Taʼlim – jamiyat taraqqiyotining asosi

Bugungi kunda har qanday rivojlangan davlat yoki millat taraqqiyotining poydevori sifatida taʼlim tizimi eʼtirof etilmoqda. Zero, jamiyat taraqqiyoti toʻgʻridan-toʻgʻri inson salohiyati, dunyoqarashi, bilim darajasi va fikrlash qobiliyatiga bogʻliq. Aynan taʼlim maʼrifatli, masʼuliyatli, yuksak tafakkurga ega bilimdon shaxslarni jamiyatga yetkazib beradi. Shu bois taʼlim — bu qisqa vaqtda emas, balki uzoq muddatda oʻz samarasini beruvchi muhim ijtimoiy sarmoyadir.

Yurtimizda taʼlim sohasini zamon talablari asosida isloh qilish, yosh avlodga chuqur va puxta bilim berish, ularni har tomonlama barkamol inson qilib tarbiyalash yoʻlida keng koʻlamli ishlar amalga oshirilmoqda. Taʼlim tizimining barcha bosqichlarida yangilanishlar va izchil islohotlar kuzatilmoqda. Eng muhimi, yoshlarning taʼlim olishi, ilmga qiziqishi va orzularini roʻyobga chiqarishi uchun imkoniyatlar kengaymoqda.

Prezidentimiz Shavkat Mirziyoyev nutqlaridan birida shunday degan edilar:

“Kelgusida Uchinchi Renessans poydevorini yaratadigan yangi Xorazmiylar, Beruniylar, Ibn Sinolar, Mirzo Ulugʻbek va Alisher Navoiylar qayerdan paydo boʻladi? Bu ulkan vazifalarni kim bajaradi? Men qayta-qayta takrorlashdan charchamayman: albatta, bu ezgu gʻoyalarni sizlar – bugungi Yangi Oʻzbekiston yoshlari amalga oshirasizlar.”

Ushbu soʻzlar biz — yoshlarda yurt oldidagi masʼuliyatimizni yanada chuqurroq anglash, oʻz ustida tinimsiz ishlash va kelajak uchun sidqidildan harakat qilish tuygʻusini oshiradi.

Shu oʻrinda taʼlimda ustoz shaxsining oʻrniga alohida toʻxtalib oʻtish lozim. Oʻqituvchi faqat dars oʻtuvchi emas, balki yoʻl koʻrsatuvchi, ruhlantiruvchi va hayotga tayyorlovchi insondir. Oʻquvchi ustozidan nafaqat bilim, balki munosabat, masʼuliyat, sabr va hayotiy qarashlarni ham oʻrganadi. Shu sababli, ustozlik kasbi jamiyatda munosib eʼtirof va ehtiromga sazovor boʻlishi shart.

Bugungi kunda taʼlim jarayoniga zamonaviy texnologiyalar keng tatbiq etilmoqda. Raqamli platformalar, onlayn darslar, elektron kutubxonalar – bularning barchasi yoshlar uchun yangi imkoniyat eshiklarini ochmoqda. Biroq shuni unutmaslik lozimki, hech qanday texnologiya inson qalbi va mehriga ega boʻlgan ustoz oʻrnini bosolmaydi. Taʼlimda qalb, samimiy muloqot va mehr har doim eng muhim omil boʻlib qoladi.

Olib borilayotgan islohotlar oʻz samarasini bermoqda. Soʻnggi yillarda minglab oʻzbekistonlik yoshlar dunyoning nufuzli oliy taʼlim muassasalarida tahsil olish imkoniyatiga ega boʻlmoqda. Ularning ayrimlari xalqaro tanlovlarda gʻoliblikni qoʻlga kiritayotgan, boshqalari esa yetakchi kompaniyalarda mehnat faoliyatini boshlagan. Bu esa taʼlim sohasiga qaratilayotgan eʼtibor, yaratilayotgan sharoit va eng muhimi, yoshlarga boʻlgan ishonch samarasidir. Bugungi kunda dunyodagi yetakchi oliygohlarda 1,5 mingdan ziyod talabalarimiz tahsil olmoqda. Bu – mamlakatimiz taʼlim tarixi uchun yuksak natijadir.

Xulosa qilib aytganda, bugun taʼlimga qaratilayotgan eʼtibor — ertangi kunga qoʻyilayotgan mustahkam poydevordir. Bu vazifa nafaqat davlat, balki har bir oila va har bir fuqaro zimmasiga tushadigan masʼuliyatli burchdir. Men, talabalardan biri sifatida, taʼlim jarayonida faol ishtirok etish bilan birga, kelajakda olgan bilimlarimni boshqalarga yetkazish, yosh avlodni oʻqitish va tarbiyalashdek sharafli vazifaga tayyorlanmoqdaman. Chunki men uchun taʼlim — faqat shaxsiy taraqqiyot emas, balki butun jamiyatga xizmat qilishning eng yuksak yoʻlidir.

Chin dildan ishonaman: taʼlim — jamiyat taraqqiyotining eng mustahkam tayanchi va eng bardavom yoʻlidir.

Diyorbek Bozorboyev, Oʻzbekiston Milliy universiteti Jizzax filiali talabasi.