Deputatlar birinchi chorak yakuni boʻyicha saylovchilarga hisobot bermoqda

Ayni kunlarda Qoraqalpogʻiston Respublikasi Joʻqorgʻi Kengesi va Xalq deputatlari Amudaryo tuman Kengashi deputatlari saylovchilar bilan uchrashib, joriy yilning oʻtgan 3 oyi davomida amalga oshirgan ishlari va deputatlik faoliyati xususida aholiga hisobot bermoqda.

Amir Temur nomli OFY binosida ham shu kabi uchrashuv oʻtkazilib, unda hududdan saylangan Qoraqalpogʻiston Respublikasi Joʻqorgʻi Kengesi deputati Gʻ.Yeshniyozov va Xalq deputatlari Amudaryo tuman Kengashi deputati M.Saʼdullayevlar ishtirok etdi.

Deputatlar taʼkidlaganlaridek, Qoraqalpogʻiston Respublikasi Joʻqorgʻi Kengesi va tuman hokimligi tomonidan hududni ijtimoiy-iqtisodiy rivojlantirish, aholi turmush farovonligini yanada oshirish va infratuzilmasini yaxshilash, tadbirkorlikni rivojlantirish va boshqa yoʻnalishlarda tizimli ishlar amalga oshirilmoqda. Prezidentimiz va hukumatimiz tomonidan Qoraqalpogʻistonni rivojlantirish uchun 20 ga yaqin Farmon va Qarorlar qabul qilindi. Ushbu qarorlar asosida 21 mingdan ortiq ogʻir ahvoldagi turar joylarni taʼmirlash, janubiy tumanlardagi 2 ming km.dan ortiq ichki yoʻllarga tosh-shagʻal aralashmasi yotqizish ishlari amalga oshirildi. Kadastri yoʻq 27 ming 590 ta uy-joyning ijara va mulk huquqlari boʻyicha tegishli hujjatlar ishlab berildi. 452 ta mahallaning har biriga 500 mln soʻmdan, jami 228 mlrd. soʻm mablagʻ ajratildi.

Yigʻilishda ovul faollari Musofir aholi punktiga ichimlik suvi tarmogʻini tortish, ichki tuproq yoʻllarga qum-shagʻal aralashmasi yotqizish, Mangʻit shahridan Amir Temur nomli ovulga olib boruvchi yoʻlni asfaltlash masalalarida murojaat qildilar. Ushbu murojaatlar yuzasidan zarur tushuntirishlar berilib, tegishli tashkilotlarga deputatlik soʻrovi yuborilishi qayd qilindi.

Shu kabi uchrashuv tumanning Toʻlqin ovulida ham oʻtkazildi. Uchrashuvda deputat Gʻ.Yeshniyozov Qoraqalpogʻiston Respublikasi Joʻqorgʻi Kengesi tomonidan amalga oshirilayotgan ishlar va oʻz faoliyati xususida hisobot berdi.

Uchrashuvda aholi vakillari ijtimoiy taʼminot masalasida, shuningdek 28-sonli maktabga olib boruvchi yoʻl boʻyiga piyodalar yoʻlakchasi qurish, tomorqalarni oqar suv bilan taʼminlash masalalarda deputatga murojaat qildilar.

Bir guruh fuqarolarning ovul hududidan oʻtgan yangi temir yoʻl liniyasi Changal qalʼa aholi punktiga borish yoʻllarini uzib qoʻygani, natijada shu hududda yashovchi aholi ovul markaziga kelish uchun 5-6 kilometr uzoq masofadan aylanib oʻtishga toʻgʻri kelayotgani, ovuldagi qabriston ham ushbu temir yoʻlning narigi tomonida qolgani sababli aholi uchun noqulayliklar tugʻdirayotgani boʻyicha qilgan murojaati joyiga chiqib oʻrganildi va tegishli tashkilotlarga deputatlik soʻrovi yuborilib, ijobiy hal qilinishi maʼlum qilindi.

Choykoʻl ovulida oʻtkazilgan uchrashuvda Qoraqalpogʻiston Respublikasi Joʻqorgʻi Kengesi deputati Gʻ.Yeshniyozov va Xalq deputatlari Amudaryo tuman Kengashi deputati Ya.Ahmedov, S.Murodboyevalar saylovchilarga hisobot berdilar.

Ovul aholisi xalqaro ahamiyatdagi avtomobil yoʻlining 22-sonli maktab oldidan oʻtgan qismiga bolalar xavfsizligini taʼminlash uchun yotiq sunʼiy toʻsiq oʻrnatilgani, yoʻldan katta yuk avtomobillari oʻtishi sababli uning bir qismi ishdan chiqqanini maʼlum qilib, taʼmirlash masalasida deputatlardan amaliy yordam soʻradi.

Shuningdek, aholi tomonidan turar joylarga kadastr hujjatlarini rasmiylashtirish boʻyicha targʻibot ishlarini kuchaytirish, sobiq Madaniyat qishloq vrachlik punkti negizida oilaviy poliklinika tashkil qilish va boshqa masalalarda yoʻllangan murojaatlar ham tegishli tartibda oʻrganib chiqilib, zarur choralar koʻrilishi maʼlum qilindi.

Uchrashuvdan keyin Tadbirkorlar va ishbilarmonlar harakati – Oʻzbekiston Liberal-demokratik partiyasidan saylangan deputatlar Gʻ.Yeshniyozov va Ya.Ahmedovlar xotin-qizlar bandligini taminlash maqsadida OFY binosida tashkil qilingan tikuvchilik tsexi faoliyati bilan ham yaqindan tanishdilar