19-sonli maktabda sport toʻgaraklari samarali faoliyat yuritmoqda

Yosh avlodning jismoniy va maʼnaviy rivojlanishi, ularni sogʻlom turmush tarziga yoʻnaltirishda maktablardagi sport toʻgaraklari muhim oʻrin tutadi. Sport nafaqat jismoniy harakatlar yigʻindisi, balki salomatlikni mustahkamlovchi, ruhni tetiklashtiruvchi va irodani chiniqtiruvchi vositadir.

Maktablarda tashkil etilgan sport mashgʻulotlari oʻquvchilarning boʻsh vaqtini mazmunli oʻtkazishga hamda jismoniy faollikni oshirishga xizmat qiladi. Hozirgi zamonda bolalar orasida harakatsizlik, notoʻgʻri ovqatlanish va koʻz kasalliklari koʻpaygan bir paytda, sport mashgʻulotlari muhim profilaktika vositasiga aylanmoqda.

Maktabimizda bu yoʻnalishda bir qator chora-tadbirlar amalga oshirilmoqda. Jumladan, basketbol, voleybol, badminton va yengil atletika boʻyicha tashkil etilgan toʻgaraklar yaxshi samara bermoqda. Oʻquvchilar ushbu mashgʻulotlarda oʻz qobiliyatlarini namoyon qilib, turli musobaqalarda faol ishtirok etmoqda.

Xususan, “Umid nihollari – 2025” sport musobaqalarida basketbol boʻyicha 9–11-sinf qizlar oʻrtasida oʻtkazilgan bahslarda maktabimiz jamoasi tuman bosqichida 3-oʻrinni egalladi. Bu yutuq oʻquvchilarning hamjihatligi va mashgʻulotlardagi intizomi natijasidir.

Yengil atletika sport turida ham yoshlarimizning yutuqlari diqqatga sazovor. 11-sinf oʻquvchisi Muxlisa Toʻliboyeva “Umid nihollari – 2025” musobaqasining tuman bosqichida 1-oʻringa sazovor boʻldi. Ikkinchi bosqichda esa estafeta yugurish yoʻnalishida 3-oʻrinni qoʻlga kiritdi. Shuningdek, Muxlisa “Besh tashabbus olimpiadasi”ning yengil atletika musobaqalarida ham maktab sharafini munosib himoya qildi.

Bundan tashqari 11-sinfdan Roza Madadova va Diana Tursunbayeva, 10-sinfdan esa Umida Oʻrinbayeva va Sevinch Rajabbayeva kabi faol oʻquvchilar ham oʻtkazilayotgan sport musobaqalarida munosib ishtirok etmoqdalar.

Prezidentimizning tashabbusi bilan maktablar yozgi taʼtilda bolalar uchun foydali bilim va koʻnikmalarga ega boʻlish, sport va madaniyat bilan shugʻullanish uchun maxsus maskanlarga aylantirilmoqda. Bu maqsadda fan va sport mashgʻulotlari hamda kasb-hunarga yoʻnaltiruvchi darslar tashkil etilmoqda. Maktabimizda ham ushbu vazifalar asosida yozgi taʼtil davri uchun amaliy chora-tadbirlar rejasi ishlab chiqilgan.

Yuqoridagi natijalar maktabimizda jismoniy tarbiya va sportga berilgan eʼtiborning samarasi hisoblanadi. Bu esa oʻqituvchi va oʻquvchilarning birgalikda olib borayotgan fidokorona mehnatining natijasidir. Sport toʻgaraklaridagi yutuqlar yoshlarni sogʻlom turmush tarziga, faollikka va intizomga yoʻnaltiradi.

Shukurjon Jumamurodova, 19-sonli umumtaʼlim maktabining oliy toifali jismoniy tarbiya oʻqituvchisi.