Bitiruvchilarga oltin va kumush medallar tantanali ravishda topshirildi

Bugun mamlakatimizda taʼlim sohasida amalga oshirilayotgan islohotlar, yoshlarga boʻlgan gʻamxoʻrlik va eʼtibor yurtimiz ravnaqi, ertangi kunimiz poydevorini mustahkamlash yoʻlida muhim qadam boʻlib xizmat qilmoqda. Ayniqsa, har bir bitiruvchining mehnatini qadrlash, ularning iqtidor va intiluvchanligini alohida eʼtirof etish jamiyatimizda ilm-fan, tafakkur va izlanuvchanlik qadri yuksak ekanidan dalolat beradi.

Amudaryo tumanida ham ana shunday ezgu anʼanaga sodiq qolgan holda, oʻquv yilini yuqori natijalar bilan yakunlagan, aʼlo baholari, namunali xulqi va ilgʻor tafakkuri bilan tengdoshlariga oʻrnak boʻlgan bitiruvchilarga oltin va kumush medallar tantanali tarzda topshirildi.

Tuman Madaniyat boʻlimida tashkil etilgan ushbu bayramona tadbirda tuman hokimi Sobir Xoʻjametov, hokim oʻrinbosarlari, soha mutasaddilari, maktab direktor va oʻqituvchilari, ota-onalar, shuningdek, qalblari faxr va iftixorga toʻla yoshlar ishtirok etdilar.

Tadbirda nutq soʻzlagan tuman hokimi Sobir Xoʻjametov bitiruvchilarni samimiy tabriklab, medal sohiblari – bu nafaqat maktabda aʼlo baholarga oʻqigan oʻquvchilar, balki kelajakda jamiyatimiz taraqqiyotiga hissa qoʻshadigan munosib kadrlar boʻlishi shubhasiz ekanligini taʼkidlab, yoshlarga yuksak ishonch bildirdi.

Xususan, yoshlarning oliy taʼlim muassasalariga oʻqishga kirib, yetuk mutaxassislar boʻlib yetishishlariga, kelgusida Vatanimiz ravnaqi, xalqimiz farovonligini oshirishga munosib hissa qoʻshishlariga, aniq maqsadlar qoʻyib, bor kuch-gʻayratlari va bilimlari bilan xalqimizga xizmat qilishlariga ishonch bildirildi.

Tuman hokimi barcha bitiruvchilarning kelgusi oʻqish va ishlarida, shaxsiy hayotida katta yutuq va zafarlar tiladi hamda farzandlarining taʼlim-tarbiyasiga bergan eʼtibori hamda masʼuliyati uchun ota-onalar va ustoz-murabbiylarga minnatdorchilik bildirdi.

Ota-onalarning koʻzlarida faxr, oʻqituvchilarning nigohlarida ishonch, bitiruvchilarning chehrasida esa oʻz mehnatlaridan, intilishlaridan rozilik zavqi porlaydi. Har bir medal – yillar davomida toʻplangan bilim, fidoyilik va tirishqoqlikning natijasi, har bir tabassum – gʻurur va masʼuliyat ifodasidir.

Aytish joizki, 2024-2025-yilgi oʻquv yilida Amudaryo tumanidagi umumtaʼlim maktablarini jami 3402 nafar oʻquvchi bitirgan boʻlsa, shundan 30 nafar iqtidorli yosh oltin medal, 7 nafar bitiruvchi esa kumush medalga loyiq deb topildi. Bu esa tumandagi taʼlim sifati, oʻqituvchilarning mehnati va oʻquvchilarning izlanishlari oʻz samarasini berayotganining yaqqol isbotidir.

Tadbir davomida tuman Madaniyat boʻlimining umidli xonandalari tomonidan ijro qilingan kuy-qoʻshiqlar barcha yigʻilganlarga yuqori bayramona kayfiyat baxsh etdi.

Taʼkidlash joizki, bugun yurtimizda bilimli, tashabbuskor, Vatan ravnaqiga fidoyilik bilan yondashadigan yangi avlod shakllanmoqda. Oltin va kumush medal sohiblari esa bu yoʻlda boshqalarga oʻrnak, ustozlariga esa eng katta mukofot hisoblanadi. Yurtga xizmat qilish, bilim bilan taraqqiyotga hissa qoʻshish – mana shunday yoshlarga munosib fazilatdir.

Charos Arslonova, tuman hokimligining Axborot xizmati rahbari.