36-sonli umumtaʼlim maktabida amaliy fanlar haftaligi doirasida amaliy mashgʻulotlar oʻtkazildi

Bugungi kunda maktab taʼlimida nazariy bilimlar bilan bir qatorda amaliy koʻnikmalarga ham alohida eʼtibor qaratilayotgani taʼlim tizimidagi muhim oʻzgarishlardan dalolat beradi. Zero, hayotga tayyor inson — nafaqat bilimli, balki amaliy koʻnikmaga ega shaxs hamdir.

Yaqinda Amudaryo tumani Maktabgacha va maktab taʼlimi boʻlimi tasarrufidagi 36-sonli umumtaʼlim maktabida amaliy fanlar oʻqituvchilarining tashabbusi bilan oʻquvchilarning amaliy va nazariy bilimlarini mustahkamlashga qaratilgan maxsus mashgʻulotlar oʻtkazildi. Tadbir amaliy fanlar metod birlashmasi rahbari, texnologiya fani oʻqituvchisi Gulchehra Xoʻjamurodova rahbarligida tashkil etildi.

Ushbu haftalik oʻquv-tarbiya jarayonining sifati, oʻqituvchilarning mahorati va oʻquvchilarning qobiliyatini namoyon qilgan haqiqiy tadbirga aylandi. Tadbirni maktabning ilmiy ishlar boʻyicha direktor oʻrinbosari Sarvar Qutlimuratov ochib, bu kabi tashabbuslarning ahamiyati haqida toʻxtalib, amaliy mashgʻulotlar oʻquvchilarning salohiyatini yuzaga chiqarish, kelajak hayotiga mustahkam poydevor qoʻyishda muhim oʻrin tutishini taʼkidladi.

Gulchehra Xoʻjamurodova 2003-yildan buyon ushbu maktabda texnologiya fanidan taʼlim berib kelmoqda. Uning rahbarligida amaliy fanlar boʻyicha bir qator yutuqlarga erishilgan. Jumladan, yuqori sinf oʻquvchilari mashgʻulotlarda faol ishtirok etib, chevarlikka oid bilimlarni oʻrganib kelishadi.

Maktabda texnologiya fani boʻyicha 7-"A" va 7-"B" sinf oʻquvchi qizlari ishtirokida "Mohir pazandalar" guruhi tashkil etilgan. Tadbir doirasida mazkur guruh qizlari oʻrtasida servis xizmati, salatlar va taomlar tayyorlash, estetik did hamda mehnat madaniyati boʻyicha bellashuvlar oʻtkazildi. Bu kabi mashgʻulotlarda qizlar orasta, chaqqon va epchil boʻlishlari, kelajakda oilada oʻz oʻrnini topishi uchun katta hayotga tayyorlanadi. Har ikkala sinf teng ishtirok etgani uchun ishtirokchilar faxriy yorliqlar bilan taqdirlandi. Qizlar nafaqat pazandalikda, balki chiroyli gapirish, mehmonnavozlikda ham oʻz mahoratlarini namoyon qilishdi. Ushbu mashgʻulotlar ularning hayotga tayyorgarligida muhim omil boʻldi.

Gulchehra Xoʻjamurodova oʻz toʻgaragida oʻquvchilarga oʻyinchoqlar tayyorlash, tikish hamda pazandalik sirlarini oʻrgatishni davom ettirmoqda.

Yana bir texnologiya fani oʻqituvchisi Shuhrat Jabborov esa 1996-yildan buyon mazkur maktabda faoliyat yuritib, oʻquvchilarga ustachilikni oʻrgatib keladi. Uning toʻgaragida oʻquvchilar turli qoʻl mehnati buyumlarini yasash, stanoklar bilan ishlash, asbob-uskunalardan xavfsiz foydalanishni oʻrganmoqda. Bu esa nafaqat amaliy koʻnikmalarni, balki mehnatga munosabatni ham shakllantiradi.

Maktabning yana bir oʻqituvchisi Nurbek Kamalov 2013-yildan buyon musiqa madaniyati fanidan oʻquvchilarga rubob va doira chalish, jonli ijro va qoʻshiq kuylashni oʻrgatib kelmoqda.

Maktabning tasviriy sanʼat va chizmachilik fani oʻqituvchilari Dilnoza Koʻchqarova va Aziza Ismoilova rahbarligidagi toʻgaraklarda 5–6-sinf oʻquvchilari natyurmort chizish boʻyicha oʻz mahoratlarini sinovdan oʻtkazishdi. Tadbir doirasida oʻtkazilgan tanlovda 5-“A” sinf oʻquvchisi Farangiz Shamuratova 1-oʻrinni, 6-“A” sinfdan Shohzoda Sabirboyeva esa 2-oʻrinni egallab, ragʻbatlantiruvchi sovgʻalar bilan taqdirlandi. Bu kabi faoliyatlar bolalarda sanʼatga muhabbat uygʻotadi, estetik didni rivojlantiradi.

Jismoniy tarbiya fani boʻyicha ham bir qator mashgʻulotlar tashkil etildi. 32 yillik tajribaga ega Hakim Rahimov har haftaning shanba kuni gandbol va qoʻl toʻpi boʻyicha mashgʻulotlar oʻtkazadi. Uning saboqlari oʻquvchilarda jismoniy tayyorgarlik, tezkorlik va jamoaviylikni rivojlantiradi.

Jismoniy tarbiya fani oʻqituvchisi Muhayyo Umarova gimnastika toʻgaragida mashgʻulotlar olib borib, oʻquvchilarni ragʻbatlantirdi. Shuningdek, Mahmud Qurbonboyev esa 6-yildan buyon stol tennisi toʻgaragini yoʻlga qoʻygan. Mahmud Qurbonboyev va Ixlos Najimov sportning shaxmat-shashka turi boʻyicha maktab kubogi uchun musobaqalar oʻtkazdi.

Jismoniy tarbiya fanining yana bir faol ustozi — oliy toifali oʻqituvchi Omonboy Qurbonboyev har haftaning shanba kuni maktabning futbol jamoasi ishtirokida mashgʻulotlar oʻtkazadi. Shu kuni sportning futbol turi boʻyicha yuqori sinf oʻquvchilari ishtirokida “Maktab ligasi” tashkil etildi. Shuningdek, 2023-yilda “Umid nihollari” sport musobaqasida Nukus shahrida oʻtkazilgan Qoraqalpogʻiston chempionatida stol tennisi boʻyicha oʻquvchilari — Sarvar Raimov va Zafarbek Yunusovlar 1-oʻrinni qoʻlga kiritgani uning mashgʻulotlari samarasini koʻrsatadi.

Bir soʻz bilan aytganda, 36-sonli umumtaʼlim maktabida amaliy fanlar haftaligi doirasida oʻtkazilgan tadbirlar oʻquvchilarning bilim va koʻnikmalarini boyitish, ularni hayotga tayyorlashda muhim omil boʻldi. Ushbu faoliyatlar orqali nafaqat nazariy, balki amaliy jihatdan ham oʻquvchilarda yetarli tajriba va mahorat shakllanmoqda.

Shohzod Qurbonboyev.