13-sonli davlat maktabgacha taʼlim tashkilotidan 32 nafar tarbiyalanuvchi maktabga uchirma boʻldi

Mamlakatimizda bolalarning taʼlim-tarbiya jarayonini zamonaviy asosda tashkil etish borasida amalga oshirilayotgan islohotlar maktabgacha taʼlim tizimidagi ijobiy oʻzgarishlarning yaqqol ifodasidir. Bolalarni mustaqil hayotga va maktab bosqichiga tayyorlashda bogʻchalarning oʻrni beqiyos. Bu borada har bir maktabgacha taʼlim tashkiloti jamiyatda katta ahamiyat kasb etadi.

Ana shunday taʼlim-tarbiya maskanlaridan biri, Oʻrta qalʼa ovuli hududidagi 13-sonli davlat maktabgacha taʼlim tashkilotida bolajonlarni maktabga kuzatish munosabati bilan “Xayr, bogʻcha – salom, maktab!” nomli bayramona tadbir tashkil etildi.

Joriy yilda ushbu bogʻchaning 32 nafar tarbiyalanuvchisi maktab ostonasiga qadam qoʻyish arafasida. Ular uchun bu bosqich yangi hayotga, bilim dunyosiga ilk qadam hamdir.

Tadbirda tuman Maktabgacha va maktab taʼlimi boʻlimi shuʼba bosh metodisti Hulkar Babajonova, muassasa direktori Dilafruz Gulmirzayeva, ota-onalar, bobo-buvilar ishtirok etishdi.

Tadbir Oʻzbekiston va Qoraqalpogʻiston Respublikalari Davlat madhiyalarining yangrashi bilan boshlandi. Tadbirni kirish soʻzi bilan ochgan Dilafruz Gulmirzayeva soʻngi yillarda maktabgacha taʼlim tizimida amalga oshirilgan islohotlar, tarbiya jarayonidagi yangiliklar va bogʻchaning bugungi qiyofasi haqida toʻxtalib oʻtdi. Shuningdek, bolajonlarga maktab hayotida ulkan muvaffaqiyatlar tilab, fanlarni qunt bilan oʻzlashtirish, faol va bilimdon oʻquvchi boʻlish zarurligini taʼkidladi.

Bolajonlar tomonidan tayyorlangan sheʼrlar, raqslar, sahna koʻrinishlari tadbirga alohida fayz bagʻishladi. Ular baxtli bolalik, ona Vatan, maktab va bogʻcha haqidagi sheʼrlarni ifodali oʻqishdi. Ayniqsa, “Raqamlar” nomli sahna koʻrinishi bolalarning boshlangʻich matematikaga oid bilim va koʻnikmalarini amalda namoyon etishga xizmat qildi. Tadbir davomida tarbiyalanuvchilarning bogʻchada olgan bilim va koʻnikmalari aks etdi.

Shuningdek, mehmonlar ishtirokida oʻtkazilgan qiziqarli oʻyinlar, intellektual viktorinalar tadbirga koʻtarinki ruh bagʻishladi. Birinchi oʻyinda ishtirokchilar xotira sinovidan oʻtkazilsa, ikkinchi oʻyin chaqqonlik va diqqatni talab qiluvchi topshiriqlardan iborat boʻldi. Sharni boshidan tushirmasdan topshiriqlarni bajarish ishtirokchilarni birdek qiziqtirdi.

Aytish joizki, 13-sonli maktabgacha taʼlim tashkiloti binosi 1987-yilda barpo etilgan boʻlib, 2016-yilda qayta taʼmirlandi. Hozirda bu yerda 180 nafar tarbiyalanuvchi shinam va zamonaviy xonalarda tarbiyalanmoqda. Tashkilotda 10 nafar pedagog faoliyat yuritadi. Ulardan 4 nafari oliy maʼlumotli boʻlib, 1 nafari oliy toifali, 2 nafari birinchi toifali mutaxassislardir.

Taʼlim muassasasining faol tarbiyachilaridan biri — Gulnoza Gulmirzayeva “Yilning eng yaxshi tarbiyachisi – 2025” tanlovining II bosqichida muvaffaqiyatli ishtirok etdi.

Tadbir yakunida soʻzga chiqqan ota-onalar farzandlariga taʼlim va tarbiya bergan ustozlarga, bogʻcha rahbariyatiga samimiy minnatdorchilik bildirdi. Bu kabi tadbirlar nafaqat bolajonlar, balki ularning ota-onalari uchun ham faxrli va masʼuliyatli lahzalardan sanaladi.

 “Xayr, bogʻcha – salom, maktab!” tadbiri barcha ishtirokchilar qalbida unutilmas xotiralarga aylandi. Ushbu tadbir bogʻchalar farzandlarimizning hayot yoʻlidagi ilk poydevori ekanligini koʻrsatdi. Chindan ham, bugun bogʻcha ostonasidan maktabga qadam qoʻyayotgan har bir bola — ertangi kunimizning porloq kelajagidir.

Shohzod Qurbonboyev.