"DOLZARB 90 KUN" LOYIHASI DOIRASIDA AMUDARYoLIK YoShLARGA TERMIZ ShAHRIDAGI "YoSh ChEGARAChILAR" AKADEMIK LITsEYI HAQIDA MAʼLUMOTLAR BERILDI

Barchamizga maʼlumki, 2025-yil 15-may kuni Prezidentimiz rahbarligida maktab taʼlimi tizimidagi islohotlarga bagʻishlangan videoselektor yigʻilishi boʻlib oʻtdi. Unda taʼlimning barcha bosqichlariga zamonaviy yondashuvlarni joriy etish, yoshlar tarbiyasi va ularning salohiyatini roʻyobga chiqarish boʻyicha ustuvor vazifalar belgilab berilgan edi.

Ushbu videoselektor  yigʻilishida  Prezidentimiz  tomonidan yoshlarning boʻsh vaqtini mazmunli tashkil etishga qaratilgan “Dolzarb 90 kun” dasturi eʼlon qilinib, mazkur dastur yoshlarda ijtimoiy faollikni oshirish, ularning bilim va koʻnikmalarini rivojlantirish, madaniy-maʼnaviy saviyasini yuksaltirishga xizmat qilishi taʼkidlanib, shu munosabat bilan  yozgi taʼtil paytida oromgohlarda dam olayotgan, "Barkamol avlod" bolalar markazlari hamda hududlardagi madaniyat muassasalari huzuridagi toʻgaraklarda shugʻullanayotgan turli yosh toifasidagi oʻquvchi-yoshlar oʻrtasida sport-sogʻlomlashtirish tadbirlarini tashkil etish, milliy-maʼnaviy ruhdagi davra suhbatlari, ular qalbida vatanparvarlik, millatlararo totuvlik tuygʻularini shakllantirishga xizmat qiluvchi uchrashuvlar oʻtkazish, bu uchrashuvlarga Milliy armiyamiz zobitlarini, taniqli yozuvchi va shoirlarni, oʻzlarining yuksak bilim va qobiliyatlarini amalda namoyon etib, tengdoshlariga namuna boʻlayotgan yoshlarni  taklif etish ularning  hayotiy tajribalarini  keng targʻib qilish  koʻzda tutilgan edi.

Mazkur vazifalar ijrosini taʼminlash maqsadida joriy yilning 25-iyul sanasida Amudaryo tumani Madaniyat markazi binosida tuman yoshlari   ishtirokida "Dolzarb 90 kun" doirasida targʻibot va tashviqot tadbiri oʻtkazildi.

Tadbirda Termiz shahrida joylashgan Davlat xavfsizlik xizmati Chegara qoʻshinlariga qarashli "Yosh chegarachilar" harbiy akademik litseyi direktori Muzaffar Norqobilov, DXX chegara qoʻshinlarining Qoraqalpogʻiston Respublikasi hududidagi harbiy qismlari zobitlari, Xalq deputatlari tuman Kengashi kotibiyati mudiri Mansur Oʻrazboyev, "Yosh chegarachilar" harbiy akademik litseyining amudaryolik namunali oʻquvchisi Mirjalol Maratov hamda tuman yoshlari ishtirok etishdi.

Tadbirda soʻzga chiqqan Termiz shahrida joylashgan "Yosh chegarachilar" harbiy akademik litseyi direktori Muzaffar Norqobilov va boshqalar qayerdaki vatanparvarlik, xalqparvarlik, millatlararo totuvlik tuygʻulari kuchli boʻlsa, oʻsha jamiyat har tomonlama ravnaq topishini, hech qanday tashqi taʼsirlar bu maʼnaviy birlikka putur yetkazmasligini alohida taʼkidladilar. Shu bilan birga, yoshlarni ilm olishga, kasb-hunar oʻrganishga daʼvat etdilar. Ayniqsa, "Yosh chegarachilar" harbiy akademik litseyi direktori Muzaffar Norqobilovning harbiy akademik litseyda yaratilgan shart-sharoitlar, qabul kvotasi, kirish imtihonlari, harbiy akademik litsey bitiruvchilari orasidan yetishib chiqqan jasoratli Vatan himoyachilari, ularning Ona Yurt sarhadlarini himoya qilish borasidagi qahramonliklari haqidagi soʻzlari yoshlarda katta taassurotlar qoldirdi.

Tadbir davomida "Yosh chegarachilar" harbiy akademik litseyi faoliyati, litsey oʻquvchilari uchun yaratilgan shart-sharoitlar, taʼlim-tarbiya va  harbiy- amaliy mashgʻulotlar, litseyda rejaviy-jadval asosida oʻtkaziladigan maʼnaviy-maʼrifiy tadbirlar xususida hikoya qiluvchi videorolik ham namoyish etildi. Videorolik namoyishidan soʻng yoshlar oʻzlarini qiziqtirgan savollar bilan murojaat qildilar va barcha savollariga masʼullar tomonidan  javoblar oldilar.

Boʻlib oʻtgan mazkur tadbir yoshlar qalbida vatanparvarlik, xalqparvarlik, milliy-maʼnaviy qadriyatlarga muhabbat tuygʻularini shakllantirishga hamda ularning ijtimoiy faolligini oshirishga xizmat qilgani bilan muhim ahamiyat kasb etdi.

Robiya Yoʻldosheva.