3-SONLI DAVLAT MAKTABGAChA TAʼLIM TAShKILOTINING "WUNDERKIND" BOLALAR" JAMOASI QORAQALPOGʻISTONDA 2-OʻRINNI EGALLAShDI
Amudaryo tumani Maktabgacha va maktab taʼlimi boʻlimi tasarrufidagi 3-sonli davlat maktabgacha taʼlim tashkiloti namunali taʼlim-tarbiya muassasalaridan biri sanaladi. Muassasaning quvvati 50-oʻringa moʻljallangan boʻlib, ayni paytda 3 ta toʻliq kunlik guruhlarda 90 nafar bola tarbiyalanmoqda. Bolajonlarning miriqib dam olishlari, tabiat qoʻynida sayr qilishlari, oʻyin maydonchalarida bolalarbop sport mashgʻulotlarida ishtirok etib, qiziqarli oʻyinlar bilan shugʻullanishlari uchun barcha zarur sharoitlar yaratilgan. Ular oʻz qiziqishlari doirasida shaxmat-shashka oʻynashlari, xorijiy til oʻrganishlari, "Quvnoqlar va zukkolar" sport musobaqalarida ishtirok etish orqali jismonan chiniqib borishlarida malakali tarbiyachi-pedagoglar masʼul. Kichkintoylarga oʻz yosh toifalari doirasida taʼlim-tarbiya berishda interfaol usullardan foydalanishga asosiy eʼtibor qaratiladi. Xususan, bolajonlarning fikrlash qobiliyatini, nutqini rivojlantirish va xotirasini mustahkamlashga qaratilgan mashgʻulotlardagi uzviylik tufayli, ayniqsa, 5-6-7 yoshdagi bolalar orasida hissiy bilish qobiliyatining shakllanishini taʼminlab, alohida iqtidorga ega bolalarni kashf etish imkonini bermoqda.
Oʻzbekiston Respublikasi Prezidentining 2021-yil 19-maydagi "Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida"gi Qarori ijrosini taʼminlash hamda Qoraqalpogʻiston Respublikasi Joʻqorgʻi Kengesining 2024-yil 26-yanvardagi tegishli buyrugʻi bilan tasdiqlangan Qoraqalpogʻiston Respublikasi maktabgacha va maktab taʼlimi sohasini rivojlantirish boʻyicha tasdiqlangan ish-rejasiga muvofiq maktabgacha taʼlim tashkilotlari tarbiyalanuvchilari orasida ingliz tilida "Wunderkind" tanlovini tashkil etish belgilangan edi. Unga koʻra, tanlovning birinchi, tuman bosqichini yuqori saviyada oʻtkazish, birinchi bosqichda gʻoliblikni qoʻlga kiritgan MTTlar jamoalarining keyingi bosqichda muvaffaqiyatli ishtirokini taʼminlash orqali alohida iqtidorli bolalarni aniqlash hamda bolalarni mazkur tanlovga tayyorlashda namunali faoliyat olib borgan pedagoglarni ragʻbatlantirish nazarda tutilgandi.
Yaqinda "Wunderkind" tanlovining tuman bosqichida faxrli 1-oʻrinni egallagan Amudaryo tumani Maktabgacha va maktab taʼlimi boʻlimi tasarrufidagi 3-sonli davlat maktabgacha taʼlim tashkilotining "Wunderkind" bolalar" jamoasi aʼzolari mazkur tanlovning Qoraqalpogʻiston Respublikasi bosqichida ham muvaffaqiyatli ishtirok etib, gʻoliblik shohsupasidan joy oldilar. DMTTning jajji bilagʻonlari Abdumalik Soliyboyev, Afruza Rahimboyeva, Umida Ataxanova, Ravshanbek Toʻrayev va Komron Saʼdullayevlardan iborat jamoasi oʻzlarining mustahkam xotiraga ega, bilagʻon va epchilliklari bilan tanlov hakamlar hayʼati aʼzolarining yuksak eʼtibor va eʼtirofiga sazovor boʻldilar hamda faxrli 2-oʻrinni egalladilar.
Tanlovda gʻoliblikni qoʻlga kiritgan bolajonlar tashkilotchilar tomonidan munosib taqdirlandilar. Shuningdek, 3-sonli DMTTninig "Wunderkind" bolalar" jamoasini tanlov Nizomi talablari darajasida, yuqori saviyada tayyorlaganliklari uchun muassasaning xorijiy til oʻqituvchisi Dilnura Babaniyazova, tashkilot tarbiyachisi Nilufar Yeshimbetovalar Amudaryo tumani Maktabgacha va maktab taʼlimi boʻlimi tomonidan Faxriy yorliq bilan mukofotlandilar.
Maktabgacha va maktab taʼlimi tizimida taʼlim-tarbiyaviy ishlarning oʻzaro uygʻunligi asosida amalga oshirilayotgan bu kabi tadbirlar nafaqat bola shaxsining rivojlanishida, balki ularning alohida qobiliyat va iqtidorlarini erta aniqlash va ijobiy shakllantirish imkonini bermoqda.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
