fermer xoʻjaligi rahbari Amin Tojiboyev qishloqda tugʻilib-oʻsganidan, bolaligi ham, yoshligi ham bepoyon dalalar bagʻrida oʻtganidanmi, dehqonchilik ilmini, fermer xoʻjaligini yuritishning barcha moliyaviy-iqtisodiy asoslarini puxta oʻrgandi va hayotini qishloq xoʻjaligiga bagʻishladi. Bu borada bilimini oshirish maqsadida Toshkent Irrigatsiya va qishloq xoʻjaligini mexanizatsiyalash muhandislari institutida tahsil oldi. Yerga mehr berib, aslo kam boʻlmadi. Oʻz yaqinlarini, qolaversa, bir necha hamqishloqlarini ish bilan taʼminladi.

Tabiatan tinib-tinchimas, har bir qarich yerdan unumli foydalanishga odatlangan Amin Tojiboyevning uddaburonligi va tashabbuskorligi tufayli yil sayin fermer xoʻjaligi yerlarining meliorativ holati yaxshilanib, hosildorligi oshdi. Yetishtirilgan qishloq xoʻjalik mahsulotlaridan olingan daromad tufayli xoʻjalik dehqonlarining moddiy manfaatdorligi yaxshilangani hamjihatlik muhitini yaratdi. Har bir dehqonchilik yili uchun tuzilgan kontraktatsiya shartnomalarini ortigʻi bilan ado etib kelayotgan xoʻjalik dehqonlari oʻtgan 2024 qishloq xoʻjalik yilini barcha yoʻnalishlar boʻyicha muvaffaqiyatli yakunladilar.

Umumiy 98 gektar yerda dehqonchilik qilgan fermer xoʻjaligida oʻtgan yili bugʻdoydan moʻl hosil yetishtirildi. 10 gektar maydondagi bugʻdoyzor hosildorligi har gektar hisobiga 55 tsentnerni tashkil etdi. Shartnomadagi 30 tonnadan tashqari yana 30 tonna hosilning xoʻjalik ixtiyorida qolgani ishchilarning rizqi ziyoda, dasturxonlari toʻkin boʻlishiga imkon yaratdi. 60 gektar yerga ekilgan paxta hosildorligi har gektar hisobiga 30 tsentnerga toʻgʻri keldi va yetishtirilgan hosil ijarachi-dehqonlarning ham, fermer xoʻjaligining ham daromadi moʻl boʻlishini taʼminladi. Natijada xoʻjalik dehqonlari oʻtgan qishloq xoʻjalik yilini 700 million soʻm sof daromad bilan yakunladilar.

Dehqonning moddiy manfaatdorligi oshsa, yashash sharoitini yaxshilaydi, orzu-niyatlarini amalga oshirishga intiladi. Fermer esa bor daromadini dehqonchilik madaniyatini oshirishga, xoʻjalik dehqonlarining mehnatini yengillashtirish maqsadida yangi texnikalar va mineral oʻgʻitlar xarid qilishga saflaydi. Amin Tojiboyev ham shunday qilishga odatlangan.

Mutaxassisligi boʻyicha muhandis-mexanik boʻlgan Aminboy Tojiboyev texnikaning “tili”ni yaxshi bilganidan goh lizingga, baʼzida yillik sof daromadlari evaziga xoʻjalikning texnika parkini yangilash chorasini koʻradi. Ayniqsa, “Orion” rusumli surim traktori, “Hyundai” rusumli ekskavator, 3 ta MTZ rusumli transport traktorlari, shuningdek, lazerli yer tekislash texnikalarining yuqori unum bilan ishlatilishi natijasida xoʻjalik yerlarining hosildorligi keskin oshdi. Avvalgi past-baland, notekis yer maydonlari lazerli yer tekislash texnikasi yordamida maromiga yetkazib tekislangach, ekinlarni bir tekis oziqlantirish imkoni yaratildi.

Biz ijodiy guruhimiz bilan Navroʻz bayrami arafasida xoʻjalik dalalarida amalga oshirilayotgan yumushlar bilan tanishganimizda bahorgi shoʻr yuvish ishlari muvaffaqiyatli yakunlanib, yangi dehqonchilik yilini boshlashga qizgʻin taraddud koʻrilayotganiga guvoh boʻldik. Oʻgʻit sepish moslamasi yordamida yaxshilab oziqlantirilgan 10 gektar maydondagi yam-yashil bugʻdoy maysalari baravj oʻsmoqda. Barcha dalalarning chetlari obodonlashtirilib, xoʻjalik hududidagi ariqlar, dala yoʻllari boʻylariga tartib bilan ekilgan mevali va manzarali daraxt koʻchatlari koʻzlarni quvontiradi.

– Yerlarimiz tobiga kelgach, ekin-tikin ishlarini boshlab yuboramiz, – deydi fermer Amin Tojiboyev. – Bu yil 62 gektar maydonga chigit ekishni reja qilyapmiz. Bugʻdoyzorning rivojidan koʻnglimiz toʻq. Hamal kirsa, ishlarimiz yanada qiziydi, surim ishlari boshlanadi.

Koʻklamni, hamalni hamisha dalada kutib olishga odatlangan “Tojiboyev Rustam” fermer xoʻjaligi dehqonlari uchun boshlanayotgan yangi mehnat fasli yanada barakali boʻlishiga shak-shubha yoʻq. Chunki ishning koʻzini biladigan xoʻjalik rahbari bilan ijarachi-dehqonlarining oʻzaro hamkorlikdagi faoliyati bois, barcha ishlar badastir, maromiga yetkazib bajarilayotgani, texnikalar yuz foiz ekishga tayyorlab qoʻyilganidan ayonki, qilinayotgan harakatlar albatta barakali boʻlishi tabiiy.

ROBIYa YOʻLDOShEVA.