Amudaryo tumanida “Ilk rivojlanish markazi” ish boshladi

Amudaryo tumanida taʼlim sohasida muhim yangilik — zamonaviy “Ilk rivojlanish markazi” oʻz faoliyatini boshladi. Ushbu markaz tuman Maktabgacha va maktab taʼlimi boʻlimi huzurida tashkil etilib, bolajonlar ilk bora ilm-fan olamiga yetaklash, ularning har tomonlama rivojlanishi uchun qulay sharoit yaratishga qaratilgan.

Markazning tantanali ochilish marosimida Qoraqalpogʻiston Respublikasi Maktabgacha va maktab taʼlimi vaziri Gulistan Kojabayeva, tuman hokimi Sobir Xoʻjametov, Oʻzbekiston Respublikasi Prezidenti huzuridagi Ijtimoiy himoya milliy agentligi Qoraqalpogʻiston Respublikasi boshqarmasi boshligʻi Saylaubay Daniyarov hamda tuman Maktabgacha va maktab taʼlimi boʻlimi boshligʻi Yalgʻash Shomuratovlar hamda soha masʼullari ishtirok etdilar. 
Tadbir davomida mamlakatimizda soʻnggi yillarda taʼlim va ijtimoiy sohalarda amalga oshirilayotgan keng koʻlamli islohotlar, xususan, maktabgacha taʼlim bilan qamrovni kengaytirish borasida qilinayotgan ishlarga alohida toʻxtalib oʻtildi.

Markazning bosh maqsadi — hali maktabgacha taʼlim tizimiga qamrab olinmagan bolalarni, xususan, “Kambagʻallik reyestri”dagi oilalar farzandlari va imkoniyati cheklangan 2–7 yoshli bolalarni bepul taʼlim jarayoniga jalb etishdir. Bu orqali nafaqat bolalar, balki ularning ota-onalari va yaqinlariga ham katta sharoitlar yaratiladi.

Zamonaviy, eng soʻnggi oʻquv-uslubiy vositalar bilan jihozlangan markazda yorugʻ va shinam sinf xonalari, xavfsiz oʻyin maydonchalari tashkil etilgan. Bu esa bolajonlarning nafaqat bilim olishi, balki sogʻlom, baxtiyor va quvnoq ulgʻayishi uchun mustahkam zamin yaratadi. Dastlab 240 nafar bola markazga qamrab olinib, taʼlim jarayonlari ikki smenada, toʻrt soatdan tashkil qilinadi.

Shuningdek, markazda inklyuziv taʼlim tizimi ham joriy qilinmoqda. Alohida parvarishga muhtoj bolalar uchun maxsus sharoit yaratilgan boʻlib, individual oʻqitish jarayonlari uyga tashriflar orqali ham tashkil etiladi. Bu esa hech bir bolani taʼlimdan chetda qoldirmaslik tamoyilini amalga oshirishga zamin yaratadi.

Tadbir ishtirokchilari taʼkidlaganidek, ushbu tashabbus Oʻzbekiston Respublikasi Prezidentining 2024-yil 23-sentyabrdagi 330-sonli qarori ijrosi doirasida amalga oshirilmoqda. Qarorda 2025-yilda Amudaryo, Chimboy va Toʻrtkoʻl tumanlarida “Ilk rivojlanish markazlari” ish boshlashi belgilangan. Kelgusida esa bunday markazlar bosqichma-bosqich barcha tuman va shaharlarda tashkil etilishi rejalashtirilgan.

Ochilish marosimlari bir vaqtning oʻzida Chimboy va Toʻrtkoʻl tumanlarida ham parallel ravishda tashkil qilinib, boshqa tumanlardagi ishtirokchilar onlayn platforma orqali Amudaryo tumanidagi marosimni bevosita kuzatib bordilar. 
Markazlarda 2–6 yoshli bolalar uchun “Oʻyin” guruhlari, katta yoshdagi alohida taʼlim ehtiyojlari boʻlgan bolalar uchun esa maxsus “Maktabgacha taʼlim xizmati” tashkil etiladi.

Mazkur “Ilk rivojlanish markazlari” nafaqat bolajonlar uchun, balki butun jamiyat kelajagi uchun muhim ahamiyat kasb etmoqda. Chunki bolajonlarning kelajakda ilmli, sogʻlom va barkamol boʻlib ulgʻayishi, aynan bugun tashlangan mana shunday qadamlar bilan chambarchas bogʻliqdir. 

Charos Arslonova, tuman hokimligining Axborot xizmati rahbari.