“TADBIRKORLARGA HUQUQIY YoRDAM” AKTsIYaSI DOIRASIDA FERMER VA DEHQON XOʻJALIKLARI RAHBARLARI IShTIROKIDA UChRAShUV OʻTKAZILDI

Mamlakatimizda iqtisodiyotni yanada liberallashtirish, tadbirkorlar va ishbilarmonlarga berilayotgan imkoniyatlarni kengaytirish, xususiy mulkni har qanday tazyiqlardan himoyalash, biznes muhitini turli bosimlardan xoli qilish masalalariga alohida eʼtibor qaratilmoqda.

Xususan, tadbirkorlik faoliyatining himoyasini yanada mukammallashtirish, ishbilarmonlarning haq-huquqlari, xususiy mulk daxlsizligini taʼminlash maqsadida tadbirkorlarning mulkka doir huquqlarini buzish holatlariga yoʻl qoʻygan mansabdor shaxslarga nisbatan choralar koʻrilib, boʻlar-boʻlmas, noqonuniy tekshirishlarga chek qoʻyilayotgani, huquqi buzilgan tadbirkorlarga masʼullar tomonidan begʻaraz huquqiy maslahat va yordamlar taqdim etilayotgani bu borada oʻzining ijobiy samarasini bermoqda.

Ayniqsa, masʼul tashkilotlarning yetakchi mutaxassislari tomonidan hamkorlikda tashkil etilayotgan huquqiy maslahat va amaliy yordam tadbirlari tadbirkorlarning oʻz faoliyatlarini emin-erkin ado etishlarida muhim ahamiyat kasb etmoqda. Bu borada Amudaryo tumanida amalga oshirilayotgan tizimli ishlar eʼtiborga munosib.

27-may kuni Tadbirkorlar va ishbilarmonlar harakati ­– Oʻzbekiston Liberal-demokratik partiyasi Amudaryo tuman Kengashi deputatlari, tuman Adliya boʻlimi, Fermerlar, dehqon xoʻjaliklari va tomorqa yer egalari Kengashi, tuman Kambagʻallikni qisqartirish va bandlik boʻlimi hamda Savdo-sanoat palatasi masʼul mutaxassislari hamkorligida ishbilarmonlar bilan uchrashuv oʻtkazildi. “Tadbirkorlarga huquqiy yordam” aktsiyasi doirasida tashkil etilgan uchrashuvda tumanda faoliyat olib boruvchi tadbirkorlar, fermerlar, dehqon xoʻjaliklari rahbarlari, namunali tomorqa yer egalari ishtirok etdilar.

“Fermer va dehqon xoʻjaliklariga huquqiy yordam” mavzusidagi uchrashuvda tadbirkorlarni qiynab kelayotgan bir qator muammoli masalalar yuzasidan oʻzaro fikr almashilib, tadbirkorlarga zarur maslahat va tavsiyalar berildi.

Uchrashuv davomida fermerlarni qiynab kelayotgan muammolardan biri – fermer xoʻjaliklari va klaster korxonasi oʻrtasida har yilgi hosil boʻyicha tuziladigan kontraktatsiya shartnomalarining ayrim bandlari boʻyicha tushuntirishlar olib borildi.

Shuningdek, tadbirkorlik subʼektlariga taalluqli mulk daxlsizligini taʼminlash, tadbirkor va ishbilarmonlar uchun taqdim etilayotgan soliq imtiyozlari, ish beruvchi hamda ishchi-xodimlar oʻrtasidagi mehnat shartnomasining amal qilish muddatlari va mehnat haqi toʻlashning shakllari toʻgʻrisida mutaxassislar tomonidan huquqiy tushunchalar va tavsiyalar berildi.

Bundan tashqari, fermerlar va tadbirkorlar tomonidan tushgan savollar, ularning faoliyatida uchrayotgan muammoli masalalar hamda takliflar masʼullar tomonidan atroflicha oʻrganilib, tadbirkorlar bilan birgalikda muhokama qilindi va bu boʻyicha tushunmovchiliklar uchrashuv jarayonida bartaraf etildi.

Qizgʻin bahs-munozaralarga boy, huquqiy savol-javoblar tarzida oʻtgan uchrashuvda ishbilarmon va tadbirkorlar oʻzlarini qiynab kelayotgan muammoli masalalar boʻyicha huquqiy bilimlarini yanada oshirish imkoniga ega boʻldilar.

Xulosa qilib aytganda, tumanimizda tadbirkorlik subʼektlariga qaritilayotgan bu kabi eʼtibor iqtisodiyotni yanada liberallashtirish, tadbirkorlarning jamiyat taraqqiyotidagi oʻrnini mustahkamlash, ishbilarmonlarning haq-huquqlari hamda samarali faoliyatini taʼminlash orqali aholi farovonligini yanada oshirish imkonini beradi.

ROBIYa YOʻLDOShEVA.