Maktablarning maʼnaviy va maʼrifiy ishlar boʻyicha direktor oʻrinbosarlari va amaliyotchi psixologlari uchun seminar-trening tashkil etildi

Yaqinda Amudaryo tumani Maktabgacha va maktab taʼlimi boʻlimi tasarrufidagi 38-sonli umumtaʼlim maktabida tumandagi umumtaʼlim maktablarining maʼnaviy va maʼrifiy ishlar boʻyicha direktor oʻrinbosarlari va amaliyotchi psixologlari uchun seminar-trening mashgʻulotlari tashkil etildi.

Prezidentning 2025-yil 3-yanvar kungi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qaroriga muvofiq belgilangan vazifalar ijrosini taʼminlash maqsadida tashkil etilgan seminar yoshlar orasidagi salbiy xulq-atvorni bartaraf etish va ijtimoiy meʼyordan ogʻish holatlarining oldini olishga qaratilgan amaliy yoʻnalishlarni yanada mustahkamlashga xizmat qildi.

Tadbirda Oʻzbekiston Respublikasi tashxis markazi metodisti Gulbahor Yusupova, Qoraqalpogʻiston Respublikasi Maktabgacha va maktab taʼlim vazirligi masʼul xodimi Erkin Nurtayev, Qoraqalpogʻiston Respublikasi Sogʻlikni saqlash vazirligi masʼul xodimi Oyimxon Davlatmuratova, tuman maktabgacha va maktab taʼlimi boʻlimi boshligʻi Yalgʻash Shomurotov va boʻlim metodisti Nurbek Seytboyevlar ishtirok etdi.

Seminarda turli mavzular muhokama qilindi. Xususan, voyaga yetmagan oʻquvchi-yoshlar orasida ijtimoiy meʼyordan ogʻish holatlarini yuzga keltiruvchi omillar, bolalarni zoʻravonlikning barcha shakllaridan himoya qilishga doir qonunchilik va salbiy xulq-atvorning oldini olish va bartaraf etish boʻyicha maktab psixologi ish rejasiga muvofiq amalga oshiriladigan vazifalar qamrab olindi.

Oʻzbekiston Respublikasi tashxis markazi metodisti Gulbahor Yusupova mashgʻulot davomida voyaga yetmagan yoshlar orasidagi ijtimoiy meʼyordan ogʻish holatlarini keltiruvchi omillarni atroflicha tushuntirib oʻtdi. Ayniqsa, oilaviy omillarning — ota-onaning eʼtiborsizligi yoki zoʻravonligi, oilaviy nizolar va ajralishlarning yoshlarga qanday taʼsir koʻrsatishini taʼkidlandi. Shunga qoʻshimcha ravishda, oʻqituvchilarning eʼtiborsizligi yoki adolatsizligining ham yoshlarning salbiy xulq-atvoriga taʼsiri mavjudligiga eʼtibor qaratilib, maktab va taʼlim tizimi bilan bogʻliq muammolar ham qayd etildi.

Mutaxassis salbiy xulq-atvorning oldini olish va bartaraf etishda samarali usullarga toʻxtaldi. Mazkur usullar oila, maktab va jamoada muhabbatga asoslangan muhitni barpo etish, toʻgʻri tarbiya berish va namuna boʻlish kabi muhim omillarni oʻz ichiga oladi. Shuningdek, bolalarni sport, sanʼat yoki fanga jalb qilish orqali salbiy xatti-harakatlarning oldini olish mumkinligini qayd etildi.

Qoraqalpogʻiston Respublikasi Maktabgacha va maktab taʼlim vazirligi masʼul xodimi Erkin Nurtayev tomonidan bolalarni zoʻravonlikning barcha shakllaridan himoya qilishning muhimligini taʼkidlandi. Bolalarni jismoniy, ruhiy, jinsiy, zoʻravonlik, ekspluatatsiya va bullingdan himoya qilish uchun mamlakatda belgilangan asosiy yoʻnalishlar koʻrsatildi.

Seminar davomida taʼlim va tarbiya sohasidagi mutaxassislar, psixologlar va masʼul xodimlar hamkorlikda yoshlar orasidagi salbiy xulq-atvorning oldini olish va bartaraf etish boʻyicha amaliy tavsiyalar berishdi. Shu bilan birga, oʻqituvchilar va ota-onalar uchun maxsus treninglar tashkil etish, yoshlar oʻrtasidagi ijtimoiy faollikni oshirishga qaratilgan tadbirlar olib borish boʻyicha yangi takliflar bildirildi. Tadbirning yakunida, bolalarning huquqlarini himoya qilish, ularning hayoti va salomatligini saqlash boʻyicha yanada keng qamrovli chora-tadbirlar belgilab olindi.

Bu kabi tadbirlar yoshlarga salbiy taʼsir koʻrsatuvchi omillarni bartaraf etish va kelajakda hammamiz uchun barqaror va xavfsiz muhitni taʼminlash uchun muhim ahamiyatga ega. Seminarda berilgan amaliy tavsiyalar va yoʻnalishlar yoshlarning ijtimoiy muammolarini bartaraf etish va ularning kelajagini yaxshi yoʻnalishda shakllantirishga katta hissa qoʻshadi.

Shohzod Qurbonboyev.