Sayyor sud majlisida maʼmuriy huquqbuzarlikka oid 20 ta ish koʻrib chiqildi

18-iyun kuni jinoyat ishlari boʻyicha Amudaryo tumani sudi tomonidan Gulzor mahalla fuqarolar yigʻini binosining majlislar zalida ochiq va sayyor sud majlisi oʻtkazildi.

Jinoyat ishlari boʻyicha Amudaryo tumani sudining tergov sudyasi Donaxon Yusupova hamda sudya yordamchisi Elyor Jumaniyozov ishtirokida oʻtkazilgan mazkur sayyor va ochiq sud majlisida tuman IIB tomonidan taqdim etilgan maʼmuriy huquqbuzarlikka oid jami 20 ta ish koʻrib chiqildi.

Tadbir avvalida tergov sudyasi Donaxon Yusupova ishtirokchilarga Oʻzbekiston Respublikasi Prezidentining “Korruptsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korruptsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida”gi Farmonining mazmun-mohiyati yuzasidan atroflicha tushuntirishlar berdi.

Sudya taʼkidlaganidek, mamlakatimizda korruptsiyaning oldini olish va unga qarshi murosasiz kurashishning ilgʻor xalqaro standartlarga asoslangan tizimini joriy etish boʻyicha izchil va samarali choralar koʻrilmoqda. Jumladan, davlat organlari va tashkilotlar faoliyatida ochiqlik va oshkoralik, mansabdor shaxslarning aholi oldida hisobdorligi taʼminlanmoqda. Bu esa davlat boshqaruvida samarali va taʼsirchan jamoatchilik nazoratini amalga oshirish uchun huquqiy va institutsional sharoitlar yaratilishiga xizmat qilmoqda.

Darhaqiqat, korruptsiya nafaqat davlat, balki butun jamiyat taraqqiyoti uchun jiddiy toʻsiq hisoblanadi. Shu sababli har bir fuqaroning ushbu illatga nisbatan murosasiz munosabatda boʻlishi jamiyatda adolat, shaffoflik va tenglik tamoyillarini qaror toptirishda muhim ahamiyatga ega.

Tadbirda “Korruptsiyaga qarshi kurashish toʻgʻrisida”gi Qonunning mazmun-mohiyati, maqsad va vazifalari haqida ham atroflicha maʼlumot berildi. Qonun asosida korruptsiyaga qarshi kurashishdagi huquqiy munosabatlarni tartibga solish, davlat organlari, tashkilotlar hamda fuqarolik jamiyati institutlari tomonidan amalga oshirilayotgan chora-tadbirlar samaradorligini oshirish, aholining huquqiy ongi va madaniyatini yuksaltirish muhim ahamiyat kasb etishi alohida qayd etildi.

Sayyor sud majlisi davomida Oʻzbekiston Respublikasi Maʼmuriy javobgarlik toʻgʻrisidagi Kodeksning 183-moddasida nazarda tutilgan huquqbuzarlik — yaʼni mayda bezorilik sodir etgan 9 nafar shaxsga nisbatan toʻplangan ish materiallari koʻrib chiqildi. Sud tomonidan ularning 5 nafariga maʼmuriy qamoq, 4 nafariga esa jarima jazosi qoʻllanildi.

Shuningdek, Maʼmuriy javobgarlik toʻgʻrisidagi Kodeksning 59²-moddasi 2-qismida nazarda tutilgan huquqbuzarlik — oilaviy zoʻravonlik, hamda 41-moddasida nazarda tutilgan haqorat qilish, shuningdek, 52-moddasi 2-qismida koʻrsatilgan yengil tan jarohati yetkazish holati boʻyicha huquqbuzarlik sodir etgan shaxslarga nisbatan ham qonuniy asosda jazolar tayinlandi.

Sud muhokamalari davomida taraflarning fikrlari eshitilib, dalil va hujjatlar tahlil qilindi. Har bir ish yuzasidan xolis va adolatli qarorlar qabul qilindi.

Donaxon Yusupova, Jinoyat ishlari boʻyicha Amudaryo tuman sudining tergov sudyasi.