Xalq deputatlari Amudaryo tuman kengashining 9-sessiyasi toʻgʻrisida axborot

Joriy yilning 23-may kuni Amudaryo tumani hokimligining majlislar zalida Xalq deputatlari Amudaryo tuman kengashining 9-sessiyasi boʻlib oʻtdi. Sessiya majlisida deputatlar, hokim oʻrinbosarlari, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Xalq deputatlari tuman Kengashi Raisi – tuman hokimi Sobir Xoʻjametov ochdi hamda olib bordi. Sessiya kotibligiga “8-Oʻrta qalʼa” saylov okrugidan deputat Fotima Yeshimbetova saylandi.

Kun tartibidagi birinchi masala – mahalliy byudjetning 2025-yil 1-yanvar holatiga aniqlangan erkin qoldiq mablagʻlari hisobidan hamda mahalliy byudjetning 2025-yil I chorak daromadlar rejasining ortiqcha bajarilgan qismi hisobidan ajratiladigan mablagʻlar toʻgʻrisida tuman hokimining birinchi oʻrinbosari Faxriddin Yusupov hisobot berdi.

Sessiya kun tartibidagi navbatdagi – “Yoshlarga oid davlat siyosatida olib borilayotgan islohotlar ijrosi toʻgʻrisida”gi masala yuzasidan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov hisobot berdi.

Hokim oʻrinbosari oʻz hisobotida yoshlar mamlakatning kelajagi ekani, ularning iqtisodiy va ijtimoiy faolligi, maʼnaviy kamoloti va ilm-fan sohasidagi yutuqlari jamiyatning umumiy taraqqiyotiga toʻgʻridan-toʻgʻri taʼsir koʻrsatishini, shu boisdan yoshlarning muammolarini hal qilish va ularga yordam berish muhim vazifa ekanligini alohida taʼkidlab oʻtdi.

Darhaqiqat, bugungi kunda yurtimizda amalga oshirilayotgan keng koʻlamli islohotlar jarayonini yoshlar ishtirokisiz tasavvur qilib boʻlmaydi. Shu sababli mamlakatimizda yoshlar masalasiga har qachongidan ham katta eʼtibor qaratilmoqda. Tumanda joriy yil yanvar-fevral oylarida 14-30 yosh oraligʻida 53 ming 227 nafar yoshlar xatlovdan oʻtkazilib, “Yoshlar balansi” shakllantirilgan. Yoshlarning ijtimoiy ahvoli, qobiliyati va qiziqishlaridan kelib chiqqan holda ularning 37 ming 435 nafari “yashil”, 15 ming 408 nafari “sariq” hamda 384 nafari “qizil” toifalarga ajratilgan. “Sariq” toifadagi 750 nafar yoshlar tumandagi 24 nafar rahbarga biriktirilgan.

Shuningdek, II chorak yakuni boʻyicha “Yoshlar daftari”ga tuman hududidan 203 nafar yoshlar kiritilib, shundan 119 nafariga kasb oʻrganishi, salomatligini tiklashi va maʼnaviy rivojlanishi uchun amaliy yordamlar koʻrsatilgan.

Sessiya kun tartibidagi keyingi masala 2025-yilda investitsiyalar, sanoat va savdo yoʻnalishlarida amalga oshiriladigan ishlar haqida boʻldi. Ushbu masala yuzasidan Qoraqalpogʻiston Respublikasi Investitsiyalar, sanoat va savdo vazirligining Amudaryo tuman shuʼbasi bosh mutaxassisi Abbos Tursunboyev hisobot berdi.

Hisobotda keltirilishicha, tumanda 2025-yilda 317,8 mlrd soʻmlik 39 ta investitsiya loyihalari amalga oshirilishi, 732 ta yangi ish oʻrinlari yaratilishi va 16,8 mlrd soʻmlik mahsulotlar ishlab chiqarilishi rejalashtirilgan.

Shundan sanoat sohasida 153,8 mlrd soʻmlik 13 ta loyihalar asosida 480 ta ish oʻrni, qishloq xoʻjaligi sohasida 1,8 mlrd soʻmlik 2 ta loyihalar asosida 12 ta ish oʻrni, xizmat koʻrsatish sohasida 162,2 mlrd soʻmlik 22 ta loyihalar asosida 240 ta ish oʻrni yaratilishi rejalashtirilgan. Bugungi kunda qiymati 5,6 mlrd. soʻmlik 11 ta loyihalar ishga tushirilib, 44 ta yangi ish oʻrinlari yaratilgan.

Kun tartibidagi navbatdagi masala – 2025-yilning 3 oyi mobaynida mahalliy byudjetning daromadlari hamda xarajatlari yuzasidan tuman Iqtisodiyot va moliya boʻlimi boshligʻi Javlonbek Jumamurodov hisobot berdi.

2025-yil 3 oy davomida tuman mahalliy byudjetning daromadlar rejasi jami 28 mlrd 401 mln 405 ming soʻm qilib belgilangan boʻlib, ushbu reja jami 29 mlrd 448 mln 568,5 ming soʻmga, yaʼni 1 mlrd 47 mln 163,5 ming soʻmga yoki 103,7 foizga ortigʻi bilan bajarilgan. Tuman mahalliy byudjetidan hisobot davri davomidagi jami xarajatlari 35 mlrd 243 mln 497,8 ming soʻmni tashkil qilgan.

Sessiya majlisida “Amudaryo tumani suv yetkazib berish xizmati” davlat muassasasi direktori Shukurullo Yusupov hisobot berdi. Hisobotda 2025-yil vegetatsiya davrida tuman boʻyicha jami 38 ming 107 gektar ekin ekiladigan maydon, shundan 16 ming gektar paxta, 5 ming 809 gektar kuzgi bugʻdoy, 825 gektar sholi va 8 ming 821 gektar boshqa ekinlar, shuningdek 6 ming 652 gektar tomorqa yer maydonlari sugʻorilishi rejalashtirilgani xususida soʻz yuritildi. Deputatlar tomonidan vegetatsiya davri uchun yakuniy isteʼmolchilar kesimida hududlar boʻyicha ekinlarni sugʻorish uchun suv olish limitlari tasdiqlandi.

Sessiya kun tartibiga kiritilgan barcha masalalar, hisobot va axborotlar atroflicha muhokama qilinib, fikr-mulohazalar bildirildi va tegishli qarorlar qabul qilindi.

Shu bilan Xalq deputatlari tuman kengashining 9-sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.