Sayyor sud majlisida savdo va xizmat koʻrsatish qoidalarini buzgan shaxslarga nisbatan maʼmuriy jazolar qoʻllanildi

25-aprel kuni jinoyat ishlari boʻyicha Amudaryo tumani sudi tomonidan tuman Soliq inspektsiyasi binosining majlislar zalida ochiq va sayyor sud majlisi oʻtkazildi.

Jinoyat ishlari boʻyicha Amudaryo tumani sudining tergov sudyasi Donaxon Yusupova hamda sudya yordamchisi Elyor Jumaniyozov ishtirokida oʻtkazilgan mazkur sayyor va ochiq sud majlisida tuman Soliq inspektsiyasi tomonidan taqdim etilgan jami 15 ta maʼmuriy huquqbuzarlikka oid ish koʻrib chiqildi.

Jumladan, Oʻzbekiston Respublikasi Maʼmuriy javobgarlik toʻgʻrisidagi Kodeksining 164-moddasi 1-qismida nazarda tutilgan savdo yoki xizmat koʻrsatish qoidalarini buzish holatlari boʻyicha 12 nafar shaxsga nisbatan ish materiallari koʻrib chiqildi. Ushbu shaxslardan 11 nafari tomonidan yoʻl qoʻyilgan buzilishlar huquqbuzarlik aniqlangan paytdan boshlab oʻttiz kunlik muddat ichida ixtiyoriy ravishda bartaraf etilgani va yetkazilgan moddiy zararning oʻrni qoplangani inobatga olinib, ularga nisbatan ish yuritish tugatildi. Qolgan bir nafar shaxsga esa maʼmuriy jarima jazosi tayinlandi.

Shuningdek, Oʻzbekiston Respublikasi Maʼmuriy javobgarlik toʻgʻrisidagi Kodeksining 176-moddasi 1-qismida nazarda tutilgan huquqbuzarlikni sodir qilgan, yaʼni tadbirkorlik faoliyatini davlat roʻyxatidan oʻtmasdan amalga oshirgan 2 nafar shaxsga nisbatan ish materiallari ham koʻrib chiqildi. Sud tomonidan ularga nisbatan maʼmuriy jarima jazosi tayinlandi hamda ish yuzasidan olingan ashyoviy dalillar davlat foydasiga musodara qilinishi toʻgʻrisida qaror qabul qilindi.

Bundan tashqari, Oʻzbekiston Respublikasi Maʼmuriy javobgarlik toʻgʻrisidagi Kodeksining 175-moddasi 1-qismida nazarda tutilgan soliq solish obʼektlarining hisobini va hisobotini yuritishning belgilangan tartibini, shuningdek, toʻlov intizomini buzish holatlari boʻyicha ham ish materiallari koʻrib chiqildi. Mazkur ishlar yuzasidan huquqbuzar deb topilgan shaxslarga nisbatan qonun doirasida belgilangan jazolar tayinlandi va qonuniy, adolatli qarorlar qabul qilindi.

Sud majlisi davomida ishtirokchilarga maʼmuriy huquqbuzarliklarning oldini olish, qonunlarga rioya etish va soliq intizomini mustahkamlash boʻyicha zarur tushuntirishlar berildi. Shu bilan birga, sudya Donaxon Yusupova tomonidan huquqbuzarliklarning davlat va jamiyat uchun salbiy oqibatlari — iqtisodiy barqarorlikka putur yetkazishi, davlat byudjeti tushumlarining kamayishi, umumiy huquqiy muhitning zaiflashuviga olib kelishi haqida ham fikr-mulohazalar bildirildi.

Ochiq va sayyor sud majlisida koʻrilgan ishlar yuzasidan qonun va adolat printsiplariga asoslangan holda qarorlar qabul qilindi. Bunday tadbirlar kelgusida huquqbuzarliklarning oldini olish, aholi oʻrtasida huquqiy ong va huquqiy madaniyatni oshirishga xizmat qiladi.

Donaxon Yusupova, jinoyat ishlari boʻyicha Amudaryo tuman sudining terov sudyasi.