“Korruptsiya – davlat va jamiyat taraqqiyotiga tahdid” nomli grant loyihasi doirasida davlat maktabgacha taʼlim tashkilotlarida korruptsiyaga qarshi kurashish va bolalarning sogʻlom ovqatlanishiga qaratilgan ishlar oʻrganildi

Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi Qoraqalpogʻiston boʻlinmasi tomonidan moliyalashtirilgan “Korruptsiya – davlat va jamiyat taraqqiyotiga tahdid” nomli grant loyihasi doirasida “Amudaryo televideniyesi” tahririyati tomonidan bir qator tadbirlar belgilangan.

Yaqinda loyiha doirasida “Amudaryo TV” telekanali jurnalist va muxbirlari tuman Maktabgacha va maktab taʼlimi boʻlimi bilan hamkorlikda davlat maktabgacha taʼlim tashkilotlarida korruptsiyaga qarshi kurashish va bolalarning sogʻlom ovqatlanishini taʼminlash borasida amalga oshirilayotgan ishlar holatini oʻrgandi.

Xususan, 40-, 43- va 7-sonli davlat maktabgacha taʼlim tashkilotlari faoliyati tahlil qilinib, ushbu muassasalardagi ovqatlanish tizimi, boshqaruvning shaffofligi hamda fuqarolik nazoratini taʼminlash holatiga eʼtibor qaratildi. Bunday amaliy monitoringlar orqali taʼlim muassasalarida shaffof boshqaruvni taʼminlash, bolalar uchun xavfsiz va sogʻlom muhit yaratishga xizmat qiladigan mexanizmlarni takomillashtirish maqsad qilingan.

Shu bilan birga, mazkur jarayonda korruptsiyaviy holatlarning oldini olish, manfaatlar toʻqnashuvi ehtimolini bartaraf etish hamda halollik tamoyillariga asoslangan boshqaruv tizimini mustahkamlash loyihaning ustuvor yoʻnalishlaridan biri sifatida belgilangan.

40-sonli davlat maktabgacha taʼlim tashkiloti Gulzor mahalla fuqarolar yigʻini hududida joylashgan boʻlib, bugungi kunda 6 ta guruhda 180 nafar bola taʼlim-tarbiya olmoqda. 2022-yildan boshlab muassasada ovqatlanish xizmati autsorsing tizimi asosida tashkil etilgan. Ushbu tizim taʼlim muassasasi maʼmuriyatini ovqatlanish bilan bogʻliq tashkiliy, moliyaviy va sanitariya masalalaridan chegaralab, bolalar taʼlim-tarbiyasiga alohida eʼtibor qaratish imkonini yaratgan. Shu orqali sifatli mahsulotlarni oʻz vaqtida yetkazib berish, taomlar turliligini taʼminlash va sanitariya-gigiyena talablariga rioya etish bilan bir qatorda, korruptsiyaviy xavf-xatarlarning oldi olinishiga ham erishilgan.

43-sonli davlat maktabgacha taʼlim tashkiloti Yangiobod mahalla fuqarolar yigʻini hududida joylashgan boʻlib, bugungi kunda 206 nafar bola taʼlim-tarbiya olmoqda. Bu yerda 42 nafar ishchi-xodim faoliyat yuritmoqda. 2022-yildan buyon ushbu muassasada ham ovqatlanish xizmati autsorsing asosida tashkil etilgan. Muassasada sogʻlom ovqatlanishni samarali yoʻlga qoʻyish, sanitariya va gigiyena talablariga toʻliq rioya etish, bolalarni toʻyimli va xavfsiz taomlar bilan taʼminlash masalalariga alohida eʼtibor qaratilmoqda. Shuningdek, ratsional ovqatlanish madaniyatini shakllantirish orqali taʼlim-tarbiya jarayoni samaradorligi oshirilmoqda.

7-sonli davlat maktabgacha taʼlim tashkiloti Doʻstlik mahalla fuqarolar yigʻini hududida joylashgan boʻlib, bugungi kunda 5 ta guruhda 150 nafar bola taʼlim-tarbiya olmoqda. Muassasada ham bolalarni sogʻlom va xavfsiz ovqatlantirishga jiddiy eʼtibor qaratilmoqda. Ovqatlanish jarayonida oziq-ovqat mahsulotlarining xavfsizligi va sifati kafolatlangan. Taom tayyorlashning har bir bosqichida sanitariya-gigiyena qoidalariga qatʼiy amal qilinadi. Shu bilan birga, bolalarda sogʻlom ovqatlanishga oid asosiy koʻnikmalarni shakllantirish va ratsional ovqatlanish madaniyatini yoshlikdan singdirish ishlari tizimli olib borilmoqda. Yuqumli kasalliklarning oldini olish maqsadida doimiy tibbiy nazorat yoʻlga qoʻyilgan.

Aytish joizki, oʻrganishlar davomida 40-, 43- va 7-sonli davlat maktabgacha taʼlim tashkilotlarida sogʻlom va xavfsiz ovqatlanishni tashkil etish borasida tegishli sanitariya-gigiyena hamda epidemiyaga qarshi chora-tadbirlar samarali yoʻlga qoʻyilgani aniqlandi. Mazkur monitoring jarayonlari maktabgacha taʼlim muassasalarida korruptsiyaga qarshi samarali mexanizmlarni shakllantirish va fuqarolik jamiyatining roli muhimligini yana bir bor tasdiqlamoqda.

ROBIYa YOʻLDOShEVA, ShOHZOD QURBONBOYeV, loyiha koordinatorlari.