30-SONLI DAVLAT MAKTABGAChA TAʼLIM TAShKILOTIDA OʻTKAZILGAN "XAYR, BOGʻChA, SALOM MAKTAB" TADBIRI MAROQLI TAASSUROTLARGA BOY BOʻLDI

Choykoʻl ovulida joylashgan Amudaryo tumani Maktabgacha va maktab taʼlimi boʻlimi tasarrufidagi 30-sonli davlat maktabgacha taʼlim tashkiloti hudud aholisining mushkulini oson qilib, farzandlariga namunali taʼlim-tarbiya   berayotganidan ota-onalar mamnun. Chunki davlat idoralarida, hududdagi fermer xoʻjaliklarida, turli sohalarda faoliyat olib boruvchi ota-onalar oʻz ish jarayonlarini bexavotir amalga oshirishlarida mazkur muassasa tarbiyachi-pedagoglarining hissasi katta.

Muassasada bolajonlarning yayrab oʻsishlari uchun barcha sharoitlar yaratilgan. 1989-yilda qurilib, foydalanishga topshirilgan, loyihadagi quvvati 50-oʻringa moʻljallangan muassasa binosi 2019-yilda "Obod qishloq" dasturi doirasida sifatli taʼmirlanib, tevarak-atrofi obodonlashtirildi. Muassasa xodimlari va ota-onalarning oʻzaro hamjihatliklari bois, tashkilot hududi koʻkalamzorlashtirildi va gulzorlar barpo qilindi. Ayni paytda yam-yashil tabiat bagʻridagi ushbu soʻlim bolalar maskanida 3 ta asosiy guruhda 75 nafar kichkintoylar tarbiyalanmoqda.

Muassasada faoliyat olib boruvchi 22 nafar xodimlarning 10 nafari oʻz kasbining bilimdonlari boʻlgan tarbiyachi-pedagoglardir. Musiqa, sport, xorijiy tillar yoʻnalishlaridagi pedagoglarning 3 nafari oliy, 3 nafari oʻrta maxsus maʼlumotga ega malakali mutaxassislar boʻlib, ular tomonidan olib boriladigan mashgʻulotlarning barchasi tarbiyalanuvchilarning yosh toifalariga mutanosib ravishda, interfaol usullarda oʻtkazilgani bois, bolajonlar uchun juda qiziqarli va maroqli.

Ayniqsa, maktabga tayyorlov guruhi tarbiyalanuvchilarining nutqiy, aqliy va jismoniy rivojlanishishini taʼminlashga qaratilgan innovatsion loyihalar asosidagi taʼlimiy va tarbiyaviy mashgʻulotlarning uzviyligi tufayli 6-7 yoshdagi bolajonlar orasida intiluvchanlik, maktab hayotiga qiziqish, bilimga chanqoqlik xislatlarining shakllanishiga erishilmoqda.

Muassasada joriy yilgi taʼlim-tarbiya jarayonida 25 nafar tarbiyalanuvchi maktabga tayyorlov guruhi uchun belgilangan rejaviy-mashgʻulotlarni toʻliq oʻzlashtirdilar va 18-iyul sanasida oʻqishga, ilm olishga ishtiyoqmand 25 nafar jajji bolajonlar uchun muassasada "Xayr, bogʻcha, salom maktab!" mavzusida adabiy-musiqiy xayrlashuv tadbiri oʻtkazildi. Tadbirda kichkintoylarning ota-onalari, muassasa tarbiyachi-pedagoglari ishtirok etdilar. Bolajonlar bir necha yil davomida oʻzlari uchun qadrdon boʻlib qolgan "bogʻcha opalari"ga minnatdorchilik ramzi sifatida sheʼrlar aytib berishdi, musiqa toʻgaragida oʻrgangan ashula va raqslarini ijro etishib, ota-onalarini quvontirishdi. Xorijiy til, sport toʻgaraklarida shugʻullanish orqali oʻzlashtirgan yangi soʻzlari, sport mashqlarini amalda namoyish qilib berdilar. Albatta, farzandlarining xorijiy til oʻrganishga boʻlgan intilishlari, sportga qiziqishlaridan ota-onalar mamnun boʻldilar.

Tadbir davomida soʻzga chiqqan ota-onalar, tarbiyachi-pedagoglar bolajonlarga maktab taʼlimini puxta oʻzlashtirish, kelajakda ona Vatanga munosib farzandlar sifatida voyaga yetishlarida ezgu tilaklarini bildirdilar va ularga oʻzlarining sovgʻalarini topshirdilar. Shu kuni biri-biridan maroqli taassurotlarga boy tarzda oʻtgan tadbir yakunida muassasaning 25 nafar maktabga tayyorlov guruhi tarbiyalanuvchilari quvnoq musiqa sadolari ostida tantanali ravishda maktab taʼlimi sari kuzatib qoʻyildi.

ROBIYa YOʻLDOShEVA.